KI KAM 19
19
U Paul ha Ephesos
1Katba u Apollos u dang don ha Korinth, u Paul u la leit lyngba ïa ki phang kiba shapoh jong ka probins#19:1 probins: Kane ka dei ba shu bud beit ïa ka kyntien Province ha ka jingspeldak Khasi. bad u la poi ha Ephesos. Hangta u la shem katto katne ngut kiba ngeit, 2bad u la kylli ïa ki, “Hato phi la ïohpdiang ïa U Mynsiem Bakhuid haba phi la long kiba ngeit?”
“Ngim pat ju ïohsngew ba don U Mynsiem Bakhuid,” ki la jubab.
3“Da kumta, te, kaba kumno ka jingpynbaptis phi la ïohpdiang?”
“Ka jingpynbaptis u Ïoannis,” ki la jubab.
4 #
Mat. 3:11; Mrk. 1:4,7,8; Luk. 3:4,16; Ïoan. 1:26,27 U Paul u la ong, “Ka jingpynbaptis u Ïoannis ka long na ka bynta kito kiba la phai noh na ki pop jong ki; bad u la ïathuh ha ki paid Israel ban ngeit ha uta u ban sa wan hadien jong u — kata, ha U Jisu.”
5Haba ki la ïohsngew ïa kane, la pynbaptis ïa ki ha ka kyrteng jong U Trai Jisu. 6U Paul u la buh ïa la ki kti halor jong ki, bad U Mynsiem Bakhuid u la wan ha ki; ki la kren ha ki thylliej kiba pher bad ki la pynbna ruh ïa ka khubor jong U Blei. 7Ki la don baroh khat-ar ngut ki rangbah.
8U Paul u la rung ha ka synagog bad ha ki lai bnai u la kren shlur bad ki paidbah, u da pynlong ki jingïaphylliew jingmut bad ki bad pyrshang ban pynngeit ïa ki shaphang ka Hima U Blei. 9Hynrei katto katne ngut na ki, ki long kiba mynthi bad kim ngeit, bad ha khmat ka kynhun baroh kawei ki la kren ïa kiei kiei kiba sniew shaphang ka Lynti jong U Trai. Kumta u Paul u la iehnoh ïa ki bad u la ïalam bad u ïa kiba ngeit bad man la ka sngi u la pynlong ki jingïaphylliew jingmut ha ka kamra hikai u Tyrannus. 10Kane ka la neh ar snem, ba kumta baroh ki briew kiba shong basah ha ka probins jong ka Asia, ki Jiw bad ki Jentil, ki la ïohsngew ïa ka ktien jong U Trai.
Ki khun shynrang jong u Skeba
11U Blei u la leh ki kambah kiba kham phylla lyngba u Paul. 12Wat ïa ki rumal bad ki jaiñ-da kiba u la pyndonkam la leit lam sha kito kiba pang, bad ïa ki jingpang jong ki la beh noh, bad ki mynsiem bymman ki ju mihnoh na ki. 13Katto katne ngut ki Jiw kiba la leit kylleng sawdong ban beh noh ïa ki mynsiem bymman ki la pyrshang ruh ban pyndonkam ïa ka kyrteng jong U Trai Jisu ban leh ïa kane. Ki la ong ha ki mynsiem bymman, “Nga hukum ïa me ha ka kyrteng U Jisu, ïa uba u Paul u ïalap.” 14Ki hynñiew ngut ki shynrang kiba shi para, kiba long ki khun jong u Rangbah Lyngdoh jong ki Jiw uba kyrteng u Skeba, ki la leh ïa kane.
15Hynrei u mynsiem bymman u la ong ha ki, “Nga ithuh ïa U Jisu, bad nga tip shaphang u Paul; hynrei ma phi — phi dei kiei?”
16Uta u briew uba la don u mynsiem bymman u la tur puk sha ki da ka jinglehbor kaba haduh katta ba u la jop ïa ki baroh. Ki la phet noh na ka ïing jong u, kiba la mynsaw bad ha ki jaiñ kiba la shah tar. 17Baroh ki Jiw bad ki Jentil kiba shong basah ha Ephesos ki la ïohsngew ïa kane; la pyndap ïa ki baroh da ka jingsheptieng, bad ïa ka kyrteng jong U Trai Jisu la ai ka burom kaba kham khraw. 18Kiba bun na kiba ngeit ki la ïawan, ki da phla ha kaba paw bad ki da pynpaw ïa kaei kaba ki la leh. 19Kiba bun kito kiba ju leh myntor ki la wallam lang ïa ki kitab jong ki baroh bad thang ïa kita ha khmat u paidbah. Ki la kheiñlang ïa ka dor jong ki kitab, bad ka jingkheiñ ka long kumba sanphew hajar tylli ki sbai rupa. 20Ha kane ka rukom, ka ktien jong U Trai ka la ïai saphriang bad nang khlaiñ.
Ka jingkhihwin ha Ephesos
21Hadien ba kine kiei kiei ki la jia, u Paul u la kut jingmut ban leit lyngba ka Makedonia bad ka Akhaïa bad ban nang leit sha Jerusalem. “Hadien ba nga leit shata,” u la ong, “nga dei ban ïohi ruh ïa ka Rom.” 22Kumta u la phah ïa u Timothi bad u Erastos, ar ngut ki nongïarap jong u, sha Makedonia, katba u dang pynlut sa katto katne por ha ka probins jong ka Asia.
23Ka la long ha kaba kum kane ka por ba ka la don ka jingeh kaba jur ha Ephesos namar ka Lynti jong U Trai. 24Uwei u bania uba kyrteng u Demetrios uba la thaw ïa ki dur templ jong ka blei Artemis da ka rupa, bad ka kam jong u ka la pynïohnong shibun eh ïa ki nongtrei. 25Kumta u la khot lang ïa ki baroh lem bad kiwei pat kiba ïatrei kum kajuh ka jingtrei bad u la ong ha ki, “Ko rangbah, phi tip ba ka jingmanbha jong ngi ka wan na kane ka kam. 26Mynta, phi lah ban ïohi bad ïohsngew da lade aïu une u Paul u leh. U ong ba ki blei kiba la shna da ki kti jong ki briew kim long da shisha ki blei, bad u la jop ha kaba pynkohnguh ïa kiba bun ki briew, hangne ha Ephesos bad hajan baroh kawei jong ka probins jong ka Asia. 27Ka don ka jingma, te, ba kane ka kam jong ngi kan budnam. Ym tang kata, hynrei ka don ruh ka jingma ba ka templ jong ka blei Artemis kan ym don jingmut ei ei shuh bad ba ïa ka jingkhraw jong ka yn pynduh — ka blei ba la mane da uwei pa uwei ha Asia bad ha ka pyrthei baroh!”
28Haba ki paidbah ki la ïohsngew ïa kine ki ktien, ki la bitar shla bad ki la sdang ban pyrta, “Kaba khraw ka long ka Artemis jong ka Ephesos!” 29Ka jingkhihwin ka la par ïa ka nongbah baroh kawei. Ki paidbhur ki la kem ïa u Gaïos bad ïa u Aristarkhos, ki ar ngut ki nong Makedonia kiba ïaleit ryngkat bad u Paul, bad ki la paring mareh bad ki sha ka rynsan leh tamasa. 30U Paul hi u la kwah ban leit ha khmat u paidbah, hynrei ki parabangeit kim shah ïa u. 31Katto katne ngut na ki bor synshar ka probins, kiba long ki paralok jong u, ki la phah ruh ka khubor sha u da kaba kyrpad ïa u ban ym pyn-i khmat ïa lade ha ka jaka leh tamasa. 32Ha kajuh ka por ka jingïalang baroh kawei ka la don ha ka jingkhynwin: Katto katne ngut ki briew ki pyrta ïa kawei, kiwei ki pyrta ïa kawei pat, namar kiba bun na ki kim da tip balei ba ki la ïawan lumlang. 33Katto katne ngut na ki paidbah ki la pynskhem ba u Aleksandar u kitkhlieh, namar ba ki Jiw ki la pynlong ïa u ban leit sha khmat. Te u Aleksandar u la ai dak da la ka kti ba ki paidbah kin sngap jar, bad u la pyrshang ban kren ïasaid da. 34Hynrei haba ki la ithuh ba u dei u Jiw, ki la ïa-pyrta lang ïa kajuh haduh ar kynta: “Kaba khraw ka long ka Artemis jong ka Ephesos!”
35Ha kaba khatduh, u nongtrei sorkar u la lah ban pynjai jai ïa u paidbah. “Ko para nong Ephesos!” u la ong. “Uwei pa uwei u tip ba ka nongbah Ephesos ka dei ka nongsumar ïa ka templ jong ka Artemis bakhraw bad ïa u mawkyntang uba la hap na sahit bneng. 36Ym don ba lah ban len ïa kine kiei kiei. Kumta te, phi dei ban long jai jai bad ban ym leh ïa kaei kaei da ka jingthurmur. 37Phi la wan ïalam ïa kine ki briew hangne, wat haba kim shym la lute ïa ki templ lane ong kiei kiei kiba sniew shaphang ka blei jong ngi. 38Lada u Demetrios bad ki nongtrei jong u ki don ka jingmudui pyrshah ïano ïano, ngi don ki bor synshar bad ki sngi kiba thikna ïa ka ïingbishar; ïa ki jingmudui lah ban leh hangta. 39Hynrei lada don ei ei shuh shuh kaba phi kwah, dei ban ïapynbeit ïa ka ha ka dorbar aiñ jong ki traishnong. 40Naba hadien kaei kaba la jia mynta ka sngi, ka don ka jingma ba yn mudui ïa ngi na ka bynta ka jingkhihwin. Ym don kano kano ka jingmap na ka bynta kane ka jingkhihwin, bad ngim lah ban ai kano kano ka daw kaba dei na ka bynta kata.” 41Hadien ba u la kren ïa kane, u la pynwai ïa ka jingïalang.
Currently Selected:
KI KAM 19: KHACLBSI
Highlight
Share
Compare
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
