1 THESSALONIKATE 5
5
Toupa Ni
1Himahleh naute aw, ahun leh ani lam thute himhim gelhsak na kiphamoh kei uh. 2Toupa ni tuh zan lai in guta bang in ahong tung ding chih noumau ngei in chiantak in na thei uhi. 3Muanna leh bitna chi a agen laitak un numei nauvei bang in thakhat in manthatna atung uah atung ding a, asuakta kei hial ding uhi. 4Himahleh unaute aw, nou zaw huai ni in guta bang a hon bingphawn ding in mial ah na om kei uhi. 5Vak tate leh sun tate na hi vek ngal ua; zan a mi i hi kei ua, mial a mi leng i hi sam kei uhi. 6Huaiziak in midangte bang in i ihmu kei ding uh, hak ni in limsak zaw ni. 7Ihmute zan in ahi a-ihmut uh; zukhamte leng zan in ahi akham uh. 8Himahleh eite bel sun a mi i hih ziak in, ginna leh itna lum tawi in, hotdam lametna lukhu a zang in limsak zaw ni. 9Pathian in thangpaihna thuak ding hilou in, Toupa Jesu Khrist ziak a hotdamna mu ding zaw in ahon chi hi. 10I hah in leng i ihmut in leng, amah toh i hinkhawm theihna ding in i sih sik in amah asita hi. 11Huaiziak in kihanthawntuah chiat in, na hih zel mah bang un kitungdingtuah chiat un.
Kithuhilhna
12Huan unaute aw, na lak ua semgim leh Toupa a na heutu ua na omleh nou hon thuhilhte thei ding in ka hon ngen ahi. 13Anasep ziak un it in ngai thupi mahmah un. Noumau kituak in om un.
14Tu in unaute aw, ka hon hanthawn uhi, dan lou a omte hilh unla, lungkete hanthawn un, hatloute panpih unla, mi tengteng lak ah thuakzoutak in om un. 15Kuamah in kua gitlouh leng gilou a thuk lou ding in pilvang un; thil na kihihsaktuahna lam uah leh mi tengteng tung a na hihsakna lam uah leng ahoih lamlam zui un.
16Nuam gige un; 17tawp lou in thum un; 18bangkim ah kipahthu gen gige un; huai tuh noumau lam a Khrist Jesu ah Pathian deihlam ahi.
19Kha phelh kei un; 20thugente simmoh kei un; 21bangkim enchian zaw unla, ahoih lam peuhmah len tinten un; 22gilou lam peuhmah ah kihemkhia un.
Vualzawlna
23Huchi in lemna Pathian ngei in nou hon hihsiangthou sipsip hen; na kha uh leh na lungsim uh leh na pumpi uh i Toupa Jesu Khrist hong pai chiang in gensiatbei in humbit in omsuak sipsip hen. 24Nou hon sampa amuanhuai a, hih leng ahih ding hi.
25Unaute aw, hon thumsak un.
26Unaute tengteng tawp siangthou in chibai hon na buksak un.
27Hiai laithon unau tengteng kiang ah sim ngeingei ding in Toupa min in ka hon ngen hi.
28I Toupa Jesu Khrist hehpihna na kiang uah om hen, Amen.
Currently Selected:
1 THESSALONIKATE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
