INPÂKNA HLABU 33
33
Siemtu le enkawltu inpâkna
1Aw mi felhai, LALPAA chun hlimin hla sak ro,
Mi indik ta ding chun Pathien inpâk hi a âwm hrim a nih.
2Ṭingṭangin LALPA kuoma chun lâwmthu hril unla,
Perkhuong hrui sâwm nei mi leh ama inpâkin hla sak ro.
3Ama chawimawiin hla thar sak unla,
Ri nasatak leh thiemtakin sut ro.
4LALPA thu chu ân dik a,
A thilthaw po po chu ringum- taka thaw a ni si hlak a.
5Felna le rorêlna fel hi a ngaina hlak a;
Leihnuoi hi LALPA ngilneinain a sip a.
6LALPA thuin vânhai chu siem a na,
Chuonga umhai po po khawm chu a baua thuok chun siem an ni bawk a.
7Ama chun tuisuoriet tuihai chu iengkhat siekhâwm thûr angin a sukkhâwm a,
Tui inthûktakhai chu siekhâwm- na inahai a sieṭha hlak.
8Leihnuoi hluo po pohai chun LALPA chu ṭî hai sienla,
Khawvêla um po pohai chu ama ṭiin um raw se.
9Ama chun a hril a, a hung um tah a,
Thu a pêk a, a hung det ta sih a.
10LALPAIN hnam tin remruot chu iengkhawm ni loah ân changtir a,
Mi tin ngaituohai chu iengkhawm ṭhathnemna nei loin a siem hlak.
11LALPA remruot ruok chu kumkhuoin um det a ta,
A lungrila a ngaituohai chu suon po po chenin umdet a tih.
12LALPA Pathiena nei hnam chu an hamṭha a,
Ama rochan dinga a thlang mihai chu.
13LALPA chun vâna inthawk khin a thlîr a,
Mihriem nauhai po po hi a hmu hlak.
14Hnuoia um po po hi,
A umna hmuna inthawk khin a hung thlîr hlak,
15An rênga lungril siem hlak a,
An thilthaw po po ngaituo hlaktu chun.
16Lal hrim hrim hi sipaihai tam lei ngawta sandama um an um ngai nawh:
Mi hrât hi hrât bêk bêk lei ngawta sanhim an ni ngai nawh.
17Sakawr hi insanhimna dingin iengkhawm a ni nawh a,
A hrât bêk bêk leiin tukhawm sanhim bawk naw nih.
18Ngai ta, LALPA mit chu ama ṭîtuhai chunga chun a fu zing hlak a,
A ngilneina beiseituhai chunga chun.
19An hringna thinaa inthawka sanhim ding le,
Ṭâm tlâk phaa anni tungnung dingin.
20Ei hringna hin LALPA a nghâk zing a,
Ama chu mi ṭhangpuitu le ei phaw a nih.
21Amaa chun ei lungril hi a hlim ding a nih,
A hming inthieng ei ring leiin.
22Aw LALPA, i ngilneina chu kan chungah um raw se.
Kan beisei ang pei chein.
Currently Selected:
INPÂKNA HLABU 33: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
