INPÂKNA HLABU 73
73
Mi rilo chan chu Asaph inpâkna hla.
1Pathien chu Israelhai chungah a lo ṭha ngei a,
Lungrila inthienghai chunga chun.
2Nisienlakhawm, kei chun chu ka sirpel vâng vâng a,
Ka ke pênhai hi ân tlêu vâng vâng a nih.
3Mi rilohai vângneizie ka hmuin,
Mi uonghai chu kân hnar sih a.
4An thi lai chun tuorna hrim an nei nawh a,
An hrâtna chu a det lem hman hman a.
5Mi dang anga rinumin an um nawh a,
Mi dang sawisakin an um bawk nawh.
6Chuleiin, chapona chun khai- diet angin an rîng a zem a,
Nunsietna chun silfên angin a tuom a.
7Thâu leiin an mit a pâwng a,
Lungrila duthusam nêka nasa an nei a.
8An innuisan a, suoltakin nêksâwrna thu an hril a;
Chapotakin an ṭawng hlak.
9An bau chu vânahai khin an sieh a,
An lei chun hnuoi hi a fang thleng hlak.
10Chuleiin, a mihai chu chutaka chun an kîr nâwk a,
Tui noa sip chu anni idâwn fai rêtin a um a.
11“Pathienin iengtin am hrieng a ta?
Achunghnungtak chun hrietna a nei ding am a nih?” an tih a.
12En ta, hienghai hi mi rilohai an ni hi,
Inhawitirtaka umin an hausa deu deu hlak.
13A thlâwn elin a nih, ka lungril hi ka sukfai a,
Ka kuthai demkailonaa ka sâwp chu.
14Sûnnithlâkin sawisakin ka um a,
Tûk tin kâwkin ka um sih a.
15“Chuong ang chun hril ka tih,” lo ti ta inla,
Ngai ta, i nauhai thlahai chunga vervêktaka lo thaw nîng ka tih.
16Chu chu ka hriet theina ding zie ka ngaituo chun,
Ka ta dingin a na taluo a nih.
17Pathien hmun inthienga ka lût a,
An tâwpna ding ka ngaituo hma chun.
18Anni chu hmun innâltakahai i sie ngei a,
Sietnaahai i pei thlâk hlak.
19Iengtizieha mitkhapkâr chaua an rêm el am a ni aw!
Thil râpthlâktakhaia sukbo- hmang daiin an um ta a ni hi.
20Miin meng hnunga mang an ngainêp angin,
Aw LALPA, i har pha chun anni hlimthla chu ngainêp i tih.
21Ka lungril hi a lungngai a,
Ka lungrila khawm sûn angin ka um sih a.
22Mi mâwl le iengkhawm hre lo ka na,
I kuoma chun sa ang el ka ni hiel hlak kha.
23Nisienlakhawm, i kuomah ka um rawp a,
Ka kut changtieng hi i lo chel hlak.
24Nangin i remruotnain mi ṭhuoi i ta,
Chu hnunga chun ropuinaa khin mi lâwm i tih.
25Vâna khin nang naw chu tu am ka nei a?
Hnuoia khawm hin nang naw chu ka dit tukhawm an um nawh.
26Ka taksa le ka lungril hi a chau tah a,
Nisienlakhawm, Pathien chu kumkhuoa ka lungril hrâtna ding le ka chanvo a nih.
27Ngai ta, nangma hlata umhai chu an bohmang ding a ni sih a,
A uiret santu taphawt che chu i sukbohmang tah a.
28Keia ta ding chun Pathien hnai hi a ṭha a nih;
LALPA Pathien chu kân hum- himna dingin ka hmang a,
I sinthaw po po thu ka hril theina dingin.
Currently Selected:
INPÂKNA HLABU 73: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
