INPÂKNA HLABU 36
36
Pathien hmangaina tâwp neilo Hla ṭhuoitu ta dingin: Lalpa siehlaw David Inpâkna Hla.
1 #
Rom 3.18 Mi rilo bawsietna chun ka lungril sûnga hin thu a hril a,
“A mithmuah Pathien ṭîna hrim hrim a um nawh,” tiin.
2“Ka khawhlona hmu suok naw ni hai a, theida hliek naw ni hai,” tiin.
Mâni mithmuah mâni vêk ân pâk fâwm hlak a,
3A baua thu suokhai chu suolna le hlêmna ruok a ni hlak a,
Varna le thil ṭha thawna chu a bânsan tah a.
4A khumlaizâwla chun thilsuol a ngaituo hlak a,
Lampui ṭha nawa chun a fe hrâm hrâm a,
Suolna chu a tirdak nawh.
Pathien ṭhatna
5Aw LALPA, i ngilneina chu vânhaia khin a um a,
I ringumna chun vân dumhai khi a tawng a nih.
6I felna chu Pathien tlânghai ang a na,
I rorêlhai chu tui inthûk lientak ang a nih;
Aw LALPA, mihriem le sa khawm i humhim hlak.
7Aw Pathien, i ngilneina chu a va hlu de!
Mihriem nauhai chun i thla hnuoi an inchû hlak.
8Anni chu i insûng thil ṭhain tlai bêk bêk an ta,
I lâwmna vadunga mi chu indâwntir bawk i tih.
9Hringna tuikhur chu i kuomah a um sih a.
I vara chun var la hmûng kan tih.
10Aw, nangma hretuhai kuoma chun i ngilneina chu inlangtir pei la,
Lungril indiktak puttuhai kuomah felna chu inlangtir pei bawk rawh,
11Chapo ke chu mi thaw dingin keia tieng hung pên naw sienla,
Mi rilo kut khawmin mi hnawt hmang naw raw se.
12Sawtaka sawn thilsuksuoltuhai chu an tlu zing a,
Nam thlûk an na, tho thei ta naw ni hai.
Currently Selected:
INPÂKNA HLABU 36: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
