INPÂKNA HLABU 22
22
Beidawng khêk râwl le inpâkna hla Hla ṭhuoitu ta dingin: Aijeloth-bas-Sahara sak ding. David Inpâkna Hla.
1 #
Mt 27.46; Mk 15.34 Ka Pathien, ka Pathien, iengdinga i mi mâksan am?
Iengdinga mi ṭhangpui dinga i hlat hleh a, kân rûmna thuhaia inthawka i hla am a na?
2Aw ka Pathien, sûnah ka khêk a; nisienlakhawm, i dawn si nawh,
Zânah ka khêk bawk a, ka to chuong nawh.
3Nisienlakhawm, aw nang Israelhai inpâknaa chêng hlak,
Nang chu în thieng a nih.
4Kan thlatuhai chun an lo ring cheh a,
An ring a; chuongchun, nangin i lo sandam hlak.
5An ko cheh a; chuongchun, sanhimin an um hlak a,
An ring cheh a; chuongchun, muolphoin an um ngai nawh.
6Kei ruok chu mihriem hrim ka ni nawh a, chawkchawnâl el ka nih,
Mihriemhai hrilsiet le mihai hmusit ka nih.
7 #
Mt 27.39,43; Mk 15.29; Lk 23.35 A mi hmu taphawtin an mi nuisan a,
An hner an phen a, an lu an thin a;
8“LALPA chungah innghat ta la, ama chun ama hi sandam raw se chu!
A chungah a lâwm leiin sanhim raw se chu,” an tih a.
9Nang ruok chu sula inthawka mi la suoktu i na,
Ka nu nêne chunga ka um lai khan nangin i mîn ringtir a.
10Sula inthawk hrimin nangma chunga innghat ka na,
Nang chu ka nu phîng sûnga inthawk hrim tah ka Pathien i nih.
11Mîn hlat lul naw rawh, lungin- zingna ding a hnai sih a,
Ṭhangpuitu ding hrim hrim an um si nawh.
12Sebâwngchal tamtakin an mîn huolvêl a,
Basan rama sebâwngchal hrât- takhai chun an mîn huolvêl khup a.
13Sakeibaknei hnukinrâwl inhûk hmang angin,
An bauvin an mi khêkkhum a.
14Tui anga bunthlâkin ka um a,
Ka ru po po khawm inpelsawlin a um a,
Ka lungril hi khuoihlu ang a na; ka rîl lai hin ân tui zo tah.
15Ka tha hi bekawihâr angin a ṭâwl zo vawng a,
Ka lei khawm hi ka dangah a kawp ta tlat a;
Nangin thina pilvuta hin i mi ṭhuoi lût tah a ni hi.
16Uihai chun an mîn huolvêl sih a,
Thil ṭha naw thawtu um khâwmhai chun an mîn huol tlat a,
Ka kut le ka kehai hi an sukpawp a.
17Ka ru po po hi ka tiem vawng thei a,
Anni hlak chun an mi enin an mi mel zing a:
18 #
Mt 27.35; Mk 15.24; Lk 23.34; Jn 19.24 Ka silfênhai an insem a,
Ka zakuo dingin ai an sân a,
19Nang ruok chun, aw LALPA, mîn hlat lul naw la,
Aw, mi sukhrâttu, mi ṭhangpui dingin inhmaw rawh.
20Ka hringna hi kâwlhnâma inthawk chun sanhim la.
Ka nei sun tak hi ui thilthawtheinaa inthawk chun sanhim rawh.
21Sakeibaknei baua inthawk chu mi sanhim la,
Anih, ramsielchal kiha mi chu nangin i mi dawn tah a.
22 #
Heb 2.12 Ka unauhai kuomah i hming hril ka ta,
Inkhâwmhai laia chun inpâk ka ti che.
23LALPA ṭituhai, ama chu inpâk ro,
Jakob thla po pohai, ama chu chawimawi ro;
Israel thla po pohai, ama chu ṭi ro.
24Ama chun rinum tuortu rinumzie chu a hmusit nawh a, a tirdak bawk nawh;
A hmai chu a kuoma inthawkin a thup nawh a,
Ama a ko chun a lo ngai lem hlak.
25Inkhâwmna ropuitaka kân pâk hlakna che hi nangma kuoma mi a na,
Ama ṭîtuhai hmaa chun ka thutiem hi hlen ka tih.
26Thuhnuoirawlhai chun fâng an ta, tlai an tih:
Ama zawngtuhai chun LALPA chu inpâk an ta,
An lungril chu kumkhuoin hringin um raw se.
27Kâwlkawdawnga mi po po khawmin hre nâwk an ta,
LALPA tieng ngha tâng an tih:
Hnam tina chi tin i hmaah kûn an tih.
28Ram chu LALPA ta a na,
Hnam tin chungah rorêltu a ni sih a.
29Hnuoia mi neinunghai po po chun fain chibai bûk an ta,
Pilvuta kîr nâwk dinghai po po khawm chu a hmaah la kûn an tih:
Mâni hringna sukhring zing thei lo chu.
30Chi inthlain a rawng bâwl an ta,
Ṭhangthar hung um nâwkhai kuoma chun LALPA chanchin chu la hril an tih.
31Hung an ta, hnam la hung suok dinghai kuoma chun,
“A thaw zo tah,” tiin, a felzie chu lân hriettir an tih.
Currently Selected:
INPÂKNA HLABU 22: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
