INPÂKNA HLABU 74
74
Pathien mipuihai hmêlmahai dopui dinga ngênna Asaph Maskil
1Aw Pathien Iengdinga kumkhuoa i mi thlauthlâk am a na?
Iengdinga i ran tlatna hmuna berâmhai chunga hin i lungsen a khûk am a na?
2I mihai inkhâwmhai, inhmaha i închâwk,
Hnam i ro dinga i întlan kha, hre zing rawh;
I umna hlak Zion tlâng leh.
3Kumkhaw rêmna tieng chun i ke khai la,
Dotuhaiin hmun inthienga chun thil suol tinrêng an thaw ta hi.
4Nangma dotuhai chu i mihai inkhâwmhai laia chun an hawhaw dur dur a,
An inchiknahai chu inchikna dingin an khai tah a.
5Mi, rampui thing,
Hreipuia tinhai angin an inlang a.
6Tuhin chu a thil kermawihai po po chu,
Hreite le tubauhaiin an suksiet zo tah a.
7I hmun inthieng chu an rawh a,
I hming umna khawm chu leihnuoi ichîm khawp hielin an sukkhawhlo tah a.
8An lungrila chun, “Sukse vawng tâwl ei tiu,” an tih a,
Hi rama Pathien inkhâwmna in po po hi an raw siet zo tah.
9Kan inchiknahai chu kan hmu ta nawh a,
Zâwlnei hrim hrim an um ta nawh a,
A sâwt dingzie hre hrim hrim khawm keini lai an um nawh.
10Aw Pathien, dotu chun ieng chen am a hrilsiet ding che?
Hmêlma chun kumkhuoin i hming hi a hrilsiet ding am a nih?
11Iengdinga i kut, i kut changtieng kha i lâk kîr am a na?
Kei dawk nâwk la, anni chu sukbohmang rawh.
12Nisienlakhawm, Pathien chu inhma chena ka Lal a nih,
Hnuoi laitaka sandamna siemhlaktu chu.
13Nang chun i hrâtnain tuisuoriet kha i sukṭheh a,
Nang chun tuia drakonhai luhai chu i sukkawi a.
14Nang chun Leviathan luhai chu i suknâwi a,
Ama chu thlalêra umhai kuoma chun bu dingin i pêk a,
15Nang chun tuihnâr le tuilien chu în ṭhe huk a,
Nang chun vadung lientak takhai chu i sukkang a.
16Sûn hi i ta a na, zân khawm i ta a nih;
Nangin êntu le nisa khi i buotsai a.
17Nangin leihnuoi ramrihai po po chu i khang vawng a,
Nangin nipui le thlasik hi i siem a.
18Aw LALPA, hi hi hre zing rawh, dotu chun a hrilsiet cheh a.
Hnam invêttak chun i hming an hrilsiet kha.
19Aw, i vaṭhu hringna hi ram sahrâng kuoma chun pe lul naw la,
I mi rimsihai hringna hi kumkhuo chun theinghil lul naw rawh.
20Thuthlung kha hung pawisa la,
Hnuoi hmun inthim lai chu nunsietnain a sip sih a.
21Aw, nêksâwrna tuortuhai chu muolphoin kîr naw sienla,
Rimsi le pasiehai chun i hming inpâk raw se.
22Aw Pathien, tho la, nangma thu chu nangin inhril fâwm la,
Mi invêt chun sûnnithlâkin a hrilsietzie che chu hre zing rawh.
23Nangma dotuhai ri chu theinghil naw la,
Nangma dotuhai ri so insâng zuol pei chu.
Currently Selected:
INPÂKNA HLABU 74: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
