KI KAM 21
21
U Paul u leit sha Jerusalem
1Ngi la khublei ïakhlad ïa ki bad ngi la leit noh. Hadien ba ngi la leit da ka lieng sha shiliang, ngi la wan poi ha Kos; ha ka sngi kaba bud, ngi la poi ha Rhodes, bad nangta ngi la leit sha Patara. 2Hangta ngi la shem ïa ka lieng kaba thmu ban leit sha Phoenisia, kumta ngi la ïakiew ha ka bad ngi la leit noh. 3Ngi la poi ha ka jaka ha kaba ngi lah ban ïohi ïa ka Sypros, bad nangta ngi la leit shaphang shathie jong ka sha Syria. Ngi la hiar ryngkew ha Tyros, ha kaba ka lieng ka dang pynhiar ïa ka jingkit jong ka. 4Hangta ngi la shem katto katne ngut ki parabangeit bad ngi la sah bad ki shi taïew. Da ka bor jong U Mynsiem ki la ïathuh ïa u Paul ban ym leit sha Jerusalem. 5Hynrei haba ka por jong ngi bad ki ka la kut, ngi la mihnoh bad ngi la nang leit ha ka jingleit jong ngi. Ma ki baroh, lem bad ki tnga bad ki khun jong ki, ki la ïaleit lem bad ngi na ka nongbah sha ka rud duriaw, ha kaba ngi la ïadem khohsiew bad duwai. 6Nangta ngi la khublei ïakhlad iwei ïa iwei pat, bad ngi la leit kiew ha ka lieng katba ma ki, ki la leit phai sha ïing.
7Ngi la nang leit da ka lieng na Tyros sha Ptolemais, ha kaba la khublei ïa ngi da ki parabangeit bad ngi la sah bad ki shi sngi. 8#Ki Kam. 6:5; 8:5Ha ka sngi kaba bud ngi la mihnoh bad ngi la poi ha Kaisaria. Hangta ngi la sah ha ka ïing jong u Philip u ebanjelist, uwei na ki hynñiew ngut ki rangbah ba la jied kum ki nongïarap ha Jerusalem. 9U la don saw ngut ki khun kynthei ki bym pat shongkurim kiba la pynbna ïa ka khubor jong U Blei. 10#Ki Kam. 11:28Ngi la don hangta bun sngi mynba u nongïathuhlypa uba kyrteng u Agabos u la wan poi na Judia. 11U la wan sha ngi, u la shim ïa u panpoh jong u Paul, u la teh ïa la ki kti bad ki kjat da uta, bad u la ong, “Kane ka long kaei kaba U Mynsiem Bakhuid u ong: Ïa u trai jong une u panpoh yn teh ha kane ka rukom da ki Jiw ha Jerusalem, bad kin sa aiti ïa u ha ki Jentil.”
12Haba ngi la ïohsngew ïa kane, ma ngi bad kiwei pat kiba hangta, ngi la kyrpad ïa u Paul ban ym leit sha Jerusalem. 13Hynrei u la jubab, “Phi ïaleh aïu, da kaba ïam kumne bad pynpait ïa ka dohnud jong nga? Nga la kloi ym tang ban shah khum ha Jerusalem hynrei wat ban ïap ruh hangta na ka bynta U Trai Jisu.”
14Ngim shym lah ban pynkohnguh ïa u, kumta ngi la sangeh noh bad ngi la ong, “Ai ba yn leh ïa ka mon jong U Trai.”
15Hadien ba ngi la pynlut katto katne por hangta, ngi la khreh ïa la ki tiar ki tar bad ngi la leit noh sha Jerusalem. 16Katto katne ngut na ki parabangeit na Kaisaria ruh ki la ïaleit bad ngi bad ki la ïalam ïa ngi sha ka ïing jong u briew ha kaba ngin sah — u Mnason, uba na Sypros, uba la long u parabangeit naduh ki sngi kiba dang sdang.
U Paul u leit jngoh ïa u Jakob
17Haba ngi la poi ha Jerusalem, ki parabangeit ki la pdiang sngewbha ïa ngi. 18Ha ka sngi kaba bud u Paul u la leit bad ngi ban ïakynduh ïa u Jakob; bad baroh ki nongsharai balang jong ka balang ki la ïadon lang. 19U Paul u la khublei ïa ki bad u la ai ka jingïathuh ba-pura ïa kaei kaei baroh kaba U Blei u la leh hapdeng ki Jentil lyngba ka jingtrei jong u. 20Hadien ba la ïohsngew ïa u, ki baroh ki la ïaroh ïa U Blei. Nangta ki la ong, “Ko Paul, phi lah ban ïohi katno hajar ngut ki Jiw ki la kylla long ki parabangeit, bad katno ma ki baroh ki bat pyrkhing ïa ka Hukum. 21La ïathuh ha ki, ba me la hikai ïa ki Jiw baroh kiba shong basah ha ki ri jong ki Jentil ban iehnoh ïa ka Hukum u Moses, da kaba ong ïa ki ban ym otsher ïa ki khun jong ki lane bud ïa ki dustur jong ki Jiw. 22Khlem pep kin ïohsngew ba me la poi. Te, yn ïaleh kumno? 23#Jkhñ. 6:13-21Kane ka long kaei kaba ngi kwah ïa me ban leh. Ki don saw ngut ki rangbah hangne kiba la shim jingsmai. 24Khie leit bad ki bad ïasoh bad ki ha ka jinglehniam ka jingpynkhuid bad siew ïa ki jinglut jingsep jong ki; nangta kin lah ban khi ïa la ki khlieh. Ha kane ka rukom uwei pa uwei un tip ba kam don ka jingshisha ha kano kano na kita kiei kiei kiba la ïathuh ha ki shaphang jong me, hynrei ba ma me hi me im kat kum ka Hukum u Moses. 25#Ki Kam. 15:29Hynrei shaphang ki Jentil kiba la long kiba ngeit, ngi la phah ka shithi sha ki da kaba ïathuh ïa ki ba ngi la rai ba kim dei ban bam ïa kano kano ka jingbam ïa kaba la kñia ha ki bleithaw, lane bam ïa kano kano ka snam, lane ïa kano kano ka mrad kaba la khyrwait, bad ba ki dei ban sumar ïa lade na ka jingawria.”
26Kumta u Paul u la ïalam ïa kita ki rangbah bad ha ka sngi kaba bud u la pyndep ïa ka jinglehniam ka jingpynkhuid lem bad ki. Nangta u la leit sha ka Templ bad u la pyntip katno sngi kan long haduh kaba kut ka por jong ka jingpynkhuid, haba yn ai ïa ka jingkñia na ka bynta jong ki baroh ar ngut.
La kem ïa u Paul ha ka Templ
27Hynrei hamar ba ki hynñiew sngi kin sa kut, katto katne ngut ki Jiw na ka probins#21:27 probins: Kane ka dei ba shu bud beit ïa ka kyntien Province ha ka jingspeldak Khasi. jong ka Asia ki la ïohi ïa u Paul ha ka Templ. Ki la pynkhih ïa u paidbah baroh bad ki la kem ïa u Paul. 28“Ko ki rangbah Israel!” ki la pyrta. “To ïarap! Dei une u briew uba leit kylleng kylleng da kaba hikai ïa uwei pa uwei pyrshah ïa ki paid Israel, ïa ka Hukum u Moses, bad ïa kane ka Templ. Bad mynta u la wan ïalam wat katto katne ngut ki Jentil shapoh ka Templ bad pyntngit ïa kane ka jaka bakhuid!” 29#Ki Kam. 20:4(Ki la ong ïa kane namar ki la lah ïohi ïa u Trophimos uba na Ephesos ryngkat bad u Paul ha ka nongbah, bad ki la pyrkhat ba u Paul u la ïalam ïa u shapoh ka Templ.)
30Ka jingkulmar ka la pur ha ka nongbah baroh kawei, bad ki briew ki la ïamareh lang, ki la kem ïa u Paul, bad ki la patan ïa u shabar jong ka Templ. Shisyndon hi la khang ïa ki jingkhang jong ka Templ. 31U paidbhur u la pyrshang ban pynïap ïa u Paul, haba la phah ïa ka khubor sha u rangbah ai hukum jong ka kynhun shipai Rom ba ka Jerusalem baroh ka la khihwin. 32Mar kumta hi u rangbah ai hukum u la ïalam katto katne ngut ki rangbah pynïaidkam bad ki shipai bad ki la tur sha u paidbah. Haba ki paidbah ki la ïohi ïa u lem bad ki shipai, ki la sangeh ban shoh ïa u Paul. 33U rangbah ai hukum u la leit sha u Paul, u la kem ïa u, bad u la hukum ban teh ïa u da ar tylli ki kynjri. Nangta u la kylli, “Uei une u briew, bad u la leh aïu?” 34Katto katne ngut na ki paidbah ki la pyrta ïa kawei kaei kaei, kiwei ïa kawei pat. Ka la don ka jingkulmar kaba haduh katta ba u rangbah ai hukum um lah ban tip thikna ïa kaei kaba la lah jia, kumta u la hukum ïa ki rangbah jong u ban ïalam ïa u Paul sha ka kut shipai. 35Ki la ïapoi haduh ki mawkyrdon lem bad u, bad nangta ki shipai ki la dei ban bah ïa u namar u paidbhur u la lamwir palat. 36Baroh ki la ïawan hadien jong u bad ki la pyrta, “Pynïap ïa u!”
U Paul u ïasaid da ïa lade
37Katba ki shipai ki la mut ban ïalam artat ïa u Paul sha ka kut shipai, u la kren ha u rangbah ai hukum: “Nga lah mo ban ong ei ei ha me?”
“Me kren Grik, hato ym dei kumta?” u rangbah shipai u la kylli. 38“Hato mem dei uta u nong Ijipt uba katto katne por mynshuwa u la sdang ka jingïaleh pyrshah bad u la ïalam saw hajar ngut ki riewkieng atiar sha ka ri shyiap?”
39U Paul u la jubab, “Nga long u Jiw, ïa uba la kha ha Tarsos ha Kilikia, u traishnong ka nongbah ba-donnam. Sngewbha shah ïa nga ban kren ha u paidbah.”
40U rangbah ai hukum u la shah ïa u, kumta u Paul u la ïeng halor ki mawkyrdon bad u la ai dak da ki kti jong u ha u paidbah ban sngap jar. Haba ki la sngap jar, u Paul u la kren ïa ki ha ka ktien Hebru:
Currently Selected:
KI KAM 21: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
