INPÂKNA HLABU 71
71
Putar ṭawngṭâina
1Aw LALPA nangmaa chun ka ringna kân nghat hlak a,
Iengtika khawm muolphoin mîn umtir naw rawh.
2I felna leiin mi sanhimin, mi sansuok la,
Keia tieng hin i na hung sit la, mi sandam rawh.
3Keia ta dingin umna lungpui, ka fe thei rawpna ding, hung ni la,
Nangin kei mi sandam dingin thu i pêk a,
Ka lungpui le ka kulpui i ni sih a.
4Aw ka Pathien, mi rilo kuta inthawkin mi sansuok la,
Mi fel naw le nunsetak kuta inthawk chu.
5Aw LALPA Pathien, nang chu ka ibeisei chu i na,
Ka naupangtea inthawka ka iring chu i nih.
6Ka nu phîngsûnga inthawk hrimin nangma keihruoiin ka um hlak a,
Ka nu phînga inthawka mi la suoktu i nih;
Nang i nih kân pâk rawp ding che chu.
7Mi tamtak ngaiin thilmak ang ka na,
Nisienlakhawm, nang chu kân humhimna dettak i nih.
8Ka bau hi nangma inpâknain sip a ta,
Sûnnithlâkin nangma chawimawinain sip bawk a tih.
9Ka tar pha leh mi pei thla naw la,
Ka tha a ṭhum pha leh mi mâksan bawk naw rawh.
10A mi dotuhai chun ka chung- châng thu an hril sih a,
Ka hringna inchântuhai chu an inrâwn bawk a,
11“Pathienin a mâksan tah:
Hnawt unla, man ro; sanhimtu ding hrim an um si nawh,” tiin.
12Aw Pathien, mîn hlat lul naw la,
Aw ka Pathien, mi ṭhangpui dingin inhmaw rawh.
13Ka hringna dotuhai chu muolpho le bohmangin um sienla,
Ka sietna ding zawngtuhai chu hrilsietna le inzakna inkhumin um raw se.
14Nisienlakhawm, kei chun chu beisei rawp ka ta,
Inpâk zuol deu deu ka ti che.
15Ka bau hin i felna thu hril a ta,
Sûnnithlâkin i sandamna thu hril bawk a ta,
A tam chin ka hriet si nawh a.
16LALPA PATHIEN thilthaw ropuitakhai leh hung ka ta,
I felna, nanga felna thu chau hril ka tih.
17Aw Pathien, ka naupangtea inthawk nangin i mîn chûktir a,
Tu chen hin i thilmak thawhai chu kân hriettir hlak.
18Anih, aw Pathien, ka hung tar a, ka lu a hung inṭuok pha khawm mi mâksan lul naw la,
I hrâtna hi ruolthar nâwkhai kuoma le
I thilthawtheina hi la hung um dinghai taphawt kuoma kân hriettir hmakhat chu.
19Aw Pathien, i felna khawm ân sâng êm êm a nih,
Aw Pathien, nang thil ropuitakhai thawtu,
Nangma ang hi tu am an um a?;
20Nang, lungzîngna tamtak le nasatak mîn hmutirtu chun,
Mi sukhring nâwk i ta, hnuoi inthûktaka inthawkin mi ṭhuoisuok nâwk i tih.
21Nangin ka ropuina mi sukpungpêk la,
Hung ngha nâwkin mi thlamuon rawh.
22Perkhuongin inpâk bawk ka cheh a,
Aw ka Pathien, i thutak ngei chu inpâk ka tih.
Aw nang Israelhai Mi Inthieng,
Ṭingṭang leh nangma inpâkin hla sak ka tih.
23Nangma inpâka hla ka sak pha chun ka hmûr hi hlim êm êm a ta,
Ka hringna i întlan khawm hi hlim êm êm a tih.
24Ka lei khawm hin sûnnithlâk i felna thu hril a ta,
Ka sietna ding zawngtuhai chu an muolphoin an inzak ta sih a.
Currently Selected:
INPÂKNA HLABU 71: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
