INPÂKNA HLABU 78
78
A mi ringum nawhai chunga Pathien ringumna Asaph Maskil.
1Aw ka mihai, ka dân thua hin na lo sit unla,
Ka baua thuhaiah in na hung daw ro.
2Tekhithuin ka bau kâng ka ta,
Tiena thu ril hril tahai kha hril suok ka tih.
3Chuong chu ei nain ei hriet a, ei lungrilin ei hriet bawk a,
Ei thlatuhai khawmin an mi hril bawk kha.
4Chuong chu an nauhai kuomah ip nâwm ei nih a,
Ruolthar hung dinghai kuoma LALPA inpâkna thu le,
A hrâtzie le a thilmaktak thawzie chu hril lem ei tih.
5 #
Dt 4.9 Jakobhai laiah thuinhriettir a sukdet a;
Israelhai lai dân a ruot a,
Chuong chu ei thlatuhai kuomah thupêkin a pêk a;
Anni chun chuong thu chu an nauhai kuomah an inhriettir dingin.
6Ruolthar la hung um ding, naupang la hung pieng dinghai chun an hriet theina dingin;
Chuonghai chu an tho a, an nauhai kuoma an la hrilsâwng peina dingin;
7An beiseina chu Pathienah an innghat theia,
Pathien thilthawhai chu an theinghil nawha,
A thupêkhai chu an zâwm lemna dingin;
8 #
2 Lal 17.14 Le, an thlatuhai anga,
Suon kâwmaw le hel hmang,
Suon lungril siem diklo,
Pathien kuoma lungril ringum naw puta an um nawna dingin.
9Ephraim thlahai chu râlthuoma inthuoma, thalngul chawiin,
Inthaw ni chun an tlânseh a.
10Pathien thuthlung chu an zâwm nawh a,
A dâna um an nuom naw bawk a;
11A thilthawhai chu an thei- nghil a,
A thilmak thaw ân hmutirhai khawm chu.
12 #
Ex 13.21; Is 63.11,12; Ex 14.21 An thlatuhai mithmuah thilmakhai a thaw hlak a,
Aigupta rama Zoan phûla chun.
13Tuisuoriet chu a sukṭhe phawk a, anni chu ân fe kâitir a,
Tuihai chu iengkhat sie khâwm thûr angin ân ngîrtir nguou a.
14Sûna chun sûmin a ṭhuoi a,
Zânkhawvârin meichawkin a ṭhuoi bawk hlak a.
15Thlalêra chun lungpuihai a sukkhawi bawk a,
Tui inthûktaka inthawk ang el, ditkhawpa dâwn ding a pêk a.
16Lungpuia inthawk chu vadunghai a suksuok a,
Tuihai chu vadungpuihai ang elin ân luong thlâktir a.
17 #
Heb 3.16 Chuong sa khawma a chungah thil an la suksuol ta rawp a,
Ram ṭâwla chun Achunghnungtak chunga chun an hel a.
18An châkna sukre dinga fâk ding hniin,
An lungrilin Pathien an fieh a.
19Anih, Pathien an hrilhnâwm a,
“Thlalêra hin Pathienin daw- kân a buotsai thei am chu?
20Ngai ta, lungpui chu a vuokin tuihai kha a hung inkhâw suokin,
Vadunghai chu a kuong a liem pûr pûr ta luoh a,
Bu khawm a pêk thei nghâl am chu?
A mihai ta ding hin sa a buot- sai ding am chu?” an tih a.
21Chuongchun, LALPA chun a lo hriet a, a lung a sen tah a,
Jakobhai chungah mei a hung chawk suok tah a,
Israelhai chungah lunginsenna a hung tah a.
22 #
Heb 3.18 Pathien an ring nawh a,
A sandamna khawm an ring naw leiin.
23Nisienlakhawm, chungtienga vân dumhai khi thu a pêk a.
Vân kawtkhârhai khi a hawngpêk a.
24 #
Jn 6.21 An fâk dingin manna kha an chungah a zuk insûrtir a,
Vân bu chu an kuomah a pêk a nih.
25Mihriemhaiin mi hrâthai bu chu an fâk a,
Khawpna khawpin bu a hung pêk a.
26Khaw sak thli chu vânah ân hrângtir a,
A thilthawtheinain sim thli chu a ṭhuoi a.
27Sa chu pilvut zât rauin an chungah ân sûrtir a,
Vatê thla nei chu tuisuorieta phaiphin zât rauin.
28An riekhmun laia chun ân tlâktir a,
An umna bûk kâwl vêlahai chun.
29Chuongchun, an fâk a, an khawp hleh a,
An ichâk chu an kuomah a pêk tah a nih.
30An châk a la re nawh a,
An bu chu an bauah a la um a.
31Chuong lai tak chun Pathien lunginsenna chu an chungah a tlah a,
An mi thâuhai ṭhenkhat a that a;
Israel tlangvâlhai chu a vuok thlûk tâwl a.
32Chuong sa khawmin thil an la suksuol ta rawp a,
A thilmak thawhai chu an ring chuong nawh.
33Chuleiin, an dam sûng nihai chu teplo mei meiin a sukbo pêk a,
An dam sûng kumhai chu ṭitnain a sukbo pêk bawk a.
34Anni a that poleh ama chu an zawng hlak a,
An kîr nâwk a, zîngkâr Pathien an zawng hlak.
35Pathien chu an lungpui a nih ti le,
Pathien Achunghnungtak chu an intlantu a nih ti an hriet suok hlak.
36Nisienlakhawm, ama chu an bauin an inpâk tehlêm a,
An leiin a kuomah khêlthu an hril hlak.
37 #
Tt 8.21 An lungril chu ama kuomah ân dik si nawh a,
A thuthlunga chun ring an um bawk nawh.
38Nisienlakhawm, ama chu lai- natnaa a sip leiin an rîtlona chu a ngaidam a, anni chu a sukbohmang nawh;
Anih, vawi tamtak a lunginsenna chu a lâk kîr a,
A lunginsenna chu a rêngin a chawktho nuom ngai nawh.
39 #
Jn 3.6 Tisa chau an nih ti a hriet zing a,
Thli, lêt nâwk lo dinga hrâng liem hlak ang hi.
40Thlalêra khan a chungah an va hel inzingin,
Ram ṭâwla khan ama chu an va suklungngai inzing de!
41An ngha kîr nâwkin Pathien an fieh a,
Israelhai mi inthieng chu an suknuor hlak.
42A kut chu an hriet zing nawh a,
Anni dotuhaia inthawka a sanhim ni chu an hriet zing ngai nawh.
43Khânga Aigupta ramah inchiknahai a sieh a,
Zoan phûlah thilmakhai a sie bawk a;
44An vadungpuihai chu thisenah ân changtir a,
An vadunghai chu thisenah ân changtir bawk kha; chuong- chun, an dâwn thei ta nawh a.
45Anni lai tho tamtak a tir a; chuongchun, anni chu a fâk zo a,
Uhai a tir bawk a, chuongchun, anni chu a sukbohmang tah a.
46An thil kakhai khawm chu tuktulung kuomah a pêk a,
An sininrim ra chu khâuṭhikṭhi kuomah a pêk bawk a.
47An grêp hruihai chu rielin a sukhlum a,
An theichang kûnghai khawm chu vûrin a sukhlum bawk a.
48An ranhai khawm chu riel kuomah a pêk a,
An ranruolhai khawm chu ṭêk lumtak kuomah a pêk bawk.
49A lunginsenna nasatak chu an chungah a thlâk a,
Lunginsenna dâm, lungdam nawna dâm, lunginzîngna nasatak dâm hi,
Thil ṭha nawtak intluntu tirko pâwl chu.
50A lunginsenna ding chun lampui a siempêk a,
An hringna chu thinaa in- thawkin a humhim nawh a,
An hringna chu hri kuomah a pêk ta lem a.
51Aigupta rama nau lutîr po po a sukhlum a,
Ham puon inhaia an hrâtna ra hmasa takhai chu:
52Nisienlakhawm, ama mihai chu berâm angin a ṭhuoi- suok a,
Ranruol angin thlalêra khan a ṭhuoi a.
53Himtakin a ṭhuoi a, chuongchun, iengkhawm an ṭi nawh a,
Nisienlakhawm, tuisuoriet chun an hmêlmahai chu ân khum zo tah a,
54Chun, a hmun inthieng ramri chu a ṭhuoi tlung a,
Hi tlâng a kut changtienga a închâwka hin.
55Hnam tin chu an hmaah a hnawt suok a,
Anni chu hruia inkhi dingin rochanah a siem a.
An puon ina chun Israel hnamhai chu ân umtir tah a.
56Nisienlakhawm, Pathien Achunghnungtak chu an infieh a, a chungah an hel a,
A thu inhhriettirhai chu an zâwm si nawh a.
57Ngha kîrin, an thlatuhai angin vervêktakin an thaw ta lem a:
Thalngul ringum naw angin an fe kâwi tah a;
58An hmun insânghaiin ama chu an suklungsen hlak sih a,
An milim siemhaiin an inthîktir bawk a.
59Pathienin chu chu a lo hrietin a lunginsen a,
Israelhai chu a tirdak ta êm êm a.
60Chuongchun, Silo biekbûk,
Mihriem laia a puon in sie chu, a mâksan a.
61A hrâtna chu salah ân man- tir a,
A ropuina chu dotuhai kutah ân mantir ta bawk a.
62A mihai chu kâwlhnâm kuomah a pêk a;
A rochan chunga chun a lunginsen tah a.
63 #
Jer 7.3 Meiin an tlangvâlhai chu a kânghmang a,
An nunghâkhai chun inneina hla hrim hrim an nei ta nawh a.
64 #
Job 27.15 An thiempuhai chu kâwlhnâma sukthlûkin an um a,
An hmeithaihai chu ṭap hrim hrim an ṭap nawh.
65Chuong lai chun LALPA chu,mi an in an har angin, a har tah a,
Mi hrât uoin leia khêk ang hin.
66Ama dotuhai chu a vuok kîr a,
Kumkhaw hmingsietna ân hlawtir tah a.
67Chu naw khawm chu Josef puon in chu a dit nawh a,
Ephraim hnam chu a thlang naw bawk a.
68Juda hnam chu a thlang ta lem a,
A hmangai Zion tlâng chu.
69A in inthieng chu vân insânghai ang khin a bâwl a,
Kumkhuoa dinga a suknghet leihnuoi ang hin.
70A siehlaw David chu a thlang a,
Berâm huona inthawk dâm chun a lâk suok a,
71Berâmpui te ṭhuoihaia inthawkin a ṭhuoi suok a,
A mihai Jakobhai le Israelhai châwm dingin.
72Chuongchun, ama chun a lungril ṭhatna ang peiin anni chu a châwm a,
A kut thiemnain a ṭhuoi tah a.
Currently Selected:
INPÂKNA HLABU 78: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
