1 JOHAN 3
3
Pathian Tate
1Ngai un, Pa hon itna thupi hi na tel e! Pathian tate chih a i om; huai mah i hihna uh ahi hi. Hiai khawng ziak in khovel in ahon thei kei hi, amah atheih louh ziak in. 2Deihtakte aw, tu'n ah Pathian tate i hi ua, bangchi in ahia i om ding chih akithei tadih kei hi; amah ahong kilak chiang in, amah bang in i om ding chih bel i thei hi, amah a-om ngeingei bangtak a mu ding i hi ngal ua. 3Amah tung a lametna nei peuhmah amah asiangthou bang in akihihsiangthou hi.
Pathian Tate Leh Diktatna
4Kuapeuh thil hihkhial dan ah atalek hi; dan a tatlekna khelhna ahi ngal a. 5Amah khelhnate lamang ding in ahong langta chih na thei uhi; amah ah khelhna bangmah a-om kei hi. 6Kuapeuh amah a om gige in thil ahihkhial kei; kuapeuh thil hihkhial in amah amu kei a, amah leng athei kei hi.
7Tate aw, kuamah khem in om kei un. Diktatna hihmi amah adiktat mah bang in adiktat hi. 8Thil hihkhialmi zaw diabol a pawt ahi; diabol in atung a kipan thil ahihkhial hi. Pathian Tapa hong latna pen diabol nasepte ahihmanthat theihna ding in ahi.
9Kuapeuh Pathian a suak in amah a Pathian chi a-om gige ziak in thil ahihkhial kei, Pathian a suak ahih ziak in, thil ahihkhial thei kei hi. 10Hiai ah Pathian tate leh diabol tate atheihtheih hi; kuapeuh diktatna hih lou Pathian a suak ahi kei a, a-unau it lou leng Pathian a suak ahi kei hi.
Unau Ki-ittuahna
11Atung a kipan thukhah na zak uh i ki-ittuah chiat ding uh chih ahi. 12Kain, giloupa a kipan amah unau thatpa bang in om kei ni. Bangziak in ahia athah tak? Amah thilhihte agilou a, a-unau thilhihte adik ziak in ahi.
13Naute aw, khovel in nou ahon huatleh lamdang sa kei un. 14Unaute i it ziak in sihna a kipan in i pawt ua, hinna ah i lutta chih i thei uhi. Kuapeuh itna nei lou sihna ah a-om lai hi. 15Kuapeuh a-unau hua tualthat ahi; tualthatmi tangtawn hinna nei a-om kei uh chih na thei uhi.
Itna Latsakna
16Hiai ah itna bang ahia chih i thei hi, ama'n eite a dia ahinna apiak tak ziak in; en leng unaute a ding in i hinna i piak sam ding ahi. 17Himahleh kuapeuh in khovel sum nei in, a-unau tasam in mu henla, amah lainat tuan kei taleh Pathian itna amah ah bangchi in a-om dia? 18Naute aw, thu kia in it kei ni, lei kia in leng it sam kei ni, thilhih leh thutak in hi zaw hen.
19Hiai in thutak a suak i hi chih hon theisak a, amah ma ah i lungtang i muangsak thak ding hi. 20I lungtang in siam louh ahon tansak dek chiang in chihna ahi; Pathian zaw i lungtangte sang in alianzaw a thil bangkim athei hi. 21Deihtakte aw, i lungtang in siam louh ahon tan keileh Pathian lam ah i hangsan hi; 22athupiakte i zuih ua, amitmuh a thil kipahhuai i hih zel ziak in i nget peuhmah amah a kipan in i mu zel uhi. 23Huan athupiak hiai ahi, a Tapa Jesu Khrist min gingta lehang, ama'n thu ahon piak bang in ki-ittuah chiat lai lehang. 24Athupiakte zuimi amah ah a-om gige a, amah mah leng amah ah a-om gige hi. Huan Kha ahon piak ah amah eimau ah a-om gige chih i thei uhi.
Currently Selected:
1 JOHAN 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
