KI KAM 24
24
La mudui ïa u Paul da ki Jiw
1Hadien san sngi, u Ananias, u Rangbah Lyngdoh u la leit sha Kaisaria lem bad katto katne ngut ki tymmen ki san bad uwei u riewsaid aiñ uba kyrteng u Tertullos. Ki la wan ha khmat jong u Pheliks bad ki la ai ïa ki jingmudui jong ki pyrshah ïa u Paul. 2Nangta la khot shapoh ïa u Paul, bad u Tertullos u la sdang ban ai ïa ka jingmudui jong u ïa u Paul kumne harum:
“Pheliks Badonburom! Ka jingïalam bastad jong me ka la wanrah ha ngi ïa ka por shongsuk kaba kham slem, bad ïa shibun ki jingpynbeit thymmai kiba donkam la thaw na ka bynta ka jingbha jong ka ri jong ngi. 3Ngi pdiang sngewbha ïa kane ha kylleng kylleng bad ha ki por baroh, bad ngi da sngewnguh eh ïa me. 4Pynban, ngam kwah ban shim shibun ïa ka por jong me, kumta nga kyrpad ïa me ban sngewbha ban shahshkor ïa ka jingïathuh lyngkot jong ngi. 5Ngi la shem ïa une u briew ba u long ka jingpynwit kaba shyrkhei; u sdang ïa ka jingkhihwin hapdeng ki Jiw ha kylleng jong ka pyrthei bad u long u nongïalam jong ka kynhun kaba na Nasareth. 6U la pyrshang wat ban pyntngit ïa ka Templ, bad ngi la kem ïa u. Ngi la kwah ban bishar ïa u kat kum ka hukum jong ngi. 7Hynrei u Lusias, u rangbah shipai u la tuklar bad u la knieh jubor ïa u na ngi. 8Nangta u Lusias u la ai hukum ba ki nongmudui pyrshah ïa u Paul kin wan ha khmat jong me. Lada me kylli ïa une u briew, me hi me lah ban tip na u ïa kiei kiei baroh kiba ngi mudui ïa u.” 9Ki Jiw ki la kyrshan ïa kane ka jingmudui bad ki la ong ba kane baroh ka long kaba shisha.
Ka jingïasaid da jong u Paul ha khmat u Pheliks
10Te u lyngskor u la ai dak ïa u Paul ban kren, u Paul u la ong,
“Nga tip ba me la long u nongbishar halor kane ka jaitbynriew la bun snem, bad kumta da kaba sngewbha nga ïasaid da ïa lade ha khmat jong me. 11Kumba me lah ban shem hi da lade, ym pat palat khat-ar sngi ba nga la leit sha Jerusalem ban mane. 12Ki Jiw kim shym lap ïa nga ba nga ïasaidnia badno badno hapoh ka Templ, lymne ba ki shem ïa nga ba nga pynkhih ïa u paidbah, la ka long ha ki synagog ne hangno hangno hawei pat hapoh ka nongbah. 13Lymne ba ki lah ban ai ki jingpynshisha jong ki jingkynnoh jong ki kaba ki wallam mynta pyrshah ïa nga. 14Nga phla ïa kane ha me: Nga mane ïa U Blei jong ki kpa tymmen jong ngi da kaba bud ïa kata ka Lynti ïa kaba ki ong ba ka long kaba bakla. Hynrei nga ruh nga ngeit ïa kiei kiei baroh ïa kiba la thoh ha ka Hukum u Moses bad ha ki kitab jong ki nongïathuhlypa. 15Nga don kajuh ka jingkyrmen ha U Blei kaba kine hi ki don, kata, ba ki briew baroh, kiba bha bad kiba sniew, kin mihpat na ka jingïap. 16Bad kumta nga ïaleh katba lah ban ïoh ka jingïatiplem kaba khuid kdar ha khmat jong U Blei bad ki briew.
17 #
Ki Kam. 21:17-28
“Hadien ba nga la don bun snem shabar na Jerusalem, nga la leit shata ban rah katto katne ka pisa sha ki briew jong nga bad ban ai ki jingkñia. 18Ka la long mynba nga dang leh ïa kane, ba ki la lap ïa nga hapoh ka Templ hadien ba nga la pyndep ïa ka jinglehniam ka jingpynkhuid. Ym shym don u paidbah bad nga bad kam shym don ka jingkulmar. 19Hynrei katto katne ngut ki Jiw na ka probins#24:19 probins: Kane ka dei ba shu bud beit ïa ka kyntien Province ha ka jingspeldak Khasi. jong ka Asia ki la don hangta; ki hi ki dei ban wan ha khmat jong me bad buh ïa ki jingmudui jong ki lada ki don ei ei pyrshah ïa nga. 20Lane shah ïa kine kiba don hangne ban ïathuh kaei ka kam runar kaba ki la shem ba nga shah pynrem haba nga la ïeng ha khmat ka Dorbar — 21#Ki Kam. 23:6lait tang kawei kaba nga la pyrta jam haba nga ïeng ha khmat jong ki: ‘Ïa nga la bishar da ma phi ha kane ka sngi naba nga ngeit ba kiba ïap kin sa mihpat.’ ”
22Nangta u Pheliks, uba la ïoh jingtip bha shaphang ka Lynti, u la pynsangeh shuwa ïa ka jingbishar. “Haba u Lusias, u rangbah ai hukum u poi,” u la ong ha ki, “ngan sa rai ïa ka kam jong phi.” 23U la hukum ïa u rangbah pynïaidkam uba khmih ïa u Paul ban buh ïa u hapoh ka jingap phira, hynrei ban ai ha u katto katne ka jinglaitluid bad ban shah ïa ki paralok jong u ban pynbiang ïa ki jingdonkam jong u.
U Paul ha khmat u Pheliks bad ka Drusilla
24Hadien khyndiat sngi, u Pheliks u la wan lem bad ka tnga jong u, ka Drusilla, kaba long ka Jiw. U la phah khot ïa u Paul bad u la shahshkor ïa u katba u nang kren shaphang ka jingngeit ha U Khrist Jisu. 25Hynrei katba u Paul u dang batai shaphang ka jingbha, ka bor halor lade, bad ka Sngi ka Jingbishar ka ban sa wan, u Pheliks u la sheptieng bad u la ong, “Mynta me lah ban leit noh shuwa. Ngan sa phah khot pat haba nga ïohlad.” 26Ha kajuh ka por u da kyrmen ba u Paul un ai khyndiat ka pisa ïa u; bad na kane ka daw u ju phah khot ïa u bad ïakren bad u.
27Hadien, ar snem ki la leit, u Porsius Phestos u la shim ïa ka jaka jong u Pheliks kum u lyngskor. U Pheliks u la kwah ban ïoh ïa ka jingsngewbha jong ki Jiw, kumta u la iehnoh ïa u Paul ha ka byndi.
Currently Selected:
KI KAM 24: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
