KI KAM 26
26
U Paul u ïasaid da ïa lade ha khmat u Agrippa
1U Agrippa u la ong ha u Paul, “La shah ïa me ban kren na ka bynta ïa lade.” U Paul u la kner ïa la ka kti bad u la ïasaid da ïa lade kumne:
2“Ko syiem Agrippa! Nga ñiew ïa lade uba donbok ba ha kane ka sngi nga dei ban ïasaid da ïa lade ha khmat jong phi na baroh kita kiei kiei kiba ki Jiw ki mudui ïa nga, 3khamtam naduh kaba phi tip bha ïa ki dustur bad ïa ki jingïakajia baroh jong ki Jiw. Nga kyrpad ïa phi, te, ban shahshkor ïa nga da ka jingïaishah.
4“Baroh ki Jiw ki tip kumno nga la im naduh ba nga dang samla. Ki tip kumno nga la pynlut ïa la ka jingim, nyngkong ha la ka shnong bad nangta ha Jerusalem. 5#Ki Kam. 23:6; Php. 3:5Ki la tip borabor, lada ki mon ban phla, ba naduh kaba nyngkong nga la im kum u dkhot jong ka seng kaba pyrkhing tam jong ka niam jong ngi, ki Pharisi. 6Bad mynta nga ïeng hangne ba yn bishar namar ka jingkyrmen kaba nga don ha ka jingkular kaba U Blei u la pynlong bad ki kpa tymmen jong ngi — 7ïa kata hi kaba ki khat-ar jait jong ki briew jong ngi ki kyrmen ban ïohpdiang, haba ki mane ïa U Blei mynsngi bad mynmiet. Bad ka dei namar jong kane ka jingkyrmen, ko Syiem Kynrad, ba nga la shah mudui da ki Jiw! 8Balei ma phi kiba don hangne phi shem ba ka long ka bym lah ban ngeit ba U Blei u pynmihpat ïa kiba ïap?
9 #
Ki Kam. 8:3; 22:4,5 “Nga hi nga la pyrkhat ba nga dei ban leh ïa kaei kaei baroh kaba nga lah pyrshah ïa ka jingthmu U Jisu uba na Nasareth. 10Kata ka long kaei kaba nga la leh ha Jerusalem. Nga la ïohpdiang ka bor na ki rangbah lyngdoh bad ban thep phatok ïa kiba bun ki briew jong U Blei; bad haba la rai pynïap ïa ki, nga ruh nga la mynjur pyrshah ïa ki. 11Bunsien nga la phah pynshitom ïa ki ha ki synagog baroh bad pyrshang ban pynlong ïa ki ban len ïa la ka jingngeit. Nga la bitar haduh katta katta ïa ki ba nga da leit sha ki nongbah nongwei ban pynshitom beiñ ïa ki.
U Paul u ïathuh ïa ka jingpynkylla ïa u
(Ki Kam. 9:1-19; 22:6-16)
12“Ka dei namar kane ka jingthmu ba nga la leit sha Damaskos da ka bor bad ka hukum na ki rangbah lyngdoh. 13Ka dei ha ka lynti ha ka por shiteng sngi, ko Syiem Kynrad, ba nga la ïohi ïa ka jingshai kaba kham phyrnai ban ïa ka sngi, kaba wan na sahit bneng bad kaba tyngshaiñ baroh sawdong ïa nga bad ïa ki rangbah kiba la ïaleit lang bad nga. 14Ngi baroh ngi la hap sha madan, bad nga la ïohsngew ïa ka sur kaba kren ha nga ha ka ktien Hebru, ‘Saul, Saul! balei me pynshitom beiñ ïa nga? Me pynmong ïa lade da kaba ïaleh pyrshah, kumba u masi dab u kynjat pyrshah ïa u dieng jong u kynrad jong u.’ 15‘Me dei uei, A Trai?’ nga la kylli. Bad U Trai u la jubab, ‘Nga long U Jisu, ïa uba me pynshitom beiñ. 16Hynrei khie joit bad ïeng. Nga la paw ha me ban thung ïa me kum u shakri jong nga. Me dei ban ïathuh ïa kiwei pat ïa kaba me la ïohi ïa nga ha kane ka sngi, bad ïa kaei kaba ngan pyn-i ha me ha ka ban sa wan. 17Ngan pyllait ïa me na ki paid Israel bad na ki Jentil sha kiba ngan phah ïa me. 18Me dei ban pynpeit ïa ki khmat jong ki bad pynphai ïa ki na ka jingdum sha ka jingshai, bad na ka bor jong u Soitan sha U Blei, khnang ba da ka jingngeit jong ki ha nga kin ïoh ka jingmap noh ïa ki pop jong ki bad ïohpdiang ïa la ka jaka hapdeng ki briew kiba la jied jong U Blei.’
U Paul u ïathuh shaphang ka jingtrei jong u
19“Bad kumta, ko syiem Agrippa, ngam shym la long u bymkohnguh ïa ka jingïohipaw kaba nga la ïoh na bneng. 20#Ki Kam. 9:20,28,29Nyngkong ha Damaskos bad ha Jerusalem bad nangta ha ka Judia baroh bad hapdeng ki Jentil, nga la ïalap ba ki dei ban kylla-kaba-mut na ki pop jong ki bad ban phai sha U Blei bad leh ïa kiei kiei ki ban pynpaw ba ki la kylla-kaba-mut. 21Dei na kane ka daw ba ki Jiw ki la kem ïa nga katba nga dang don hapoh ka Templ, bad ki la pyrshang ban pynïap ïa nga. 22Hynrei haduh kane ka sngi, la ïarap ïa nga da U Blei, bad kumta nga ïeng hangne ban ai ïa ka jingsakhi jong nga ha baroh, ha uba rit bad ha uba khraw kumjuh. Kaei kaba nga ong ka long kajuh hi kaba ki nongïathuhlypa bad u Moses ki la ong ba kan sa jia: 23#1 Kor. 15:20; Isa. 42:6; 49:6ba U Messaïah u dei ban shahshitom bad ban long uba nyngkong ban mihpat na ka jingïap, ban pynbna ïa ka jingshai jong ka jingpynim ha ki Jiw bad ha ki Jentil.”
24Katba u Paul u dang ïasaid da ïa lade ha kane ka rukom, u Phestos u la pyrta ha u, “Me la lamwir, ko Paul! Ka jingstad bakhraw jong me ka la pynlamwir ïa me!”
25U Paul u la jubab, “Ngam shym lamwir, ko Kynrad badonburom! Nga kren ïa ka jingshisha ha ka jingtipbriew. 26Ko syiem Agrippa! Nga lah ban kren ha me da ka jingshlur, namar ba me tip ïa kine kiei kiei. Nga sngewskhem ba me la bat bha ïa kawei pa kawei na ki, naba kane kaei kaei kam shym jia ha kaba rieh ha kyndong. 27Ko syiem Agrippa, hato me ngeit ïa ki nongïathuhlypa? Nga tip ba me ngeit!”
28U Agrippa u la ong ha u Paul, “Ha kane ka por balyngkot, hato me pyrkhat ba men pynlong Khristan ïa nga?”
29“La ka long ha ka por balyngkot lane ha ka por bajlan,” u Paul u la jubab, “ka jingduwai jong nga ha U Blei ka long ba ma me bad baroh kiwei pat kiba sngap ïa nga ha kane ka sngi ki lah ban long kum ma nga — lait noh, da shisha, ïa kine ki kynjri!”
30Nangta u syiem, u lyngskor, bad ka Berniki, bad baroh kiwei pat ki la ïeng joit, 31bad hadien ba ki la mihnoh, ki la ïakren para ma ki, “Une u briew um shym leh kaei kaei kaba u dei ban ïap ne ban shah set phatok.” 32Bad u Agrippa u la ong ha u Phestos, “Ïa une u briew la dei ban pyllait noh lymda u la lah apil sha u Patsha.”
Currently Selected:
KI KAM 26: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
