INPÂKNA HLABU 25
25
Inchûktir ding le ngaidam ding le vênghim dinga ngênna David Inpâkna Hla
1Aw LALPA, ka lungril hi i kuomah ka sie tlat hlak,
2Aw ka Pathien, nang ka ring cheh a,
Muolphoin mîn umtir naw la,
A mi dotuhai mi ngam ding chu phal naw rawh.
3Anih, nangma nghâktu hrim hrim chu tukhawm muolphoin um naw ni hai,
A san um loa vervêktaka thawtuhai ruok chu muolphoin um an tih.
4Aw LALPA, i lampuihai chu mîn hriettir la,
I lampui chanchinhai chu mîn chûktir rawh.
5I thutaka chun mi ṭhuoi la, mîn chûktir rawh,
Nang chu a mi sandamtu Pathien i ni sih a;
Sûnnithlâkin ka nghâk zing che hi.
6Aw LALPA, i lainatnahai le i ngilneinahai chu hre zing la,
Inhmaa lo um kumkhuo tah a ni sih a.
7Ka tleirâwl lai suolnahai le ka bawsietnahai chu hre zing naw la,
Aw LALPA, i ṭhatna leiin,
I ngilneizie ang peiin mi hre zing rawh.
8LALPA chu a ṭhain ân dik a nih,
Chuleiin, mi suolhai chu lampui kâwkhmûng a tih.
9Thuhnuoirawlhai chu rorêlna felah ṭhuoi a ta,
Thuhnuoirawlhai chu ama lampui chanchin inchûktir bawk a tih.
10A thuthlung le a thuinhriettir zâwmtuhai ta ding chun,
LALPA lampui po pohai chu ngilneina le thutak vawng a nih.
11Aw LALPA, i hming leiin,
Ka rîtlona ngaidam la, nasatak a ni sih a.
12LALPA ṭi mi chu tu am a na?
Ama chu a lampui thlang ding chu lân entir a tih.
13A hringna chu inhawitirtakin um a ta,
A thlahai chun ram chu la hluong an tih.
14LALPA thurûk chu ama ṭituhai kuomah a um a,
A thuthlung chu anni inhriettir a tih.
15Ka mitin LALPA tieng a en rawp hlak a,
Ama chun ka kehai hi lêna inthawk chun a lâk suok ding a ni sih a.
16Keia tieng hung ngha la, mi lunginsiet rawh,
Khawsâwt le rinumtakin ka um sih a.
17Ka lungril buoinahai hi a hung nasa tah a,
Aw ka lungzingnahaia inthawk hin mi ṭhuoi suok rawh.
18Ka rinumzie le ka tuorzie hi ngaituo la,
Ka suol po po mi ngaidam rawh.
19A mi dotuhai chu ngaituo ta, tamtak an nih,
Nasatakin an mi theida sih a.
20Aw ka hringna vawngṭha la, mi sanhim rawh;
Muolphoin mîn umtir naw la, nangmaa chun ka ringna kân nghat sih a.
21Lungril ṭhatna le indiknain mi vawng ṭha zing raw se.
Ka nghâk zing si cheh a.
22Aw Pathien, Israelhai hi,
An lunginzîngna po poa inthawkin sansuok rawh.
Currently Selected:
INPÂKNA HLABU 25: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
