1 THESSALONIKATE 3
3
Timothi Nasepna
1Huchi in ka thuakzoh tak louh phet un Athen ah koumau kia nutsiat in om le ung hoih ka sa ua, 2i unaupa uh Timothi ahihleh Khrist tanchinhoih lam a Pathian nasempa, nou hon hihkip ding leh na ginna lam ua nou hon khamuan ding in ka hon sawlta uhi. 3Hiai gimthuaknate ziak a kuamah alinlouhna ding un. Hiaite bang thuak ding a seh ka hi uh chih noumau ngei in na thei uhi. 4Na kiang ua ka om lai ua gimthuak ding ka hi uh chih ka hon hilhkholh bang ngei in atungta hi, huai na thei uhi. 5Hiai ziak in, ka thuakzoh tak louh nung in, khempa'n nou ahon khempuk kha dia, ka sepgimna uh athawn kha ding chi in na gindan uh ka na theihna ding in mi ka hon sawl ahi.
6Himahleh Timothi, noumau a kipan a tua ka kiang uh ahong tun in, hon muh ka ut mahmah bang un nou leng hon muh ut mahmah in hehpih in na hon theigige uh chih leh na ginna uh leh na itna tanchin uh kipahhuaitak mai ahon puak hi. 7Huchi ahih ziak in unaute aw, ka mangbatna uleh gimthuakna tengteng uah na ginna ziak un na tungthu uah lungmuan in ka omta uhi. 8Toupa a na dinkip phot uleh tu'n tuh ka hingta uhi. 9I Pathian ma ah na tung ua ka kipahna tengteng ziak un noumau lam thu ah Pathian kiang ah bangchibang in kipahthu ka gen thei zozen ding uam aw? 10Na mel uh ka muhtheihna ding uleh na ginna lam ua na taksap awng uh ka hon huksak theihna ding un sun leh zan in nakpitak in ka thum uhi.
Thumna
11Huchi in Pathian, i Pa ngei leh Toupa Jesu'n leng, koute na kiang uah hon pitung hen. 12Huan noumau lam a itna ka hauh bang un, noumau khat-le-khat na ki-ittuah chiatna uleh mi tengteng na itna uh hon khangsak zelpa Toupa'n hon hausak semsem hen; 13huchi a i Toupa Jesu, amisiangthou tengteng toh ahong pai chiang a, i Pathian leh a Pa ma a na lungtangte uh sianthouna lam ah gensiatbei a om ding a nou ahon hihkip theihna ding in.
Currently Selected:
1 THESSALONIKATE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
