INPÂKNA HLABU 49
49
Hausaknaa innghat ân dik nawzie Hla ṭhuoitu ta dingin: Kora naupasalhai Inpâkna Hla.
1Mi tinrênghai, hi hi ngai unla,
Khawvêla um po pohai na lo sit ro.
2Mi chîn le mi lien,
Mi hausa le mi rimsi khawmin,
3Ka bau hin varna thu hril a ta,
Ka lungril ngaituo chu hrietthiemna thu nîng a tih.
4Tekhithuah ka na sit ka ta,
Ka thu ril hril chu ṭingṭangin hrilfieng ka tih.
5Ni ṭha nawahai, ka kekhawng bulah rîtlona chun a mîn huolvêl khawmin,
Iengdingin am ṭîng ka ta?
6Mâni sum ring a,
Mâni hausakna nasatak suongtuhai chun,
7Tukhawmin an unau khawm intlan thei tawp naw nih a,
Pathien kuomah intlanna pe pêk thei bawk naw ni hai:
8An hringna intlanna ding chun thil nasatak sêng ding a na,
Kumkhuo khawma a tina tin naw el ding a nih:
9A dam zing a,
Hmawnna a hmu nawna ding chun.
10Mi varhai khawm an thih a,
Mi invêt le mi ngawnghai khawm an bohmang ve veh a,
An sum mi danghai an mâksanpêk hlakhai chu an hriet sih a.
11An lungril ngaituo dân chu,
An inhai chu kumkhuoa um ding ang le,
An umnahai chu suon po po chena um ding ang a nih.
An ramhai chu anni hming ruok an inputtir hlak.
12Nisienlakhawm, mihriem hi chawimawiin an um zing nawh a.
Sa bohmang hlakhai ang el hi an nih.
13Invêttaka mâni inringzohai chan,
Mâni sumneia lungawi elhai tâwpna chu hi hi a nih:
14Berâm ruol angin Seol ta dinga ruot an na,
Thina chu an vêngtu ning a ta,
Zîngtieng chun mi indiktakhaiin an chungah thu nei an ta,
An umna hrim hrim a um nawna dingin, an mawina chu Seol suksiet ding nîng a tih.
15Ka hringna ruok chu Pathienin Seola inthawkin intlan suok a tih,
Ama chun a mi lâwm âwm sih a.
16Mi sukhausaka a hung um a,
A sungkuo ropuina chu a hung nasat deu deu khawmin ṭi naw rawh:
17A thi pha chun iengkhawm a sawm naw ding a na,
A ropuina chun a zui thlâk âwm si nawh a.
18A dam laiin insukengthâwl sienla khawm,
(A hlawtlingna leiin mi inpâk hlaw sien khawm).
19A thlatuhai suon kuomah fêng a tih,
Iengtika khawm var hmu ta lo dinghai kuoma chun.
20Mihriem chawimawia uma, hrietthiemna nei si lo chu,
Sa bohmang hlakhai ang el hi an nih.
Currently Selected:
INPÂKNA HLABU 49: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
