1 THESSALONIKATE 2
2
Paul In Anasep Agum
1Unaute aw, na lak ua ka hong lutna uh athawn kei chih noumau mah in na thei uhi. 2Athawn hih nak sang in huai malam in na theihsa bang un, Philippi a gimthuak leh zumhuaitak a bawl a ka om nung un, dalna thupitak lak ah leng Pathian tanchinhoih na kiang ua gen ding in ka Pathian uah hangsanna ka nei zaw uhi. 3Ka thugen uh khemna a pawt ahi kei a, sianlouhna a suak leng ahi kei a, khemna in leng ahi sam kei hi; 4tanchinhoih kepsak a om ding a Pathian hoihsakmi ka hih bang ngei un, mihing hihkipak ding hilou a, ka lungtang uh ze-etpa Pathian hihkipak zaw in thu ka gen zel uh ahi zaw hi. 5Chik lai peuh in kimaitang phatna thu leh huaiham khuhmangna ding thu ka zong ngei kei uh chih na thei ua; Pathian leng ahon theihpihpa ahi. 6Khrist sawltak ka hih ziak un mite buaisak thei himah le ung, mihing lak ah nou lak ah leh midangte lak ah leng pahtawina ka zong ngei sam kei uhi. 7Nu naupom, ama tate deihthohtak a kemmi bang in, na lak uah nunnemtak in ka om zaw uhi. 8Huchi in ittak a nou ka hon lunggulh tuntun ziak un, Pathian tanchinhoih kia hilou in, koumau hinna leng hon piak hial ka ut mahmah uhi. 9Unaute aw, ka septawldan uleh ka sepgimdan uh na theigige uhi; na lak uah kuamah ka suk tuailuailouhna ding un, sun leh zan a nna sem in Pathian tanchinhoih nou ka hon hilh uhi.
10Nou gingtate tung a siangthoutak, diktak leh dembei a ka omdan uh ahon theihpihte Pathian leh noute na hi uhi. 11Na theih mah bang un, pa'n ama tate tung a ahih bang a hanthawn leh khamuan in nou ka hon theisak uhi. 12Amah gam leh thupina a nou hon samlutpa Pathian mite hi ding a kilawm him a na hintheihna ding un.
Khrist Min A Thuakna
13Hiai ziak in tawp lou in Pathian kiang ah kipahthu ka gen uhi, Pathian thu koumau a kipan a na muh uh, na san lai un leng, mihing thu bang in na sang kei ua; Pathian thu ahihna bang a na san zawk ziak un; huai tuh Pathian a ahi him a, gingtami noumau sung a sem zel mah ahi. 14Nou unaute aw, Judia gam a Pathian saptuam pawl Khrist Jesu a omte zuite na hi ua, amau Judate lak a athuak bang un, nou leng noumau gam mite lak ah na thuak sam uhi. 15Huai Judate'n Toupa Jesu leh zawlneite leng athat ua, kou leng ahon delhkhia ua, Pathian ahihlungkim kei ua, mi tengteng akalh nak uhi. 16Zentelte hotdam ahihtheihna ding ua akiang ua thugen akham ua, akhelhna uh hihdim gige ding in; himahleh atung uah thangpaihna tawpkhawk atungta hi.
Paul In Thessalonika Veh Nawn A-ut
17Himahleh unaute aw, sawt lou kal a dia noumau toh lungtang lam a kikhen lou a, pumpi lam kia a kikhen a i om takdih ziak in, kilawptak a na mel uh mu ding in ka pang sansan uhi. 18Na kiang ua hong pai ka tum tinten ngal ua; kei, Paul ngei in leng hong pai ka tumtum a, himahleh Setan in ahon dal nak hi. 19Ka lametna uhiam, ka lungnopna uhiam, ka Kipahna Lallukhu uhiam bang ahia le? Ahong pai chiang in i Toupa Jesu ma ah noumau mah na hi kei ding ua hia? 20Noumau mah ka thupina uleh ka lungnopna uh na hi uhi.
Currently Selected:
1 THESSALONIKATE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
