1 JOHAN 4
4
Khate Chian Un
1Deihtakte aw, kha napeuh gingta kei un, himahleh khate Pathian a kipan ahi uhiam hilou chih chian un; khovel a zawlnei taklou tampi ana pawt tak ziak un. 2Hiai ah Pathian Kha na thei ding uh, bang kha peuh Jesu Khrist, sa in ahong pai chih gum tuh Pathian a kipan ahi. 3Bang kha peuh Jesu gum lou Pathian a kipan ahi kei; huai tuh Khrist doumi kha, hong pai ding na zak uh ahi; tu in khovel ah a-om khinta hi.
4Naute aw, Pathian a kipan na hi ua, tuate na zouta uhi; noumau a om khovel a om sang a athupi zawk ziak in. 5Amau khovel a ahi ua; huaiziak in khovel a bang in apau ua, khovel in athu uh angaikhia hi. 6Eite Pathian a kipan i hi ua, Pathian thei mite'n i thu angaikhe zel uhi; Pathian a kipan lou mite'n bel i thu angaikhe kei uhi. Hiai ah thutak Kha leh thutak lou kha i thei uhi.
Pathian Itna Ahi
7Deihtakte aw, i ki-ittuah chiat ding uh; itna zaw Pathian a suak ahi ngal a, michih itna nei peuhmah Pathian a suak ahi khin ua, Pathian athei lai uhi. 8Itna nei lou in Pathian athei kei; Pathian itna ahih ziak in. 9Hiai ah Pathian itna i tung uah ahong langta hi, amah ziak a i hintheihna ding a Pathian in a Tapa neihsun khovel a ahon sawlna ah. 10Hiai ah itna a-om, eite'n Pathian i it uh ka chi ahi kei, ama'n ahon it a, i khelhnate thuphatawina ding in, a Tapa ahon sawl ka chi zaw hi.
11Deihtakte aw, Pathian in huchi tel a ahon itleh eite leng i ki-ittuah chiat ding uh ahi.
Itna Pathian Muhna Ahi
12Kuamah in chik lai mah in Pathian amu ngei kei hi. I ki-ittuah chiat uleh ei ah Pathian a-om gige dia, a-itna leng eite sung ah akim lai ding hi.
13Amah ah i om gige chih leh amah eite sung ah a-om gige chih Kha a hon piak tak ziak in hiai ah i thei hi. 14Huan Pa in Tapa khovel Hondampa hihna nei in ahon sawl chih i muta ua, i theisak uhi. 15Kuapeuh Jesu Pathian Tapa ahi chi a gum amah ah Pathian a-om gige a, amah leng Pathian ah a-om gige hi.
Itna Buchinna
16Pathian in eite a ding in itna anei chih i theita ua, i gingta lai uhi. Pathian itna ahi; itna a om gige mi Pathian ah a-om a, Pathian leng amah ah a-om hi. 17Hiai ah i tung uah itna akimta, vaihawm ni a ding a lau lou a i omtheihna ah; amah om bang a khovel a i om ziak in. 18Itna ah launa a-om kei, itna kim in lauhna adelhkhe zaw zel hi, lauhna in gawtna ahon ngaihtuahsak; alaumi peuhmah itna ah abukim nai kei hi.
Pathian Itna Leh Sanggamte Itna
19Ama'n ahon it masak ziak in i it uhi. 20Mi'n, “Pathian ka it,” chi in a-unau ho taleh amah zuauthei ahi; a-unau amuhsa bawn a-it kei in, Pathian amuh ngei louhpi bangchi in a-it thei dia? 21Amah kiang a kipan in hiai thupiak i nei uhi, kuapeuh in Pathian a-itleh a-unau leng a-it sam ding chihna ahi.
Currently Selected:
1 JOHAN 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
