1 THESSALONIKATE 4

Pathian Deihdan Hinkhua

1Huchi in unaute aw, atawp pen in na omdan ding uleh Pathian na hih kipahdan ding uh, tua na omdan bang uh, koumau a kipan a na lak bang un na hauhsemna ding un Toupa Jesu ah ka hon ngen un ka hon hanthawn uhi. 2Toupa Jesu ziak in bangthute ahia ka hon piak uh na thei uhi. 3Pathian deihlam a na sianthouna ding uh hiai ahi: kingaih tawpsan unla; 4na pumpi chiat uh siangthou leh zahtakhuai a kepdan ding thei un, 5Pathian thei lou Zentelte bang a huk lamsang a ut lou in. 6Huai lam thu ah zaw kuamah takhial in a-unau tung ah thil hoih lou hih kei hen; huchibang thilhihte tengteng phulapa Toupa ahih ziak in ka hon hilhkhol un ka hon theisak khinta uhi. 7Pathian in siang lou ding in ahon sam kei a, siangthou ding in ahon sam zaw hi. 8Huaiziak in anial in mihing nial ahi kei a, Pathian nou a Kha Siangthou hon pepa nial ahi zaw hi.

9Himahleh unaute itdan lam thu gelhsak na kiphamoh kei ua, ki-ittuah chiat ding in noumau ngei Pathian hilh in na omta uhi. 10Masidonia gam a unau om tengteng tung ah huai na hih ngei uhi. Himahleh unaute aw, na hauhsemna ding un ka hon hanthawn uhi; 11kamsim deuh a omleh noumau nna chiat limsak leh thu ka hon piak bang ua na khut ngei ua sep na tupna ding un; 12huchi in polam mite tung ah kilawmtak in na om thei ding ua, bangmah na tasam kei ding uhi.

Toupa Hong Paina Ding Thu

13Himahleh unaute aw, midang lametna himhim neiloute bang a na lungkhamlouhna ding un, ihmute tungtang na theih louh uh ka deih kei uhi. 14Jesu si a, thounawnta ahi chih i gintak mah bang in Jesu a ihmu khinsate Pathian in amah toh ahon tonpih ding hi.

15Hiai Toupa thu in na kiang uah ka gen uhi; eite Toupa hong pai pha a hingdam a na omlaite'n, ihmu khinsate i makhelh kei hial ding hi, chih. 16Toupa mahmah kikou aw toh, angel tungnungpen aw toh, Pathian pengkul ging toh, van a kipan a hong paisuk ding lah ahi ngal a, huan Khrist a sisate athou masa phot ding ua; 17huai khit chiang in eite hingdam a na omlaite, huihkhua ah Toupa tuak ding in amau toh meipi lak ah laktouh in i om ding uhi; huchi in tangtawn in Toupa toh i omkhawm denta ding uhi. 18Huaiziak in hiai thute in kikhamuantuah chiat un.

Currently Selected:

1 THESSALONIKATE 4: PAITBSI

Highlight

Copy

Compare