INPÂKNA HLABU 80
80
Israelhai tungding nâwkna dinga ngênna Hla ṭhuoitu ta dingin: Sosanim-Edutha sak ding. Asaph Inpâkna Hla.
1Aw Israelhai vêngtu,
Berâm pâwl anga Josefhai ṭhuoitu, na lo sit rawh aw;
Nang cherubhai chunga ṭhung chu, hung var suok rawh.
2Ephraimhai le, Benjaminhai le,
Manassehai mithmua chun i hrâtna kha chawktho la,
Keini mi sandam dingin hung rawh.
3Aw Pathien, mîn nghatkîrtir nâwk la;
I hmêl kha sukvar la; chuong- chun, sandamin um kan tih.
4Aw LALPA, sipaihai Pathien,
Ieng chen am i mihai ṭawngṭâina chunga hin i lunginsen ding a na?
5Anni chu mitthli beiin i châwm a,
Mitthli hi dâwn dingin inkhina lientakin i pêk hlak.
6Nangin kan vêla mihai ta dinga insêlnaah i mi siem hlak a,
A mi dotuhai chu an innui tâwl hlak.
7Aw sipaihai Pathien, mîn nghatkîrtir nâwk la,
I hmêl kha sukvar la, chuongchun, sandamin kan um ding annâwm.
8Aigupta rama inthawka grêphrui i hung lâk a,
Hnam tin chu i hnawt dawk a, i phun tah a;
9A hma i sukfai pei a,
Inthûktakin zung a kei a, ram chu a aw ta vawng a.
10Tlânghai chu a hlim tuomin an um tâwl a,
A kâuhai chu Pathien sidar thinghai ang el a nih,
11A kâuhai chu tuisuoriet chenin ân zâm suoktir a,
A dâwn inderhai chu Vadungpui chenin.
12Iengdinga a palhai chu i suksiet am a na?
Lama fe taphawtin an kei thlâk ta hi.
13Ramhnuoia sanghal chun a suksiet a,
Ram sahai khawmin an tlân hlak.
14Aw sipaihai Pathien, lungin- siettakin nghakîr nâwk ta;
Vâna inthawk khan zuk en la, hi grêp hrui hi en la, hung kan rawh.
15A kûng i kut changtiengin a phun le,
A kâu i ta dinga i sukhrât le hin.
16Meiah a kâng tah a, phûrin a um tah a;
I hmêla halna leiin an bohmang hlak.
17I kut kha i ditsak mi chungah um raw se,
Mihriem naupa i ta dinga i sukhrât chunga hin.
18Chuongchun, kîr san naw ning ung cheh a,
Mi sukhar la; chuongchun, i hming lam kan tih.
19Aw LALPA, sipaihai Pathien, mîn nghatkîrtir nâwk la.
I hmêl kha sukvar la, chuongchun, sandamin um kan tih.
Currently Selected:
INPÂKNA HLABU 80: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
