KI KAM 28
28
Ha Malta
1Haba ngi la ïohlait sha shiliang ngi la tip ba ïa kata ka dewlynnong la khot ka Malta. 2Ki traishnong hangta ki la ïajuh paralok bha bad ngi. Ka la sdang slap bad ka la khriat bha, kumta ki la sliew ding bad ki la khot sngewbha ïa ngi baroh. 3U Paul u la lum shi song ki dieng shynraiñ bad u la kynton ïa ki ha ka ding haba u bseiñ u la mih shabar namar ka jingkhluit bad u la snoh skhem ïa lade ha ka kti jong u. 4Ki traishnong ki la ïohi ïa u bseiñ ba u sdien ha ka kti jong u Paul bad ki la ïa-ong para ma ki, “Une u briew u dei u nongpynïap briew, hynrei, ka kupar kan ym shah ïa u ban im, wat la u la lait im na ka duriaw.” 5Hynrei, u Paul u la kynther ïa uta u bseiñ shapoh ding khlem da mynsaw ei ei. 6Ki la ap khmih lynti ïa u ba un sa sieb lane ba un kyllon ïap kynsan. Hynrei, hadien ba ki la ïa-ap slem bad kim ïohi kano kano kaba kham pher kaba jia ha u, ki la kylla ïa la ki jingmut bad ki la ong, “U dei u blei!”
7Ym jngai na kata ka jaka la don ki lyngkha kiba dei ki jong u Publius, u rangbah synshar bahakhlieh duh jong kata ka dewlynnong. U la pdiang sngewbha ïa ngi bad lai sngi ngi la long ki nongshahkhot sngewbha jong u. 8U Kpa jong u Publius u la don ha jingthiah, ba u pang khieshoh bad suh-ot. U Paul u la rung shapoh ka kamra jong u, u la duwai, u la buh ïa la ki kti halor jong u, bad u la pynkhiah ïa u. 9Haba kane ka la jia, baroh kiwei pat ki briew kiba pang kiba don ha ka dewlynnong ki la ïawan, bad la pynkhiah ïa ki. 10Ki la ai ïa ngi shibun ki jingai sngewbha, bad haba ngi la kiew ha ka lieng, ki la buh ha ka ïa kiei kiei kiba ngi donkam na ka bynta ka jingleit.
Na Malta sha Rom
11Hadien lai bnai, ngi la leit noh da ka lieng na Aleksandria, ïa kaba la khot “Ki blei Kha Synrap,” kaba la rieh tlang ha kata ka dewlynnong. 12Ngi la poi ha ka nongbah Syrakos bad ngi la sah hangta lai sngi. 13Nangta ngi la nang leit bad ngi la poi ha ka nongbah Rhegiom. Ha ka sngi kaba bud ka lyer ka la sdang ban beh na shathie, bad ha ki ar sngi ngi la wan poi ha ka shnong Putioli. 14Ngi la shem katto katne ngut ki parabangeit hangta kiba la kyrpad ïa ngi ban sah bad ki shi taïew. Bad kumta ngi la ïawan sha Rom. 15Ki parabangeit ha Rom ki la ïohsngew shaphang jong ngi bad ki la ïawan shaduh ki shnong jong ka Ïew u Appios bad ha ki Lai Ïingbasa ban ïakynduh ïa ngi. Haba u Paul u la ïohi ïa ki, u la ainguh ïa U Blei bad la pynshlur shikatdei eh ïa u.
Ha Rom
16Haba ngi la poi ha Rom, ïa u Paul la shah ban shong marwei lem bad u shipai uba ap phira ïa u.
17Hadien lai sngi u Paul u la khot ïa ki nongïalam Jiw kiba hangta sha ka jingïalang. Haba ki la ïalumlang, u la ong ha ki, “Ko para Israel jong nga, wat la ngam shym la leh ïa kano kano pyrshah ïa ki briew jong ngi lane ïa ki dustur kiba ngi la ïohpateng na ki kpa tymmen jong ngi, la pynlong koidi ïa nga ha Jerusalem bad la aiti ïa nga ha ki nong Rom. 18Hadien ba la tohkit ïa nga, ki nong Rom ki la kwah ban pyllait ïa nga, namar ba ki la shem ba ngam shym la leh kano kano ïa kaba nga dei ban shah pynïap. 19#Ki Kam. 25:11Hynrei haba ki Jiw ki la pyrshah ïa kane, ngam banse ban apil sha u Patsha, wat la ngam don kano kano ka jingmudui pyrshah ïa la ki briew. 20Dei na kata ka daw nga la kyrpad ban ïakynduh ïa phi bad ban ïakren bad phi. Ha ka jingshisha, la khum kynjri ïa nga kumne na ka bynta jong uta ïa uba ki paid Israel ki kyrmen.”
21Ki la ong ha u, “Ngim shym la ïoh shithi ei ei na Judia shaphang jong me, lane ym shym don uno uno na ki briew jong ngi uba la wan nangta lem bad kano kano ka khubor lane ban ong kaei kaei kaba sniew shaphang jong me. 22Hynrei ngi kwah ban ïohsngew ïa ki jingpyrkhat jong me, namar ngi tip ba kylleng sawdong ki briew ki kren pyrshah ïa kane ka kynhun ha kaba me, me don.”
23Kumta ki la buh sngi bad u Paul, bad kham bun na ki, ki la ïawan ha kata ka sngi ha ka jaka ha kaba u Paul u la sah. Naduh mynstep haduh da miet u la batai ha ki ïa ka khubor jong u shaphang ka Hima U Blei, bad u la pyrshang ban pynngeit ïa ki shaphang U Jisu da kaba sot na ka Hukum u Moses bad na ki jingthoh jong ki nongïathuhlypa. 24Ki ktien jong u ki la pynhun ïa ki katto katne ngut na ki, hynrei kiwei pat kim shym ngeit. 25Kumta ki la leit noh, da ka jingbymïasngewthuh jingmut para ma ki, hadien ba u Paul u la lah ong ïa kane kawei: “Katno kaba dei ba U Mynsiem Bakhuid u la kren ha ki kpa tymmen jong ngi lyngba u Isaïah u nongïathuhlypa! 26#Isa. 6:9,10Naba u la ong,
“ ‘Khie leit bad ong ha kine ki briew:
Phin shahshkor bad ïai shahshkor,
hynrei phin ym shemphang;
phin khmih bad ïai khmih, hynrei phin ym ïohi,
27namar ka jingpyrkhat jong kine ki briew ka bthi,
bad ki la set kyllut ïa la ki shkor
bad khapbrip ïa ki khmat jong ki.
Lym kumta, ki khmat jong ki kin lah ban ïohi,
ki shkor jong ki, kin ïohsngew,
ki jingmut jingpyrkhat jong ki kin shemphang,
bad kin phai sha nga, ong U Blei,
bad ngan pynkhiah ïa ki.’ ”
28Bad u Paul u la pynkut: “Phi dei ban tip, te, ba ïa ka khubor jong U Blei shaphang ka jingpynim la phah sha ki Jentil. Kin shahshkor!” 29Hadien ba u Paul u la kren ïa kane, kita ki Jiw ki la leit noh, ki da ïasaidnia tyngeh para ma ki.
30Haduh ar snem u Paul u la shong ha ka jaka kaba u la wai na ka bynta ïa lade, bad hangta u la pdiang sngewbha ïa baroh kiba ïawan jngoh ïa u. 31U la ïalap shaphang ka Hima U Blei bad u la hikai shaphang U Jisu Khrist uba U Trai, da kaba kren ha ka jingshlur bad ha ka jinglaitluid baroh.
Currently Selected:
KI KAM 28: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
