ROM Ka Jinglamphrang
Ka Jinglamphrang
Ïa Ka Shithi U Paul Sha Ki Nong Rom la thoh ban pynkhreh lynti ïa ka jingthmu u Paul ban leit khmih ïa ka Balang ha Rom. Ka jingthmu jong u ka long ban trei hapdeng ki Khristan kiba don hangta katto katne por bad nangta, da ka jingkyrshan jong ki, ban leit sha Spain. U la thoh ban batai ïa ka jingsngewthuh jong u ïa ka jingngeit Khristan bad ka jingpyntreikam ïa ka na ka bynta ka jingim Khristan. Ka shithi ka don ha ka ïa ka jingïathuh ba-dap pura shaphang ka khubor jong u Paul.
Hadien ba u la ai khublei ïa kiba ha ka balang ha Rom bad ïathuh ïa ki ïa ka jingduwai jong u na ka bynta jong ki, u Paul u ïathuh ïa ka phangpdeng jong ka shithi: “Naba ka Gospel ka pynpaw kumno U Blei u pynlong ïa ki briew ban don ka jingïadei kaba beit bad U hi: ka long lyngba ka jingngeit naduh kaba sdang haduh kaba kut” (1:17). Nangta u Paul u thoh kham shai shuh ïa kane ka phangpdeng. Baroh ki jaitbynriew, ki Jiw bad ki Jentil, ki donkam ban don ka jinglonghok bad U Blei, naba baroh ki don hapoh ka bor jong ka pop. Ka jinglonghok ki briew bad U Blei ka long lyngba ka jingngeit ha U Jisu Khrist. Nangta u Paul u batai ïa ka jingim bathymmai ha U Khrist kaba mih na kane ka jingïadei bathymmai bad U Blei. Uba ngeit u don ka jingïasuk bad U Blei bad ïa u la pyllait da U Mynsiem jong U Blei na ka bor jong ka pop bad ka jingïap. Ha ki lynnong 5-8, u Paul u batai ruh ïa ka jingthmu jong ka Hukum U Blei bad ka bor jong U Mynsiem U Blei ha ka jingim jong uba ngeit. Nangta u apostol u ïaleh shitom ban pynshai ïa ka jingkylli kumno ki Jiw bad ki Jentil ki don ka jingïadei bad ka jingthmu U Blei ïa ki jaitbynriew. U pynkut ba ka jingkyntait jong ki Jiw ïa U Jisu ka long ka bynta jong ka jingthmu U Blei ban wallam ïa baroh ki jaitbynriew hapoh ka jylli jong ka jingaiei jong U Blei da U Jisu Khrist, bad u ngeit ba ki Jiw kin ym kyntait sah ïa U Jisu. Khatduh u Paul u thoh shaphang kumno ban im ka jingim Khristan, khamtam shaphang ka lynti jong ka jingieit ha ka jingïadei bad kiwei pat. U thoh kiwei pat ki phangpdeng kum ka jingshakri ïa U Blei, ka kamram ki Khristan ha ka jingïadei bad ka hima sima bad ka imlang sahlang, bad ki jingkylli shaphang ka jingïatiplem. U pynkut ïa ka shithi da ki khubor bashimet bad ki ktien ïaroh ïa U Blei.
Ki Jingkdew
Ka jinglamphrang bad ka phangpdeng 1:1-17
Ka jingdonkam u briew ïa ka jingpynim 1:18—3:20
Ka lynti jong ka jingpynim U Blei 3:21—4:25
Ka jingim bathymmai ha U Khrist 5:1—8:39
Ki Israel ha ka jingthmu U Blei 9:1—11:36
Ka rukom jinglong Khristan 12:1—15:13
Ka jingpynkut bad ki jingkhublei shimet 15:14—16:27
Currently Selected:
ROM Ka Jinglamphrang: KHACLBSI
Highlight
Copy
Compare
Share
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.