1 JOHAN 2
2
Gensakpa Jesu Khrist
1Ka naute aw, thil na hihkhelhlouhna ding un hiai thute na kiang uah ka gelh ahi. Kuapeuh in thil ahihkhelhleh Pa kiang a hon gensakpa, Jesu Khrist, midiktat i nei hi. 2Amah i khelhnate thuphatawina ahi, eimah khelhna kia hilou in, khovel tengteng khelhna thuphatawina leng ahi.
Pathian Theihna Athupiakte Zuih Ahi
3Huan athupiakte i zuihleh huai ah amah i thei chih i kithei hi. 4Athupiakte zui lou a, “Amah ka thei,” chimi zaw mizuauthei ahi, amah ah thutak a-om kei hi. 5Kuapeuh athu zui peuhmah amah ah Pathian itna akim petmah hi. Amah ah i om chih hiai ah i kithei ahi. 6Amah ah ka om gige chimi, amah om bang in a-om sam ding ahi.
7Deihtakte aw, thupiak thak na kiang uah ka gelh kei a; thupiak lui atung a kipan a na neih uh ka gelh zaw ahi. Huai thupiak lui na thu theihsa pen uh ahi. 8Himahleh thupiak thak gelh hi sam na veng, huai amah ah leh noumau ah alang hi, mial aman lellel ziak in leh vak taktak tua ahong vak tak ziak in.
9A-unau ho napi a, vak ah ka om chimi tutan in leng mial ah a-om gige hi. 10A-unau itmi bel vak ah a-om gige a, amah ah kipalpaihna ding san a-om kei hi. 11A-unau homi zaw mial ah a-om a, mial ah akhosa a, mial in amit atotsak ziak in apaina leng athei kei hi.
Khrist Theite Hinkhua
12Naute aw, ama min ziak a na khelhnate uh ngaihdam ahih tak ziak in na kiang uah ka gelh ahi. 13Pate aw, amah atung a kipan a om gige na theih ziak un na kiang uah ka gelh ahi. Tangvalte aw, Pathian thu noumau ah a-om gige a, giloupa na zoh tak ziak un na kiang uah ka gelh ahi. Naute aw, Pa na theih ziak un na kiang uah ka gelh ahi.
14Pate aw, amah atung a kipan a om gige na theih ziak un na kiang uah ka gelh ahi. Tangvalte aw, na hat ua Pathian thu noumau ah a-om gige a, migilou na zoh tak ziak un na kiang uah ka gelh ahi.
Khovel It Kei Un
15Khovel it kei unla, khovel a thil omte leng it sam kei un. Mi kuapeuh in khovel a-itleh Pa itna amah ah a-om kei hi. 16Khovel a thil om tengteng, taksa utnate, mit utnate, damsung thupina limte Pa a kipan ahi kei a, khovel a kipan ahi zaw hi. 17Khovel, a-utnate toh amangthang lellel ahi. Pathian deihlam hihmi bel tangtawn in a-om gige ding hi.
Khrist Doudalpa
18Naute aw, hun nanungpen hita e, Khrist doupa ahong pai ding chih na zak bang un tu in leng Khrist doumi tampitak ahong pawtta uhi; huaiziak in hun nanungpen ahita chih i thei uhi. 19Amaute i lak ua kipan in apawt ua, himahleh ei sung mi tak ahi kei uh; ei sung mi tak hi le uh i kiang uah a-om sam ding uhi; himahleh avek un ei sung mi tak ahi kei uh chih alatchetna ding in ahon pawtsanta uhi.
20Mi Siangthou kiang a kipan thaunilhna na tang ua, bangkim na thei uhi. 21Thutak na theih louh ziak ua ka gelh ahi kei a, na theih ziak uh leh thutak a zuau bangmah apawt ngei louh ziak in ka gelh ahi zaw hi.
22Jesu tuh Khrist ahi chih gingtaloumi sang a zuauthei kua a-om a? Khrist doumi tuh Pa leh Tapa gingtaloumi ahi. 23Kuapeuh Tapa nial in Pa anei kei a; kuapeuh Tapa gingta in bel Pa leng asang hi.
Thutak Nei Gige
24Nou zaw atung a kipan a na zak uh noumau ah omsak gige un. Huai atung a kipan a na zak uh noumau a a-om gigeleh noute ngei leng Tapa leh Pa ah na om gige ding uhi. 25Hiai ahi amah ngei in ahon chiam pen: tangtawn hinna.
26Noumau hon pimang tumte tungtang na kiang uah ka gelh ahi. 27Nou zaw amah kiang a kipan a thaunilhna na tan uh noumau ah a-om gige a, kuamah hilh na kiphamoh kei uhi; ama thaunilhna in thil tengteng ahon sinsak bang in leh hiai thudik hi a, zuau leng ahih louh ziak in huai in nou ahon sinsak bang in amah ah om gige un.
Pathian Tate Diktatna
28Huchi in naute aw, amah ah om gige un; amah ahong kilak chiang in ama ah zum lou in hangsantak in i om thei ding uhi. 29Amah midiktat ahi chih na theih uleh mi kuapeuh diktatna hihmi amah a suak ahi chih na thei uhi.
Currently Selected:
1 JOHAN 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
