1 TIMOTHI 3
3
Saptuam Kemtu Heutute
1Kuapeuh saptuam heutu a pan ut in nasep hoih a-ut ahi, chih adik ahi. 2Huchi in saptuam heutu zaw gensiatbei, zi khat nei, kidek thei, navaktak, midiktat, mipahtakdan siam, thuhilh siam, 3uain khamhat lou, mivuak hat lou, minunnem ahi ding hi, selhat lou, sum deihta lou, 4zahtakhuaitak a tate kemsiam, amah insung kizentak a vaihawm siammi ahi ding hi. 5Mi'n ama insung vaihawm nangawn kizentak a ahihsiam keileh bangchi in ahia Pathian saptuam akep theih ding? 6Gingthakmi ahi ding ahi kei, huchi lou in zaw akisathei kha dia, diabol siam louh tansakna ah apuk kha ding hi. 7Huaite lou leng polam a mite phat in a-om nalai ding ahi, huchi lou in zaw gensiat a a-om in diabol thang ah a-awk kha ding hi.
Saptuam Kemtu Upate
8Huchibang in Saptuam Upate leng mizahtakhuai ahih ding uh ahi; kamtamte, uain haite, lepna nin a huaiham mite ahi ding ahi kei; 9sia-le-pha theihna siang a ginna a thuguk kemmi ahi zaw ding uhi. 10Huan huaite leng chet in om masa uhen, huai nung in gensiatbei ahong hih uleh Saptuam Upa nna sem uhen. 11Huchibang in azite uh leng mizahtakhuai ahi ding uhi, gensiat hat lou, kidek thei leh bangkim a muanhuai ahi ding uhi. 12Saptuam Upate zi khat nei atate uleh amau insung vaihawm navaktak a hihmi hi uhen. 13Saptuam Upa nna hoihtak a semte'n amau a ding in phat tak hihna aloh ua, huan Khrist Jesu a om ginna a muanna leh hangsanna thupitak amu uhi.
Biakna Thuguk
14Sawt lou nung a na kiang a hong hoh lamen in hiai thu na kiang ah ka gelh ahi; 15himahleh ka hong zekai khakleh Pathian inkuanpihte lak a mi bangchibang in ahia a-om ding uh chih na theihna ding in ka gelh ahi; Pathian inkuanpihte Pathian hing saptuamte, thutak khuam leh kingakna ahi uhi. 16Pathian limsakna thuguk nial vual louh in athupi hi:
“Taksa a muh theih a latsak in Pathian a-om a,
Kha a siamtansak,
Angelte muh,
namte lak a tangkoupih,
khovel a mite gintak,
thupina apitouh ahi.”
Currently Selected:
1 TIMOTHI 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
