KI KAM 23
23
1U Paul u la peit shlip sha ka Dorbar bad u la ong, “Ko ki para nong Israel jong nga! Ka jingïatiplem jong nga ka sngur shaphang ka rukom ha kaba nga la im ha khmat U Blei haduh kane ka sngi.” 2U Ananias, u Rangbah Lyngdoh, u la hukum ïa kita kiba ïeng hajan jong u Paul ban thab ïa u na ka shyntur. 3#Mat. 23:27,28U Paul u la ong ha u, “U Blei da kaba thikna un shoh ïa me — me ka kynroh ba la pushara lieh! Me shong hangto ban bishar ïa nga kat kum ka Hukum, pynban me pynkheiñ ïa ka Hukum da kaba hukum ïa ki ban thab ïa nga!”
4Ki rangbah kiba hajan jong u Paul ki la ong ha u, “Me krenbeiñ ïa u Rangbah Lyngdoh jong U Blei!”
5 #
Eks. 22:28
U Paul u la jubab, “Ko para nong Israel jong nga, ngam shym tip ba u dei u Rangbah Lyngdoh. Ka Jingthoh Bakhuid ka ong, ‘Mem dei ban kren sniew ïa u nongsynshar ïa ki briew jong me.’ ”
6 #
Ki Kam. 26:5; Php. 3:5 Haba u Paul u la ïohi ba katto katne na ka kynhun ki dei ki Saddusi bad kiwei pat ki Pharisi, u la kren jam ha ka Dorbar, “Ko ki para nong Israel! Nga dei u Pharisi, u khun jong ki Pharisi. Nga don ha ka jingshah bishar hangne namar ka jingkyrmen kaba nga don ba kiba ïap kin mihpat!”
7Mar ïakren ïa kane, ki Pharisi bad ki Saddusi ki la sdang ban ïakajia, bad ka kynhun ka la ïa-pait arliang. 8#Mat. 22:23; Mrk. 12:18; Luk. 20:27(Naba ki Saddusi ki ong ba ki briew kin ym mihpat na ka jingïap bad ba ym don ki angel lane ki mynsiem; hynrei ki Pharisi ki ngeit ïa kine baroh lai tylli.) 9Ka jingpyrta ka la kham jam, bad katto katne ngut na ki nonghikai ka Hukum kiba dei ki jong ka kynhun ki Pharisi ki la ïeng bad ki la pyrshah jur: “Ngim shem kano kano kaba bakla bad une u briew! Lehse u mynsiem lane u angel u la kren shisha ha u!”
10Ka jingïakajia ka la shit haduh katta katta ba u rangbah ai hukum u la sheptieng ïoh ba kin tar lyngkhot lyngkhai ïa u Paul. Kumta u hukum ïa ki shipai jong u ban leit sha ka kynhun, ban shim noh ïa u Paul na ki, bad ïalam ïa u shapoh ka kut shipai.
11Ha kata ka miet U Trai u la ïeng hajan u Paul bad u la ong, “Wat sheptieng! Me la ai ka jingsakhi na ka bynta jong nga hangne ha Jerusalem, bad me dei ban leh kumjuh ruh ha Rom.”
Ka jingïasylla pyrshah ïa ka jingim jong u Paul
12Ha ka step kaba bud katto katne ngut ki Jiw ki la ïakynduh lang bad ki la pynlong ka jingsylla. Ki la shim smai ba kin ym bam lane dih ei ei tad ynda ki la lah pynïap ïa u Paul. 13La don palat sawphew ngut kiba la thmu lang ïa kane. 14Nangta ki la leit sha ki rangbah lyngdoh bad sha ki tymmen ki san bad ki la ong, “Ngi la pynlong lang ka jingsmai ba sngewkhia ban ym bam kano kano tad ynda ngi la pynïap ïa u Paul. 15Mynta te, ma phi bad ka Dorbar to phah ktien sha u rangbah ai hukum ka kynhun shipai Rom ban wallam ïa u Paul sha phi, da kaba leh mynleh ba phi kwah ban ïoh ka jingtip kaba thikna shaphang jong u. Hynrei ngin long kiba la khreh ban pynïap ïa u ha shuwa ba un poi hangne.”
16Hynrei u khun jong ka para jong u Paul u la ïohsngew shaphang ka jingïasylla; kumta u la leit shapoh ka kut shipai bad u la ïathuh ha u Paul. 17Te u Paul u la khot ïa uwei na ki rangbah pynïaidkam bad u la ong ha u, “Ïalam ïa une u samla sha u rangbah ai hukum, u don ei ei ban ïathuh ha u.” 18U rangbah pynïaidkam u la shim ïa u, u la ïalam ïa u sha u rangbah ai hukum, bad u la ong, “U Paul, u koidi, u la khot ïa nga bad kyrpad ïa nga ban wallam ïa une u samla sha me, namar ba u don ei ei ban ong ha me.”
19U rangbah ai hukum u la shim ïa u na ka kti, u la ïalam ïa u da lade hi, bad u la kylli, “Kaei me don ban ïathuh ïa nga?”
20U la ong, “Ki rangbah Jiw ki la ïakut ban kyrpad ïa me lashai ka sngi ban ïalam ïa u Paul sha ka Dorbar, da kaba leh mynleh ba ka Dorbar ka kwah ban ïoh ka jingtip kaba kham thikna shaphang jong u. 21Hynrei wat shahshkor ïa ki, namar don palat sawphew ngut ki briew ki ban rieh bad apthap ïa u. Ki la shim smai ban ym bam lane dih tad ynda ki la pynïap ïa u. Ki la khreh mynta ban leh ïa kata bad ki ap ïa ka rai jong me.”
22U rangbah ai hukum u la ong, “Wat ïathuh hano hano ba me la ïathuh ïa kane ha nga.” Bad u la phah noh ïa uta u samla.
La phah ïa u Paul sha u Pheliks u lyngskor
23Te u rangbah ai hukum u la khot ar ngut na ki rangbah pynïaidkam jong u bad u la ong, “Pynkhreh arspah ngut ki shipai ban leit sha Kaisaria, lem bad hynñiewphew ngut ki shipai shong kulai bad arspah ngut ki nongbat sum, bad pynkhreh ban mih ha ka por khyndai baje mynta ka miet. 24Pynbiang kulai na ka bynta u Paul ban shong bad pynpoi ha kaba suk ïa u sha u Pheliks u Lyngskor.” 25Nangta uta u rangbah ai hukum u la thoh ïa ka shithi kumne:
26“U Klaudius Lusias, sha u Pheliks u Lyngskor Badonburom: Khublei. 27Ki Jiw ki la kem ïa une u briew bad sa ba kin pynïap ïa u. Nga la ïoh jingtip ba u long u traishnong ka Hima Rom, kumta nga la leit bad ki shipai jong nga bad nga la pyllait im ïa u. 28Nga la kwah ban tip ïa kaei kaba ki la mudui ïa u, kumta nga la ïalam ïa u sha ka Dorbar jong ki. 29Nga la shem ba um shym la leh kaei kaei kaba u dei ban ïap lane ban shah set byndi; ka jingmudui pyrshah ïa u ka dei bad ki jingkylli shaphang ka hukum jong ki hi. 30Bad haba la pyntip ha nga ba ka la don ka jingïasylla pyrshah ïa u, shisyndon nga la rai ban phah ïa u sha phi. Nga la ong ïa ki nongmudui jong u ban ai ki jingmudui jong ki pyrshah ïa u ha khmat jong phi.”
31Ki shipai ki la leh ïa kaba la hukum ïa ki. Ki la shim ïa u Paul bad ki la ïalam ïa u ha kata ka miet haduh Antipatris. 32Ha ka sngi kaba bud, ki shipai ïaid kjat ki la leit phai sha ka kut shipai bad ki la iehnoh ha ki shipai shong kulai ban leit bad u. 33Ki la ïalam ïa u sha Kaisaria, ki la ai ïa ka shithi ha u lyngskor, bad ki la aiti ïa u Paul ha u. 34U Lyngskor u la pule ïa ka shithi bad u la kylli ïa u Paul na kano ka probins#23:34 probins: Kane ka dei ba shu bud beit ïa ka kyntien Province ha ka jingspeldak Khasi. u la wan. Haba u la tip ba u dei na Kilikia, 35u la ong, “Ngan sa bishar ïa me ynda poi ki nongmudui jong me.” Nangta u la ai hukum ban buh ïa u Paul ha ka jingap phira hapoh ka jaka sah jong u lyngskor.
Currently Selected:
KI KAM 23: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
