KI KAM 20
20
Sha Makedonia bad Akhaïa
1Hadien ba ka jingkhihwin ka la jem jai, u Paul u la khot lang ïa ki parabangeit bad da ki ktien pynshlur u la khublei ïakhlad bad ki. Nangta u la mihnoh bad u la leit sha Makedonia. 2U la leit lyngba kito ki thain bad u la pynshlur ïa ki briew da ki khubor kiba bun. 3Nangta u la wan sha Akhaïa, ha kaba u la sah lai bnai. U la khreh ban leit sha Syria haba u la shem ba ki la don ki Jiw kiba la ïasylla pyrshah ïa u; kumta u la kut jingmut ban leit phai pat lyngba ka Makedonia. 4U Sopater, u khun jong u Pyrrhos, uba na Beria, u la leit lem bad u; kumta ruh u Aristarkhos bad u Sekundos, na Thessaloni; u Gaïos na Derbe; u Tukhikos bad u Trophimos, na ka probins#20:4 probins: Kane ka dei ba shu bud beit ïa ka kyntien Province ha ka jingspeldak Khasi. jong ka Asia; bad u Timothi. 5Ki la leit sha khmat bad ki la ap ïa ngi ha Troas. 6Ngi la leit da ka lieng na Philippi hadien ka Jingkhawai Niam U Kpu Bakhlem Thiat, bad hadien san sngi ngi la ïasoh bad ki ha Troas, ha kaba ngi la sah shi taïew.
Ka jingleit jngoh bakhatduh jong u Paul ïa ka Troas
7Ha ka sngi nyngkong jong ka taïew ngi la ïalumlang na ka bynta ka jingïabam miet. U Paul u la kren ha ki paidbah bad u la ïai kren haduh shiteng synñia, namar ba un sa mihnoh ha ka sngi kaba bud. 8La thang shibun ki sharak ha ka kamra ba haneng ha kaba ki la ïalang. 9Uwei u samla uba kyrteng u Ïutikhos u la shong ha ka jingkhangïit, bad katba u Paul u dang kren, u Ïutikhos u la shoh samthiah jur, kat haduh ba u la ïohthiah lyngngai bad u la hap na ka mala kaba lai sha madan. Haba ki la rah ïa u, u la ïap. 10Hynrei u Paul u la leit hiar, bad u la dem pyllup halor jong u bad u la kdup ïa u. “Wat khuslai,” u la ong, “u dang im!” 11Nangta u la leit pat shajrong, u la kdiah kpu, bad u la bam. Hadien ba u la ïakren slem bad ki haduh ban da mih ka sngi, u Paul u leit noh. 12Ki la ïalam sha ïing ïa uta u samla uba dang im, bad la pyntngen ïa ki shikatdei eh.
Na Troas sha Miletos
13Ngi la nang leit sha khmat sha ka lieng bad ngi la leit da ka lieng sha Assos, ha kaba ngi la thmu ban kyntiew ïa u Paul ha ka lieng. U la ong ïa ngi ban leh ïa kane, namar u la mut ban leit shata na ryngkew. 14Haba u la ïashem ïa ngi ha Assos, ngi la kyntiew ïa u ha ka lieng bad ngi la leit sha Mitylene. 15Ngi la leit da ka lieng nangta bad ngi la poi ha Khios ha ka sngi kaba bud. Hadien shi sngi ngi la wan poi ha Samos, bad ha ka sngi kaba bud ngi la poi ha Miletos. 16U Paul u la kut jingmut ban ïaid lait ïa ka Ephesos, ba kumta yn ym pynsep-ei ïa ka por ha ka probins jong ka Asia. U la kyrkieh ban poi ha Jerusalem ha ka sngi Pentekost, lada ka long kaba lah.
Ka jingkren ïakhlad ïa ki Nongsharai Balang ha Miletos
17Na Miletos u Paul u la phah khubor sha Ephesos, da kaba kyrpad ïa ki nongsharai balang#20:17 ki nongsharai balang: La jied ïa kane ka kyntien namar ba ka kham ïar ha ka jingmut. Ka kyntien presbyteros ha ka ktien Grik kam kit tang ïa ka jingmut tymmen basan., ban ïakynduh ïa u. 18Haba ki la poi, u la ong ha ki, “Phi ïatip kumno ba nga la pynlut ïa ka por haba nga la don bad phi, naduh ka sngi kaba nyngkong ba nga la poi ha ka probins jong ka Asia. 19Da ka jingsngewrit baroh bad shibun ki ummat nga la trei ïa ka kam jong nga kum u shakri jong U Trai ha ki por kiba eh kiba la wan ha nga namar ki jingïasylla jong ki katto katne ngut ki Jiw. 20Phi ïatip ba ngam shym la buhrieh ïa kano kano ka ban long ka jingïarap ïa phi haba nga ïalap bad hikai ha ki paidbah bad ha ki ïing jong phi. 21Ha ki Jiw bad ki Jentil kumjuh nga la ai ka jingmaham da ka jingsngewkhia ba ki dei ban phai sha U Blei na ki pop jong ki bad ban ngeit ha U Jisu uba U Trai jong ngi. 22Bad mynta, da kaba kohnguh ïa U Mynsiem Bakhuid ngan leit sha Jerusalem, khlem da tip aïu kan jia ïa nga hangta. 23Kaba nga tip ka long ba ha kawei pa kawei ka nongbah U Mynsiem Bakhuid u la maham ïa nga ba ka byndi bad ki jingjynjar ki ap ïa nga. 24#2 Tim. 4:7Hynrei nga ñiew ïa la ka jingim ba ka long ka bymdondor ei ei ïa nga; nga kwah tang ban pyndep ïa ka jingtrei jong nga bad pyndep pura ïa ka kam kaba U Trai Jisu u la ai ha nga ban leh, kaba long ban pynbna ïa ka Khubor Babha shaphang ka jingaiei jong U Blei.
25“Nga la ïaid kylleng hapdeng jong phi baroh, da kaba ïalap ïa ka Hima U Blei. Bad mynta nga tip ba ym don mano mano na phi ki ban dang ïohi shuh ïa nga. 26Kumta nga pynbna skhem ha phi ha kane hi ka sngi: Lada uno uno na phi u dei ban jot noh, ngam don ka jingkitkhlieh. 27Naba ngam shym la buhrieh na kaba pynbna ha phi ïa ka jingthmu baroh ka jong U Blei. 28To sumar bha ïa lade bad ïa ka kynhun baroh kawei ïa kaba U Mynsiem Bakhuid u la buh ha ka jingsumar jong phi. To sharai ïa ka balang U Blei, ïa kaba u la pynlong ka jong u hi lyngba ka jingïap ba aiti lut jong u khun jong U. 29Nga tip ba hadien ba nga leit noh, ki suri barunar sat kin wan hapdeng jong phi, bad kin ym map ïa ka kynhun. 30Ka por kan wan ha kaba katto katne ngut ki briew na ka kynhun jong phi kin ïathuh ki jinglamler ban ïalam noh ïa ki parabangeit ban bud ïa ki. 31To sharai, te, bad to kynmaw bad da ki ummat kiba bun, mynsngi bad mynmiet, nga la hikai ïa iwei pa iwei na phi haduh lai snem.
32“Bad mynta nga aiti ïa phi ha ka jingsumar jong U Blei bad ha ka khubor jong ka jingaiei jong u, kaba lah ban tei ïa phi, bad ai ha phi ïa ki jingkyrkhu kiba U Blei u don na ka bynta ki briew baroh. 33Ngam shym la kwah ïa ka rupa lane ka ksiar lane ka jaiñphong jongno jongno. 34Phi hi phi ïatip ba nga la trei da kine ki kti jong nga ban pynbiang ïa kaei kaei kaba ki paralok jong nga bad ma nga ngi donkam. 35Nga la pyn-i ha phi ha kiei kiei baroh ba da kaba trei shitom ha kane ka rukom ngi dei ban ïarap ïa kiba tlot, da kaba kynmaw ïa ki ktien kiba U Trai Jisu da lade hi u la ong, ‘Ka don ka jingkmen kaba kham khraw ha kaba ai ban ïa kaba pdiang.’ ”
36Haba u Paul u la dep kren, u la dem khohsiew bad ki bad u la duwai. 37Baroh ki la ïa-ïam haba ki la kdup ïa u bad ki la doh khublei ïakhlad bad u. 38Ki da sngewsih kthang eh namar u la lah ong ba kin ym ïohi shuh ïa u. Bad kumta ki la ïaleit bad u sha ka lieng.
Currently Selected:
KI KAM 20: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
