INPÂKNA HLABU 55
55
Mi nunrâwng sukbohmangna dinga ṭawngṭâina Hla ṭhuoitu ta dingin: ṭingṭang chi tum tuma sak mi David Maskil
1Aw Pathien, ka ṭawngṭainaa hin nâ lo sit la,
Lunginsiet ka hninaa hin inthup naw rawh.
2Mi lo ngai la, mi hung dawn rawh.
Ka lunginzîng leiin kân vêl ruoi a, kân rûm hlak;
3A mi dotuhai ri lei le,
Mi rilo hnesiena leihaiin.
Anni chun suolnain an mîn hlumkhumin,
Lunginsenin an mi suknawmna sih a.
4Ka sûnga hin ka lungril a na êm êm a,
Thina ṭiumhai chun an mi del a.
5Ṭitna le inthinnain an mi bawh a,
Thlabârnain a mîn khum zo tah.
6Chuongchun, “Aw, vaṭhu anga thla nei ka va nuom de!
Chuongchun, vuong dai ka ta, lungmuongtakin um ka tih.
7Ngai ta, hlatakah inlêng ka ta,
Thlalêrah um ka ta,
8Thli hrâttak le, thlipui hi,
Inbîkna hmunah ka mâksan vak ding bah,” ka tih a.
9Aw LALPA, an lei chu suksiein sukthlêr la,
Khawpuia chun inpâwngnêkna le inkhîkinkhalna ka hmu sih a.
10A sûn a zânin khawpui chu kul tlângah an vêl an vêl a,
A sûnga chun suolna le rinumna a um bawk a.
11Rîtlona a sûngah a um a,
Hlêmna le zâwrna chun a kawtthlêr chu a suoksan ngai nawh.
12A mi hrilsetu chu hmêlma a ni si nawh a,
Ni sienla chu ka tuor thei lem ding bah;
Ka chunga insuklien chu a mi theidatu a ni bawk nawh a:
Ni sienla chu kân bîkhmangsan ding bah.
13Nisienlakhawm, nang, ka mi inangpui,
Ka ruol, ka ruol pâwlngei i ni mieu sih a.
14Bau thlumtakin ei inbiek hlak a,
Mipui laia chun Pathien biek inah ei lêng hlak kha.
15Thina an chungah hung tlung thut sienla,
Khur sûnga chun a hringin fe thla raw hai se;
Rîtlonahai chu an umnaa le an sûngahai an um sih a.
16Kei chun chu Pathien chu ko ka ta,
Chuongchun, LALPAIN mi sandam a tih.
17Zântieng dâm, zîngkâr dâm, sûna dâm ka lunginzîngna thu hrilin inrûm ka ta:
Chuongchun, ama chun ka râwl lo ngai a tih.
18Ka chunga an mi thawnaa inthawk chun ka hringna hi lungmuongtakin a sanhim tah a;
A mi thawtuhai chu an tam sih a.
19Pathien, tiena chena um zing ta chun,
Ngai a ta, anni chu suktlâwm a tih.
Danglamna nei ngailo, Pathien ṭî ngai si lohai chu.
20Ama le inremhai chunga chun a kut ân lêt a,
A thuthlung chu a sukkhawhlo tah a.
21A bau chu nênetui kîng angin a tlawr a,
A lungril ruok chu indona a ni sih a;
A thuhai chu hriek nêkin ân nâl a,
Nisienlakhawm, kawlhnâm phawisahai a ni sih a.
22 #
1 Pet 5.7 I rikphur chu LALPA chunga innghat la; chuongchun, amain sukhrât a che,
Mi fel chu iengtika khawm sukhnîng phal naw nih.
23 #
Sm 5.6 Nisienlakhawm, aw Pathien, nangin anni chu bohmang- na khura chun infe thlâktir i ta,
Thisen insuo hmang ke le hlêm hmang mihai chu an dam sûng chenve khawm dam naw ni hai:
Kei ruok chun nang chu ring ka ti che.
Currently Selected:
INPÂKNA HLABU 55: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
