INPÂKNA HLABU 88
88
Thinaa inthawka sansuokna dinga ṭawngṭâina Hla, Kora naupahai Inpâkna Hla: Hla ṭhuoitu ta dingin; Mahalath-Leannotha sak ding. Ezrah mi Heman Maskil
1Aw LALPA, a mi sandamtu Pathien,
A sûn a zânin i hmaah ka khêk hlak a:
2Ka ṭawngṭaina hi i hmaah lût sienla,
Ka khêkriah i na hung sit rawh.
3Ka hringna hi lunginzîngna- haiin a sip a,
Ka hringna hin Seol chu a hung hnai ta sih a.
4Khursûnga zu fehai laia tiemsa ka na,
Hrâtna hrim hrim neilo mi ang ka nih.
5Râl thathai thlâna zâlhai anga,
Mithi laia pei thlâk ka nih,
Chuonghai chu i hriet ta nawh,
I kuta inthawka sukbohmang an nih.
6Khursûng hnuoihnungtakah i mîn zâltir tah a.
Hmun inthimtak, inthûktakahai chun.
7I lunginsenna chun a mi del tlat a,
Nangin i tuifâwn po po chun i mi sukrinum tah a.
8Ka hmêlhriethai chu keia hlatah în umtir a,
An ta dinga tirdakumtakah i mi siem tah a;
Khârkhumin ka um a, ka suok thei naw a nih.
9Rinumna leiin ka mit a se tieu tieu a,
Aw LALPA, ni tin ka ko cheh a,
Nanga tieng ka kuthai ka phar a.
10Mithihai ta ding chun thilmak i thaw ding am a nih?
Thi tahnunghai chun thoin an inpâk ding che am a nih?
11I zainêmzie chu thlâna inhriettirin,
I ringumzie chu Bohmangna hmuna inhriettirin a um ding am a nih?
12I thilmak thawhai chu inthimah inhriettirin a um ding am a nih?
I felna chu theinghilna ramah hrietin a um bawk ding am a nih?
13Aw LALPA, kei ruok chun ka ko cheh a,
Ka ṭawngṭaina chun zîngkâr tuok a ti che.
14LALPA, iengdinga ka hringna hi i thlauthlâk am a na?
Iengdinga keia tienga i hmai i thup am a na?
15Ka naupangtea inthawk rinum tuor le, thi vâng vângin ka um hlak a,
I thil râpthlâktakhai ka tuorin ka thaah a mi man hlak.
16I lunginsen nasatak chun a mi chîm tlum a,
I thil râpthlâktakhai chun a mi sukbohmang tah a.
17Chuongchun, sûnnithlâkin tui angin an mi vêl a,
An mîn huol vêl tâwl a,
18A mi hmangaitu le ka ruol chu a mi hlatah în umtir tah a,
Ka hmêlhriethai chu inthimah în umtir ta bawk a.
Currently Selected:
INPÂKNA HLABU 88: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
