INPÂKNA HLABU 50
50
Pathien chu rorêltu a nih; Asaph Inpâkna Hla
1Iengkimthawthei, Pathien ngei,
LALPA chun thu a hril a,
Leihnuoi hi nisa suoknaa inthawka a tlâkna chenin a ko tah a.
2Mawi famkimna,
Ziona inthawk chun,
Pathien chu a var suok tah a.
3Ei Pathien chu hung a ta, to zing naw nih:
A hmatieng chun mei kâng dur dur a ta,
A vêla chun thlipui nasatak hrâng bawk a tih.
4A mihai ro a rêl theina dingin,
Chungtieng vânhai le hnuoi hi ko a tih,
5“Ka mi inthienghai, ka kuomah hung ṭhuoi khâwm ro,
Ran thata inthâwia ka kuoma thu thlungtuhai chu,” tiin.
6Chuongchun, vânhai khin a felna chu tlânginsampui a ta,
Ama Pathien ngei chu rorêltu a ni sih a.
7“Aw ka mihai, ngai ta u, thu ka hril ding a nih,
Aw Israel, ngai ta, kân hriettir ding che a nih:
Kei hi Pathien, i Pathien ngei chu ka ni hi,
8I inthâwinahai leiin kâwk naw ning chengah a,
I pumrawhmang thilinhlânhai chu ka hmaah a um rân sih a.
9I ina inthawk chu bâwngchal hrim hrim la suok naw ning,
I ran huona inthawkhai chun kêltehai khawm la suok bawk naw ning.
10Ramhnuoia sa tinrênghai hi ka ta a ni sih a,
Tlâng sâng khat lai chunga ran umhai khawm chu.
11Tlânga vate po po ka hriet vawng a,
Ramsahai khawm hi ka ta a nih.
12Phîngṭâm lang khawm hril naw ning cheng a,
Leihnuoi le a sûnga thil um po pohai hi ka ta a ni sih a.
13Bâwngchal sa ka fâkin,
Kêl thisen ka dâwn ding am a nih?
14Pathien kuoma lâwmthu hril- na inthâwina inhlân lem la,
I thutiem khawm Achunghnungtak kuomah hlen rawh.
15Chun, lunginzîng ni chun mi ko la,
Sanhim ka ti che, chuongchun, nangin i mi chawimawi ding annâwm,” a tih a.
16Mi rilo kuoma ruok chun Pathienin,
“Ka thuruothai hrilsuok theina i nei am a nih?
Annawleh, ka thuthlung hi iengtizieha i baua sâm am i ni a?
17Thunun i theidah a,
Ka thuhai hi i hnungtieng i dehâwn pei sih a.
18Inru i hmu chun i remtipui a,
Uirepahai hlak în kawppui bawk hlak.
19I bau hi suol kuomah i pêk a,
I lei hin hlêmna a siem bawk hlak.
20Ṭhungpumin i unau i sawi- sêl a,
Mâni nuhai naupasalhai ngei chu i hêk hlak.
21Chuong thil chu i thawh a; nisienlakhawm, ka to zing a;
Chuongchun, nangma ang charah i mi ruot hlak a,
Nisienlakhawm, kâwk ka ti cheh a, i mithmuah indawt peiin suklang ka tih.
22Nangni Pathien theinghiltuhai, hi hi ngaituo ta u khai!
Chuong naw chun, keinâwi ka ti cheu a, nangni sanhimtu hrim an um âwm si nawh a.
23Tukhawm lâwmthu hril inthawina inhlân taphawt chun a mi chawimawi hlak,
Chun, a um dân takinningtaka vawngtu kuoma chun,
Pathien sandamna inentir ka tih,” a tih a.
Currently Selected:
INPÂKNA HLABU 50: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
