INPÂKNA HLABU 72
72
Lal indik rorêlna Solomon Inpâkna Hla.
1Aw Pathien, i rorêlnahai chu lal kuomah pe la,
I felna chu lal naupa kuomah pe rawh.
2I mihai chu felnain ro rêlpêk a ta,
I mi rimsihai chu rorêlna felin ro rêlpêk a tih.
3Tlâng lien le tlâng chînhai hin felnain
Mihai kuomah lungmuongna hung intlun an tih.
4Ama chun mi laia rimsihai chu ro rêlpêk a ta,
Pase nauhai chu sandam a ta,
Nêksâwrtu ruok chu suknâwi a tih.
5Nisa khi a um sûng phawt chu ṭîng an ti cheh a,
Thla um sûng po khawmin, suon um sûng po po chun.
6Ama chu hlobet râwtna chunga ruotui tla angin tlâng a ta,
Hnuoi châwmtu ruotui ang elin.
7A dam lai chun mi felhai chu inno hlut hlut an ta,
Thla um naw hma khat chun, lungmuongna nasatak um a tih.
8Ama chun tuisuorieta inthawka tuisuoriet dang chenin ramawp nei a ta,
Vadungpuia inthawka kâwlkawdawng chen khawmin.
9Thlalêra umhai chu a hmaah kûn an ta,
Ama dotuhai chun pilvut liek an tih.
10Tarsis ram le thlierkâra lalhaiin lâwmman hung chawi an ta,
Seba le Sheba ram lalhaiin thilpêk hung inhlân bawk an tih.
11Anih, lal po po chu a hmaah bawkkhup an ta,
Hnam tinrêngin a rawng bâwl an tih.
12Pasiein a koin ama chun sanhim a ta,
Mi rimsi ṭhangpuitu nei naw khawm chu sanhim a tih.
13Mi rimsi le pasiehai chu lunginsiet a ta,
Pasiehai hringna chu sandam a tih.
14An hringna chu nêksâwrna le nunsietnaa inthawkin intlan a ta,
An thisen chu ama ngai chun hlutak a ni ding a ni sih a.
15Chun, hring an ta, Sheba ram rângkachak chu a kuoma pêk nîng a tih,
Mihaiin ama chu ṭawngṭâipêk rawp an ta,
Sûnnithlâkin mal sâwmpêk an tih.
16Hnuoiah, tlâng chungahai hin bu tamtak um a ta,
A vui chu Lebanon angin inhnîng suou suou a ta,
Khuoa mihai chu hnuoi hlobet angin inno hlut hlut an tih.
17A hming chu kumkhawtluongin dei naw nih a.
A hming chu ama a um sûng chu dei loin um pei a ta,
Mihai chu amaa chun malsâwmin um an ta,
Hnam tinrêngin ama chu hamṭha tîng an tih,
18LALPA Pathien, Israelhai Pathien chu inpâkin um raw se,
Ama chau hin thilmak a thaw hlak a.
19A hming ropuitak hi kumkhawtluongin inpâkin um bawk sienla,
Hnuoi pumpui khawm hi a ropuinaa suksipin um raw se;
Amen, Amen.
20Jessai naupa David ṭawngṭâi- nahai chu a tâwp tah.
Currently Selected:
INPÂKNA HLABU 72: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
