1 TIMOTHI 1
1
Chibai Bukna
1Paul, Pathian thupiak bang a i hondampa leh i lamet Toupa Jesu Khrist sawltak in; 2ginna a ka ta taktak Timothi kiang ah, i Pa Pathian, leh i Toupa Khrist Jesu a kipan hehpihna, zahngaihna, leh khamuanna na tung ah om hen.
Sinsakmi Takloute
3Masidonia gam a ka hoh dek lai a ka hon nget bang in Ephesa ah om gige in, huchi a mi khenkhat gindan tuam sinsak lou ding a na hilhtheihna ding in. 4Huan Pathian lam a phattuamna, ginna a om pen hilou, kiselna leh gintak thu gen omsak lel tangthu leh khangthu sui zoh louh peuh buaipih lou ding a na hilhtheihna ding in. 5Eite'n thuhilh ding i kep pen bel lungtang siangthou leh sia-le-pha theihna siang leh ginna taktak a kipan a pawt itna ahi zaw hi. 6Mi khenkhatte'n hiaite pialsan in thugina lou genna lam ah avakmang uhi. 7Athugen uh leh thil ahi a agente uh leng bang ahia chih theiloupi in dan sinsak mite hih a-ut uhi.
8Mi'n azat hoihleh dan ahoih chih i thei uhi. 9Ahi a, dan zaw midiktatte a ding a bawl ahi kei a, dan kalhte leh dan lou a omte a ding, Pathian limsakloute leh mikhialte, misiangthouloute leh Pathian zahloute, pate thatte, nute thatte, mihing thatte; 10kingaihhatte, tawkohukte, mihing gute, zuautheite, kichiam khemkhemte a ding leh thil dang thugin toh kituak lou himhimte a ding leh, 11ka kiang a kepsak a om Pathian tanchinhoih thupi hilhna dik kalhte a ding ahi.
Pathian Zahngaihna Ziak A Kipahna
12Ahon hihhatpa Khrist Jesu i Toupa kiang ah kipahthu ka gen hi, muanhuai ahon sak a, anasempa dia ahon chih tak ziak in. 13Tuma lam in Pathian gensepa leh sawipa leh hihsepa na hita mah leng; gingtaloupi leh theiloupi a hih ka hih ziak in ahi zahngaihna ka na muh tak. 14Huan i Toupa hehpihna ginna leh Khrist Jesu a itna in nakpitak in adimletta hi. 15Khrist Jesu khialte hondam ding in khovel ah ahong pai chih ataksanhuai in alak tuak mahmah hi. Alak ua khialpen ka hi. 16Himahleh hiai ziak in ahi zahngaihna ka na muh; Jesu Khrist in adohzohna kim a khialpen keimah a alatsak theihna ding ahi, tuban siah tangtawn hinna muhna ding a amah hon gingta dingte a dia etsakna hi ding in. 17Kumpipa tangtawn a om, sithei lou, muh theih louh, Pathian tak kia, tangtawn in zahtak leh thupi in om hen, Amen.
18Ka tapa Timothi aw, na tungtang genkholhnate toh kituak in hiai mohpuakna leh thuhilhna ka hon pia hi, huchi a huai thute hilh a, kidouna hoih na dou theihna ding in, 19ginna leh sia-le-pha theihna siangtak len tinten in, mi khenkhatte'n huai sia-le-pha theihna paikhia in ginna lam ah long sia bang in akekseta uhi. 20Huaite lak ah Himenaias leh Alexander apang uhi; Pathian agensiatlouhna ding un amaute Setan ka peta hi.
Currently Selected:
1 TIMOTHI 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
