INPÂKNA HLABU 147
147
Lalpain Jerusalem a ngaisak leia inpâkna
1LALPA chu inpâk ro,
Ei Pathien inpâkna hla sak hi a ṭha sih a;
Chu chu ân hawiin, inpâk hi a âwm hrim a nih.
2LALPA chun Jerusalem chu ân ngîr nâwk a.
Israel hnawtsuoka umhai chu a ṭhuoi khâwm nâwk a.
3Lungriem ithlâkhai chu a sukdam a,
An hliemnahai chu a tuom hlak a.
4Arasi tam chin a tiem a,
An hming ân bûk seng tâwl hlak a.
5Ei LALPA chu a ropui a, thilthawthei tienga khawm hrâttak a nih,
A varna chun tâwpintai a nei nawh.
6LALPA chun thuhnuoirawlhai chu a chel zing a,
Mi rilohai chu hnuoiah a pei thlâk hlak.
7Lâwmthu hrila LALPA chawimawiin hla sak unla,
Ṭingṭang leh ei Pathien inpâkin hla sak ro.
8Ama chun vân khi sûm ân zâm hlietir a,
Leihnuoi ta dingin ruo a buotsai a,
Tlângahai chun hlobet ân mâwngtir hlak.
9 #
Mt 6.26; Job 38.4 Ama chun sa kuomah a fâk ding a pêk hlak a,
Vaâk tê inhrâm inhrâmhai kuoma leh.
10Ama chu sakawr hrâtna chunga chun a lâwm nawh a,
Mihriem kehai chunga khawm lâwmna hrim hrim a nei ngai nawh.
11LALPA chun ama ṭituhai chunga chun lâwmna a nei hlak,
A ngilneina beiseituhai chunga chun.
12Aw Jerusalem, LALPA chu inpâk rawh,
Aw Zion, i Pathien chu inpâk rawh.
13Ama chun i kul kawtkhârhai kalna thingtluonhai chu a sukngar a,
I sûnga i nau le te umhai chu mal a sâwm sih a.
14I ramri sûnga chun inremna a siem a,
Bu ṭhatak chiin a suksip hlak che a nih.
15A thupêk chu hnuoia hin a tir suok a,
A thu chu hrâttakin a tlân hlak.
16Vûr sûr chu berâm hmul angin a pêk a,
Vûr tla chu vut angin a the dar hlak.
17A tui inkhal chu bei nawi hlek angin a pei suok a.
A dei chu tuin am tuor thei a ta?
18A thu chu a tir suok a, chuong chu a suktui a,
A thli ân hrângtir a; chuongchun, tuihai chu a hung luong hlak.
19A thu chu Jakobhai kuomah ân langtir a,
A thuruothai le a rorêlhai khawm chu Israelhai kuomah ân langtir a.
20 #
Rom 3.12 Ama chun ieng hnam chunga khawm chuong ang chun a thaw ngai nawh:
A rorêlhai hlak chu an hriet bawk nawh.
LALPA chu inpâk ro.
Currently Selected:
INPÂKNA HLABU 147: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
