INPÂKNA HLABU 21
21
Hmêlma kuta inthawka sanhimna leia inpâkna Hla ṭhuoitu ta dingin: David Inpâkna Hla
1Aw LALPA, lal chu i hrâtnaa hin hlim a ta,
I sandamnaa hin a va hlim nasa âwm de;
2A lungril dit zâwng chu i pêk a,
A hmûra a thil hni chu i phal naw nawh a.
3Ṭhatnaa malsâwmnahaiin i tuok a,
Rângkachak inthieng lallukhum în khumtir sih a.
4Ama chun hringna a hni cheh a, i lo pêk a,
Kumkhawtluonga dam zingna chu.
5I sandamnaa chun a ropuina chu a nasa a nih,
Chawimawina le ropuina a chungah în nghat hlak a.
6Kumkhuoa dingin malsâwmna nasatak dawngin i siem sih a,
I hmaah hlimnain i suklâwm hlak.
7Lal chun LALPA chu a ring sih a,
Achunghnungtak ngilneina leiin inhnîng naw ni.
8I kutin nanga dotu po pohai che chu zawng suok i ta,
I kut changtieng chun nangma theidatuhai che chu zawng suok a tih.
9I lungsen pha chun anni chu rawtuina mei chawk zur zur ang chun siem i ta,
LALPA chun anni chu lunginsenin lem zo a ta,
Mei chun kâng hmang el a tih.
10An rahai chu hnuoia inthawk chun sukbo i ta,
An thlahai chu mihriem nauhai laia inthawkin sukbohmang bawk i tih.
11I chunga khan thil suol thaw an tum sih a,
Thil suol an ngaituo suok a, an thaw thei si nawh.
12Nangin anni chu în hnung- sawntir ding a ni sih a,
I thalhruihai chu an hmai tinin kuoisa diem i tih,
13Aw LALPA, i hrâtnaa chun chawimawiin um la,
Chuongchun, i thilthawtheina inpâkin hla sak kan tih.
Currently Selected:
INPÂKNA HLABU 21: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
