KI KAM 27
27
U Paul u leit da ka lieng sha Rom
1Ynda la ïakut ba ngi dei ban leit da ka lieng sha Italy, ki la aiti ïa u Paul bad katto katne ngut kiwei pat ki koidi ha u Julius, u rangbah pynïaidkam ha ka pyrton shipai ka Hima Rom kaba la khot “Ka Pyrton shipai jong u Patsha.” 2Ngi la kiew da ka lieng na Adramyttion kaba la khreh ban leit sha ki kadlieng jong ka probins#27:2 probins: Kane ka dei ba shu bud beit ïa ka kyntien Province ha ka jingspeldak Khasi. jong ka Asia, bad ngi la leit. U Aristarkhos, u nong Makedonia uba na Thessaloni, u la don lem bad ngi. 3Ha ka sngi kaba bud ngi la poi ha Sidon. U Julius u la lehsbun ïa u Paul bad u la shah ïa u ban leit bad ïakynduh ïa la ki paralok, ba kin ai kat kaba u donkam. 4Ngi la nang leit nangta, bad namar ba ka lyer ka beh pyrshah ïa ngi, ngi la ïaid sha ka liang ba kah lyer jong ka dewlynnong Sypros. 5Ngi la jam ïa ka duriaw da kaba ïaid lait ïa ka Kilikia bad Pamphylia, bad ngi la poi sha Mura, ha Lukia. 6Hangta u rangbah pynïaidkam u la shem ïa ka lieng na Aleksandria kaba thmu ban leit sha Italy, kumta u la kyntiew ïa ngi ha ka.
7Ngi la ïaid suki bun sngi, bad da ka jingeh bakhraw, khatduh ngi la poi harud jong ka shnong Knidos. Ka lyer kam ailad shuh ïa ngi ban ïaid sha khmat ha kata ka liang, kumta ngi la ïaid arsut na ka liang kaba kah lyer jong ka Krit, da kaba ïaid najan ka Salmone. 8Ngi la leit marsyndah jong ka rud duriaw, bad da ka jingeh bakhraw ngi la poi sha ka jaka ba la khot, Ka Jakarieh Lieng Bashngain, ka bym da jngai na ka shnong Lasaïa.
9Ngi la pynlut kham bun ka por hangta, tad ynda ka la long kaba ma ban bteng ïa ka jingleit da ka lieng, naba mynta ka Sngi ka Jingsiewspah ka la dep. Kumta u Paul u la ai ïa kane ka jingai jingmut ha ki: 10“Ko rangbah, nga ïohi ba ka jingleit jong ngi da ka lieng nangne sha khmat kan long kaba ma; kan don ka jingjulor bakhraw ïa ka jingkit bad ïa ka lieng, bad ka jingduh ruh ïa ka jingim.” 11Hynrei uta u rangbah shipai u la kham kohnguh ïa kaei kaba u kapten bad ïa u trai lieng, bad ym ïa kaei kaba u Paul u ong. 12Ka kadlieng kam da long kaba bha ban rieh tlang; kumta kiba bun ki briew ki la kham mon ban pynmih noh ïa ka sha ka duriaw bad ban pyrshang ban poi ha Phoiniki, lada long kaba lah, khnang ban rieh tlang hangta. Ka Phoiniki ka long ka kadlieng ha Krit kaba phai pyrshah shaphang shathie lam sepngi bad shatei lam sepngi.
Ka 'erïong ha Duriaw
13Ka lyer kaba jai jai na shathie ka la sdang ban beh, bad ki rangbah ki la pyrkhat ba ki lah ban pyndep ïa ka jingthmu jong ki, kumta ki la ïaring noh ïa u angkor bad ki la king kham jan katba lah marsyndah jong ka rud duriaw jong ka Krit. 14Hynrei shen ka lyer kaba jur — kata kaba la khot ka lyer “Shatei-lam-mihngi” — ka la beh na ka dewlynnong. 15Ka la lynshop ïa ka lieng, bad namar ka long ka bym lah ban king ïa ka lieng sha khmat pyrshah ïa ka lyer, ngi la sangeh ban pyrshang bad ngi la shah ïa ka ban shah kit katba shaba beh ka lyer. 16Ngi la ïoh katto katne ka jakarieh lieng haba ngi la ïaid shaphang shathie jong ka dewlynnong kaba rit jong ka Kauda. Hangta da kaba eh, ngi la lah ban pynskhem ïa ka lieng rit. 17Ki la kyntiew ïa ka, bad ki la teh katto katne ki tyllai sawdong ïa ka lieng. Ki la sheptieng ïoh ba ki lah ban tyngkhuh sha ka jaka kaba don shyiap jngai na ka rud duriaw jong ka Libya, kumta ki la pynhiar ïa ki jaiñ pynshah lyer bad ki la shah ïa ka lieng ban shah kit da ka lyer. 18Ka 'erïong kaba jur ka la neh, kumta ha ka sngi kaba bud, ki la sdang ban bret noh katto katne ki jingkit kiba don ha ka lieng, 19bad ha ka sngi kaba bud, ki la bret noh katto katne ki bynta jong ki tiar ki tar jong ka lieng. 20Bun sngi ngim shym lah ban ïohi ïa ka sngi lane ïa ki khlur, bad ka lyer ka la nang beh jur. Ha kaba khatduh ngi la duh jingkyrmen ïa ka ban lait im.
21Hadien ba kito kiba don ha ka lieng ki la don kham slem khlem bam, u Paul u la ïeng ha khmat jong ki bad u la ong, “Ko rangbah, phi la dei ban shahshkor ïa nga bad ban ym leit noh na Krit; te ngin jin da la lah kiar ïa kane ka jingjulor bad ka jingduh. 22Hynrei mynta nga kyrpad ïa phi, to long shlur! Ym don uwei ruh na phi u ban duh ïa la ka jingim, hynrei yn duh tang ka lieng. 23Namar mynhynne ka miet u angel jong U Blei ha uba nga long bad ïa uba nga mane u la wan sha nga bad u la ong, 24‘Wat sheptieng, ko Paul! Me dei ban ïeng ha khmat u Patsha. Bad U Blei ha ka jingbha jong u ïa me u la pynsah ïa ka jingim jong kito baroh kiba ïaleit da ka lieng bad me.’ 25Kumta, ko ki rangbah, to sngew shlur! Naba nga shaniah ha U Blei ba kan long thik kumba la ïathuh ha nga. 26Hynrei yn sa ïalam ïa ngi sha rud duriaw ha kawei ka dewlynnong.”
27Ka la long ka miet kaba khatsaw, bad ngi la shah ïalam kylleng ha ka duriaw Mediterranian da ka 'erïong. Kumba shiteng synñia ki maji ki la antad ba ngi la jan poi hajan ka ryngkew. 28Kumta ki la pynhiar ïa u tyllai lem bad u sisa ba la teh ha u, bad ki la shem ba ka um ka don kumba sawphew mitar ka jingjylliew; kham katto katne hadien ki la leh kumjuh bad ki la shem ba ka don laiphew mitar ka jingjylliew. 29Ki la sheptieng ïoh ba ka lieng kan leit sha ki mawsiang, kumta ki la pynhiar saw tylli ki angkor na shadien jong ka lieng bad ki la duwai ïa ka jingshai ka sngi. 30Nangta ki maji ki la pyrshang ban phet na ka lieng; ki la pynhiar ïa ka lieng rit sha ka duriaw bad ki la leh mynleh kumba ki mut ban buh sa katto katne ki angkor ha ka bynta ba sha khmat jong ka lieng. 31Hynrei u Paul u la ong ha u rangbah shipai bad ha ki shipai, “Lada ki maji kim don ha ka lieng, phim don jingkyrmen shuh ban lait im.” 32Kumta ki shipai ki la ot noh ïa ki tyllai kiba bat ïa ka lieng rit bad ki la pyllait ïa ka.
33Ha shuwa ban kynjat shai, u Paul u la kyrpad ïa ki baroh ban bam khyndiat ka jingbam: “Phi la ïa-ap la khatsaw sngi mynta, bad ha kane ka por baroh phim shym la bam ei ei. 34Nga kyrpad ïa phi, te, to bam khyndiat ka jingbam; phi donkam ïa ka khnang ban im. Wat iwei i shñiuh na ka khlieh jong phi in ym hap noh.” 35Ynda u la ong ïa kane, u Paul u la shim katto katne u kpu, u la ainguh ïa U Blei ha khmat jong ki baroh, u la kdiah ïa u, bad u la sdang ban bam. 36Ki la sngew ïoh mynsiem bad uwei uwei na ki ruh, ki la bam khyndiat ka jingbam. 37Ngi la ïadon baroh arspah hynñiewphew hynriew ngut ha ka lieng. 38Hadien ba uwei uwei baroh u la bam kdang, ki la pynsting ïa ka lieng da kaba bret noh ïa u kew baroh sha ka duriaw.
Ka jingpaitlieng
39Haba ka sngi ka la mih, ki maji kim shym ithuh ïa ka rud duriaw, hynrei ki la ïohi ïa ka kdong um lem bad ka rud duriaw shyiap bad ki la rai ba, lada long kaba lah, kin pynsangeh ïa ka lieng hangta. 40Kumta ki la ot noh ïa ki angkor bad ki la shah ïa ki ba kin ngam ha ka duriaw, bad ha kajuh ka por ki la pynkylluid ïa ki tyllai kiba la bat ïa ki boitha. Nangta ki la kyntiew ïa ka jaiñ pynshah lyer ha ka bynta ba sha khmat jong ka lieng khnang ba ka lyer ka lah ban beh ïa ka lieng sha khmat, bad ngi la ïaid beit sha ka ryngkew. 41Hynrei ka lieng ka la tyngkhuh ïa ka jaka shyiap bad ka la sangeh; ka bynta ba sha khmat jong ka lieng ka la sahkut bad kam lah ban khih, katba ka bynta ba shadien ka la shah pynpait lyngkhot lyngkhai ha ki jingat phyllung bashyrkhei.
42Ki shipai ki la thmu ban pynïap ïa ki koidi baroh, khnang ban da ïa ki na kaba jngi sha rud duriaw bad ban lait phet. 43Hynrei u rangbah shipai u la kwah ban pyllait im ïa u Paul, kumta u la khang ïa ki na kaba leh ïa kane. Pynban, u la hukum ïa kito kiba lah ban jngi ban ryngkoh nyngkong bad ban jngi sha ryngkew; 44bad kiba sah kin bud nadien, da kaba snoh ha ki lyntang lane ha kino kino ki lyngkhot kiba la pait jong ka lieng. Bad kane ka la long kumno ngi baroh ngi la lait im sha ryngkew.
Currently Selected:
KI KAM 27: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
