INPÂKNA HLABU 89
89
David leh Pathienin thu a thlung Ezra mi Ethan Maskil.
1LALPA ngilneina thuhai chu kumkhuoin hlaah sak ka ta,
Ka bauin, i ringumzie chu suon po po chenin inhriettir ka tih.
2“Ngilneina chu kumkhuoa dingin remin um a ta,
I ringumna chu vânahai ngei khin sukdet i tih,” ka ti tah a nih.
3 #
Sm 132.11; Tt 2.30 Nang chun i hril ta sih a;
Ka mi thlang kuoma chun thu ka thlung a,
Ka siehlaw David kuoma chun ṭawng kân khâm tah a,
4“I thlahai chu kumkhuoha dingin sukdet ka ta,
I lalṭhungpha khawm suon po po chenin inngîr zing ka tih,” tiin.
5Aw LALPA, vânhai khin i thilmak thawhai hi inpâk an ta,
Mi inthienghai inkhâwmnaa khin i ringumna hi inpâk bawk an tih.
6Vân dumhaia khin LALPA le hrilkhi thei ding tu am an um leh?
Mi thilthawtheitak nauhai lai khin LALPA ang,
7 #
Sm 76.7,11 Mi inthienghai inrâwn khâwmnaa Pathien ṭiumtak,
A kâwlvêla mi po po nêka ṭitak ding chu tu am a um leh?
8Aw LALPA sipaihai Pathien,
Aw JAH, nang anga mi hrât tu am an um a?
I ringumna chu i vêlah a um sih a,
9 #
Sm 65.7 Nang chun tuisuoriet chapona chungah ro i rêl hlak a,
A tuifâwn invawr laihai chu i sukre hlak.
10Nang chun Rahab chu râl that angin i sukkawi dar vawng a,
Nangma dotuhai chu i bân thahrâtin i sukdar ta vawng a.
11 #
Gen 1.1
Vânhai khi nanga ta a na, hnuoi khawm hi nanga ta a nih.
Khawvêl le a sûnga thil um po po hi nangma inngîr a nih.
12Sim le hmâr chu nanga siem a na,
Tabor le Hermon chun i hming leiin hlimin hla an sak hlak.
13Nang chun bân thilthawtheitak i nei a,
I kut chu a hrât a, i kut changtieng chu chawimawiin a um a.
14Felna le rorêlna fel chu i lalṭhungpha innghatna a na,
Ngilneina le thutak chu i hmaah an fe hlak,
15Ri hlimum hre hlak hnam chu an hamṭha ie,
Aw LALPA, anni chu i hmêl varah an um hlak,
16I hming leiin sûnnithlâkin an hlim hlak a,
I felna leiin chawimawiin an um hlak.
17Nang chu an hrâtna ropuina i ni sih a,
I ditsakna leiin kan ki hi chawimawiin um a tih.
18Kan phaw hi LALPA ta a ni sih a,
Kan lal hi Israelhai Mi Inthieng ta a nih.
19Chuong lai chun i mi inthienghai kuomah inlârnaah thu i hril a,
“Mi pakhat hrâttak chunga chun ṭhangpuina kân nghat a,
Mi pakhat, mihai laia inthawka thlang suok chu ka chawimawi tah a.
20 #
Tt 13.22 Ka siehlaw David chu ka hmusuok a,
Ka hriek inthieng chun ama chu ka nâl tah a.
21Ka kut hi a kuomah sukdetin um a ta,
Ka bân hin ama chu sukhrât a tih.
22Dotu chun ama chu hnesie ngai naw nih a,
Rîtlona nau khawmin ama sukrinum naw nih.
23Ama dotuhai chu a hmaah vaw thlûng ka ta,
Ama theidatuhai chu sawisâng ka tih.
24Ama kuoma ruok chun ka ngilneina le ka ringumna chu um a ta,
Ka hming leiin a ki chu chawimawiin um bawk a tih.
25A kut chu tuisuorieta chun innghattir ka ta,
A kut changtieng chu vadungpuia hai chun.
26Ama chun, ‘Nang chu ka pa,
Ka Pathien, ka insandamna lungpui i nih,’ tiin mi ko a tih.
27 #
Tp 1.5 Chun, keiin ama chu nau lutîrah siem ka ta,
Hnuoia lalhai lai chun a chunghnungtakah siem ka tih.
28Ka zainêmna chu kumkhuoin a ta dingin kawl ṭhapêk ka ta,
Ka thuthlung chu a kuomah um det a tih.
29A chi thlahai chu kumkhuoin inumtir ka ta,
A lalṭhungpha khawm chu vân um sûng ni chenin inumtir bawk ka tih.
30A nauhai chun ka dân hi an nghatsan a,
Ka rorêlnahai anga an um nawh a,
31Ka thuruot an bawsiet a,
Ka thupêk an kawl ṭha naw chun;
32An bawsietnahai chu hmawl leh hung kan ka ta,
An rîtlonahai chu vuokin hung kan ka tih.
33Nisienlakhawm, ka ngilneina chu a kuoma inthawk chun lâkpêk vawng naw ning a,
Ka ringumna chu khêla ân chang phal bawk naw ning.
34Ka thuthlung chu bawse naw ning a,
Ka hmûra thu suok chu sukdanglam bawk naw ning.
35Vawi khat ka inthiengna sâlin kân khâm a,
David kuomah khêl hril naw ningah.
36A chithlahai chu kumkhuoin um an ta,
A lalṭhungpha chu ka hmaah nisa angin um bawk a tih.
37 #
Tp 1.5 Thla angin kumkhuoa dingin sukdetin um a ta,
Vân duma hretu ringum ang khin,” i tih a.
38Nisienlakhawm, nang chun i thlauthlâkin i dit nawh a,
I hrieknâl chunga chun i lung a sen tah a.
39I siehlaw thuthlung chu i tirdak a,
A lallukhum chu hnuoia peithla hielin i suktlâwm tah a.
40A dâi po po chu i sukthlûk a,
A kulbînghai chu i suksiet tah a.
41Lampuia fe poin a thil an lâkpêk hlak a,
A vêla mihai hrilsietin a hung um tah a.
42Ama dotuhai kut changtieng chu i chawimawi a,
A hmêlmahai po po chu i sukhlim tah a.
43Anih, a kâwlhnâm hmawrzum chu i namkâwi a,
Ama chu inthawnaa chun în ngîrdettir ta nawh a.
44A ropuina chu i suktâwp a,
A lalṭhungpha chu hnuoiah i pei thlâk tah a.
45A tlangvâl lai nihai chu i suktâwipêk a,
Ama chu muolphonain în khum ta sih a.
46Aw LALPA, ieng chen am în bihmang kumkhuo ding a na?
Ieng chen am i lunginsen chu mei anga a chawk ding a na?
47 #
Job 7.7
Aw, ka hun hi a tâwi dingzie hre zing la,
Mihriem nauhai po po hi i va siem teplo ngei de!
48 #
Heb 11.5 Ieng mi am thi ni hmêl hmu loa hringa,
Seol kuta inthawka hringna sanhim ding chu?
49LALPA, tienlaia i lunginsiet- na, i ringumnaa David kuoma inkhâma i tiem kha,
Khâwlai am a um tah a?
50LALPA, i siehlawhai an hrilsietna chu hre zing la,
Hnam hrâttakhai po po hrilsietna ka ângsûnga ka tuor hlakzie hi.
51Aw LALPA, nangma dotuhai hrilsietna,
I hrieknâl kehnunghai an hrilsietna chu.
52LALPA chu kumkhuoin inpâkin um raw se.
Amen, Amen.
Currently Selected:
INPÂKNA HLABU 89: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
