INPÂKNA HLABU 48
48
Zion mawina le ropuina Hla: Kora naupasalhai Inpâkna Hla.
1LALPA chu a ropui a, nasataka inpâk ding a nih;
Ei Pathien khawpuiah, a tlâng inthienga chun.
2 #
Mt 5.35 Insâng zâwnga mawitak, khawvêl po po hlimna chu,
Zion tlâng chu a nih, hmar tieng panga,
Lal ropuitak khawpui chu.
3A lal inahai chun Pathien chun kulbîng insâng a nizie ân hriettir a.
4Ngai ta, lalhai chu an pung khâwm a,
An fe tlâng tah a nih.
5An hmuh a; chuongchun, mak an tih a,
An lunginzîng a, an tlân hmang ta vak a.
6Chutaka chun inthinnain a man a,
Nuhmei nau invawi natna angin a man bawk a.
7Khawsak thliin,
Tarsis lawnglienhai chu i suksiet a.
8Sipaihai LALPA khawpuiah, ei Pathien khawpuia chun,
Naa ei hriet ang ngeiin ei hmu tah;
Pathienin chu khawpui chu kumkhuoa dingin sukdet a tih.
9Aw Pathien, i biekin sûng rila chun,
I ngilneizie hi kan ngaituo tah.
10Aw Pathien, i hming ang ngeiin,
Nangma inpâkna chu kâwlkaw- dawng chenin a um a;
I kut changtieng chu felnain a sip a nih.
11I rorêlhai leiin, Zion tlâng chu lâwmtakin um sienla,
Juda naunuhai chu hlimtakin um raw se.
12Zion chu vêlin fe huol unla,
A râlvêng in insânghai khawm chu tiem ro.
13A kulhai chu inchik ngun unla,
A lal inhai chu ngaituo ro;
Ruolthar hung um nâwkhai kuoma in hril theina dingin.
14Hi Pathien hi kumkhawtluonga ei Pathien a ni ding a ni sih a,
Thi chen khawma a mi ṭhuoitu ning a tih.
Currently Selected:
INPÂKNA HLABU 48: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
