INPÂKNA HLABU 46
46
Pathien chu ei inhumhimna le ei hrâtna a nih Hla ṭhuoitu ta dingin: Kora naupasalhai Inpâkna Hla.
1Pathien chu ei inhumhimna le ei hrâtna,
Lunginzîng laia ṭhangpui vartu hnai zing a nih.
2Chuleiin, leilung hi hung danglamin,
Tlânghai hi tuisuoriet sûng daiah insawn sien khawm ṭi nâwng ei ta;
3A tuihai chu inri hum humin, so bur bur sienla khawm,
A fâwn nasa leiin tlânghai hi inhnîng dur dur sien khawm ṭi chuong bawk nâwng ei tih.
4Vadung pakhat a um a, chu kau chun Pathien khawpuihai chu a suklâwm hlak,
Achunghnungtak umna hmun inthieng chu.
5Pathien chu a lai takah a um a, inhnîng naw nih a,
Pathienin khawfingchat pha chun ṭhangpui a tih.
6Hnam tin an inri hum hum a, ramhai chu ân hnîng a,
Ama chun a râwl ân suoh a, leihnuoi hi ân tui zo tah a.
7Sipaihai LALPA chu ei kuomah a um a,
Jakob Pathien chu ei kulbîng insâng a nih.
8Hung unla, LALPA thilthawhai hi en ta u,
Leihnuoia thil a suksietziehai hi.
9Ama chun indonahai chu kâwlkawdawng chenin a sukbo hlak a,
Thalngul chu a sukthliek a, fei chu a sât bawng hlak a.
Tawlailîrhai chu meiah a raw hmang hlak.
10To unla, Pathien ka nih ti hi hre ro,
Hnam tin lai chawimawiin um ka ta, hnuoia hin chawimawiin um ka tih.
11Sipaihai LALPA chu ei kuomah a um a,
Jakob Pathien chu ei kulbîng insâng a nih.
Currently Selected:
INPÂKNA HLABU 46: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
