2 THESSALONIKATE 3
3
Thumsak Ding A Ngetna
1Atawp pen in unaute aw, Toupa thu noumau lak a a-om bang in, khang a hih thupi a a-omtheihna ding leh, 2migenhakte leh migiloute lak a ka bit theihna ding un, hon thumsak un; mi tengteng in lah ginna anei vek kei uhi.
3Himahleh Toupa amuanhuai a, ama'n noute hon phutkip in giloupa a pan ahon veng ding hi. 4K'on thupiak peuhmah uh na hihzou ua, na hih zelzel uh leng Toupa ah ka hon gingta uhi.
5Toupa'n na lungtangte uh Pathian itna ah leh Khrist kuhkalna ah pilut hen.
Thanuam Ding A Thuhilhna
6Huan unaute aw, koute a kipan a thuhilhna amuh bang ua om lou nasep thadah, dan lou bang a om unau tengteng a pan kihemkhe ding in i Toupa Jesu Khrist min in thu ka hon pia uhi. 7Na kiang ua ka om lai un, dan lou bang in ka gamta ngei kei uh chih leh noumau mahmah in na hon zuihdan ding uh na thei uhi. 8Kuamah khut a kipan athawn in na tanghou uh leng ka ne ngei kei uh; noute ka hon tuailuai saklouhna ding un sun leh zan a gim leh tawltak a sem kawm in ka ne zaw zel uhi. 9Huai thuneihna ka neih louh ziak uh hilou in, ka omdan uh na zuih ding ua etton ding hon pia ka hi zaw hi. 10Na kiang ua ka om lai un; kuapeuh in nna asepnop keileh nek leng ne kei hen, chi in thu ka hon pia uhi.
11Na lak ua khenkhat dan lou a omte tungtang ka za uhi, huaite'n nna himhim asem kei ua, midangte nasep ah akichinglah zaw uhi. 12Huchi ahih chiang in, huai mite nasem hiathiat ding leh amau tanghou ne ding in Toupa Jesu Khrist ah thu pia in ka hanthawn uhi.
13Unaute aw, nou zaw thil hoih hih chimtak kei un. 14Huan kuapeuh in hiai ka laikhak ua ka thu uh azuih kei uleh, na kithuahpih hetlouhna ding un chiamteh un, azumtheihna ding in. 15Ahi, melma bang in en kei unla, unau bang in hilh zaw un.
Thu Nanungte
16Tu in muanna Toupa'n kong chiteng ah noute hon khamuan tawntung hen. Toupa na vek ua lak ah om hen.
17Kei, Paul in, keimah khut a hiai chibai bukna ka gelh ahi; hiai ka laikhak teng ah chiamtehna ahi; hichibang ka gelhdan ahi.
18I Toupa Jesu Khrist hehpihna na vek ua tung ah om hen. Amen.
Currently Selected:
2 THESSALONIKATE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
