KI KAM 25
25
U Paul u apil sha u Patsha
1Lai sngi hadien ba u Phestos u la poi ha ka probins#25:1 probins: Kane ka dei ba shu bud beit ïa ka kyntien Province ha ka jingspeldak Khasi., u la leit na Kaisaria, sha Jerusalem, 2ha kaba ki rangbah lyngdoh bad ki nongïalam jong ki Jiw ki la wallam ki jingmudui pyrshah ïa u Paul. 3Ki la kyrpad ïa u Phestos ban leh ei ei na ka bynta jong ki da kaba wallam ïa u Paul sha Jerusalem, naba ki la lah pynlong ka jingïasylla ban pynïap ïa u ha lynti. 4U Phestos u la jubab, “Ïa u Paul la set kum u koidi ha Kaisaria, bad nga hi ngan sa leit pat shen shata. 5Ai ba ki nongïalam jong phi kin leit sha Kaisaria lem bad nga bad mudui ïa uta u briew lada u leh ïa kano kano ka bymdei.”
6U Phestos u la sah sa phra ne shiphew sngi lem bad ki bad nangta u la leit sha Kaisaria. Ha ka sngi kaba bud u la shong ha ka kamra bishar bad u la hukum ban wallam shapoh ïa u Paul. 7Haba u Paul u la wan, ki Jiw kiba la wan na Jerusalem ki la ïeng sawdong ïa u bad ki la sdang ban buh shibun ki jingmudui kiba khia pyrshah ïa u, ïa kiba kim lah ban pynshisha. 8Hynrei u Paul u la ïasaid da ïa lade: “Ngam shym leh ei ei kano kano kaba bakla pyrshah ïa ka Hukum ki Jiw, lane pyrshah ïa ka Templ, lane pyrshah ïa u Patsha ka Hima Rom.”
9Hynrei u Phestos u la kwah ban ïoh ïa ka jingsngewbha bad ki Jiw, kumta u la kylli ïa u Paul, “Hato me mon ban leit sha Jerusalem ba yn bishar halor kine ki jingmudui ha khmat jong nga hangta?”
10U Paul u la ong, “Nga ïeng ha khmat ka kamra bishar ka jong u Patsha hi, ha kaba ka dei ban bishar ïa nga. Ngam shym leh kano kano kaba bakla ïa ki Jiw, kumba me hi me tip bha. 11Lada nga la pynkheiñ ïa ka hukum bad leh ïa kaei kaei kaba ka dei ïa nga ban shah pynrem da ka jingïap, ngam kyrpad ban lait na ka. Hynrei lada ym don ka jingshisha ha ki jingmudui ïa kiba ki wallam pyrshah ïa nga, ym don uno uno uba lah ban aiti ïa nga sha ki. Nga apil sha u Patsha.”
12Nangta u Phestos, hadien ba u la ïakren bad ki nongai jingmut jong u, u la jubab, “Me la apil sha u Patsha, kumta sha u Patsha men leit.”
U Paul ha khmat u Agrippa bad ka Berniki
13Hadien katto katne por u syiem Agrippa bad ka Berniki ki la wan sha Kaisaria bad ki la leit pdiang sngewbha ïa u Phestos. 14Hadien ba ki la don hangta bun sngi, u Phestos u la batai ïa ka jinglong jingman jong u Paul ha u syiem. “Don u briew hangne ïa uba la ieh koidi da u Pheliks; 15bad haba nga la leit sha Jerusalem, ki rangbah lyngdoh jong ki Jiw lem bad ki tymmen ki san ki la wanrah ïa ki jingmudui pyrshah ïa u bad ki la kyrpad ïa nga ban rai pynrem ïa u. 16Hynrei nga la ïathuh ïa ki ba ma ngi ki nong Rom ngim ju mlien ban aiti ïa uno uno uba la shah kynnoh ha ka kam runar ha shuwa ba un ïakynduh ïa ki nongmudui jong u markhmat bad ba u la ïoh ka lad ban ïasaid da ïa lade pyrshah ïa ka jingkynnoh. 17Haba ki la wan hangne, te, ngam shym la pyntud ei ei, hynrei ha ka sngi kaba bud nga la shong ha ka ïingbishar bad nga la hukum ban wallam shapoh ïa uta u briew. 18Ki nongïaleh pyrshah ïa u ki la ïeng, hynrei kim shym mudui ïa u ïa kano kano na ki kam runar kiba nga la pyrkhat ba kin leh. 19Baroh kaba ki don ka long katto katne ki jingïania shaphang ka niam jong ki bad shaphang u briew uba kyrteng U Jisu, uba la ïap; hynrei u Paul u kam ba u dang im. 20Ngam sngewlah ban rai kumno ngan lah ban ïoh jingtip halor kine kiei kiei, kumta nga la kylli ïa u Paul lada u mon ban leit sha Jerusalem bad ba yn shah bishar hangta halor kine ki jingkynnoh. 21Hynrei u Paul u la apil; u la kyrpad ba yn buh ïa u hapoh u nongap phira bad ban shah ba u Patsha un rai ïa ka kam jong u. Kumta nga la ai ki hukum ban buh ïa u hapoh ka jingap phira tad haduh ba nga lah ban phah ïa u sha u Patsha.”
22U Agrippa u la ong ha u Phestos, “Nga kwah ban ïohsngew ïa une u briew da lade hi.”
“Phin ïohsngew ïa u lashai ka sngi,” u Phestos u la jubab.
23Ha ka sngi kaba bud u Agrippa bad ka Berniki ki la wan ha ka jingpynpaw burom kaba khraw bad ha ka jinglehkmen bad ki la rung sha ka kamra bishar lem bad ki rangbah shipai bad ki rangbah pawkhmat jong ka nongbah. U Phestos u la ai ka hukum, bad ïa u Paul la wallam shapoh. 24U Phestos u la ong, “Ko syiem Agrippa bad baroh kiba don hangne bad ngi: Phi ïohi ïa une u briew ïa uba ki Jiw baroh, kiba hangne bad ha Jerusalem, ki la wallam ki jingujor sha nga. Ki pyrta ba um dei shuh ban im. 25Hynrei ngam shem ba u la leh kaei kaei kaba u dei ban shah rai pynïap. Bad namar ba ma u hi u la lah apil sha u Patsha, nga la rai ban phah ïa u sha u. 26Hynrei ngam don kano kano kaba dei thik shaphang jong u ban thoh sha u Patsha. Kumta nga la wallam ïa u hangne ha khmat jong phi — bad kyrpang ha khmat jong phi, ko syiem Agrippa! — khnang ba, hadien ka jingtohkit ïa ka kam jong u, nga lah ban don ei ei ban thoh. 27Namar kam i shongnia ha nga ban phah ïa u koidi khlem da kdew shai ïa ki jingmudui pyrshah ïa u.”
Currently Selected:
KI KAM 25: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
