INPÂKNA HLABU 86
86
Pathienin a zângaina sunzawm dinga ngênna David ṭawngṭâina
1Aw LALPA keia tieng hin i na hung sit la, mi hung dawn rawh,
Rimsi le pasetak ka ni hi.
2Ka hringna hi vawngṭha la,
Pathien ngaisak mi ka ni sih a,
Aw, nang ka Pathien, nangma ringtu i siehlaw hi, sandam rawh.
3Aw LALPA, mi lunginsiet la,
Sûnnithlâkin ka ko hlak si cheh a,
4I siehlaw hringna hi sukhlim la,
Aw LALPA, ka lungril hi i kuomah ka sie tlat hlak sih a.
5LALPA, nang chu i ṭhah a, ngaidam i pei a,
A kotuhai che phawt kuomah zainêmna i hau sih a.
6Aw LALPA, ka ṭawngṭainaa hin na lo sit la,
Lunginsiet ka hnina râwl hi lo ngai rawh.
7Ka lunginzîng ni chun ko ka ti cheh a,
Nangin i mi dawn ding a ni sih a.
8Aw LALPA, pathienhai lai chun nang ang hrim hrim an um nawh a,
I thilthawhai ang hi thilthaw hrim hrim a um bawk nawh.
9Aw LALPA, i siem hnam tinrênghai chu hung an ta, i hmaah hung kûn an ta,
I hming chu hung chawimawi an tih.
10Nang chu i ropui a, thilmakhai i thaw bawk hlak sih a,
Nangma chau hi Pathien i nih.
11Aw LALPA, i lampui chu mîn chûktir la, i thutaka chun um ka tih,
I hming ṭi dingin lungril sakhat mîn puttir rawh.
12Aw LALPA ka Pathien, ka lungril po poin inpâk ka ti cheh a,
I hming hi kumkhuoin chawimawi ka tih.
13Ka chunga i ngilneina chu a nasain;
Ka hringna hi khursûng hnuoihnungtaka inthawkin i sanhim sih a.
14Aw Pathien, mi chapohai chun an mi thawh a,
Mi nunse um khâwmhai chun ka hringna hi sukbo tumin an zawng a,
Nang chu an hmaah an sie ngai naw che.
15Nisienlakhawm, aw LALPA, nang chu Pathien, lainatnaa sip, mi lunginsietthei,
Lunginuoi, zainêm le thutak hau i nih.
16Aw keia tieng hung ngha la, mi lunginsiet rawh.
I siehlaw kuoma hin i hrâtna pe la,
I suoknu nau hi sandam rawh.
17Ṭhatna ding inchikna mîn entir la,
A mi theidatuhai chun chu chu an hmuh a an muolphona dingin;
LALPA nangin i mi ṭhangpuia i mi thlamuon leiin.
Currently Selected:
INPÂKNA HLABU 86: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
