1 TIMOTHI 2
2
Saptuam Biakna
1Huchi in amasapen in thilnget thumnate, thumna himhimte, thumsaknate, leh kipahthu gennate, mi tengteng a ding a bawlsak ding in ka hon hanthawn hi. 2Kumpipate leh thuneite tengteng a ding in leng; Pathian limsak leh zahtakhuaitak a kituak a khamuang a i omtheihna ding in. 3Huai tuh i Hondampa Pathian theih in ahoih in, akipahhuai hi. 4Ama'n mi tengteng hotdam a om ding leh thutak thei ding in adeih hi.
5“Pathian khat kia a om,
Pathian leh mihing kikal ah
palai khat kia a-om nawn,
6Amah mihing ahi,
Khrist Jesu, mi tengteng tatna dia kipepa pen.”
Huai theihpihna ahuntak a piak ahi. 7Hiai hih ding a tangkoupihpa ding leh sawltak a seh ka hi, Khrist ah thutak tak ka gen, ka zuau kei; ginna leh thutak a Zentelte sinsakpa a seh ka hi.
Biakna A Numeite Omdan Ding
8Pasalte'n mun chih a khut siangthou zak in, thangpai lou leh ginglel lou in thum le uh ka deih hi. 9Huchibang mah in numeite zumthei leh omdan siam in puansilh kilawm lel in kivan le uh; samphek, dangka-eng, tuikepsuang leh puan mantam taktakte a kivan lou in; 10himahleh numei Pathian limsak kichite akihun lel in thil hihhoih in kivan le uh ka deih hi. 11Numei in thumang hiathiat in om dinden in zil hen. 12Himahleh numei in thu ahilh zaw ka phal kei, pasal tung a thuneih leng ka phal sam kei, dai dinden in om zaw hen. 13Adam siam masak ahi a, huai nung in Evi siam ahi. 14Adam khem in a-om kei a, numei khem in a-om a, tatlekna ah apukta hi. 15Numei in omdan siamna toh ginna leh itna leh sianthouna a a-om gigeleh nau pianna ah hotdam in a-om ding hi.
Currently Selected:
1 TIMOTHI 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
