INPÂKNA HLABU 139
139
Pathien chu hmun tina um le iengkim hrie a nih. Hla ṭhuoitu ta dingin: David Inpâkna Hla.
1Aw LALPA, nangin nguntakin i mi en suok a, i mi hriet tah;
2Nangin ka ṭhung le ka ngîr hi i hriet hlak a,
Ka ngaituona hi hlataka inthawk khawmin i hriet thiem hlak.
3Ka fe le ka zâl hi i mi en ngun hlak a,
Ka um dân po po hi i hriet vawng a.
4 #
Heb 4.13 Ngai ta, aw LALPA nangin i hriet fai vawng naw chu,
Ka leia hin thu hrim hrim a um nawh.
5Nangin ka hnungtieng le ka hmatieng i mîn huol a,
Ka chungah i kut în nghat bawk a.
6 #
Job 31.4; 42.3 Chuong ang lâwma hrietna chu ka ta dingin a mak taluoh a,
Ân sâng bêk a, ka phâk naw a nih.
7 #
Jer 23.24; Jon 1.3 I thlarau kuoma inthawk hi khâwlai am fêng ka ta?
I hmaa inthawk hi khâwlai am tlân hmang ka ta?
8 #
Am 9.2; Tv 15.11 Vânah hang lâwn lang, chutaka chun i um sih a!
Seolah zâlna siem lang, ngai ta, chutaka chun i um bawk sih a!
9Zîngkâr thlahai zârin
Tuisuoriet tâwp daiah va um lang;
10Chutaka khawm chun i kutin mi ṭhuoi a ta,
I kut changtiengin a mi chel âwm sih a.
11“Matheiloin, inthimin mîn khum zo a ta,
Ka vêla var hi zân nîng a tih,” ti ding ni lang,
12Inthim khawma nangma kuoma chun iengkhawm a hlie nawh a,
Zân hi sûn angin a var lem a nih:
I ta ding chun inthim le var hi thuhmun zing a nih.
13Nangma ngeiin ka lungril i nei a,
Ka nu phîng sûngah i mîn khum a.
14I kuomah lâwmthu hril ka ti che, ṭiumtak le maktaka siem ka ni sih a,
I thilthawhai hi maktak a na,
Chu chu ka hringna hin a hriet chieng hle a nih.
15Arûka siema ka um a,
Hnuoi hmun inhnuoitaka mawi- taka siema ka um lai khan,
Ka rurêl chu i kuomah thupin a um nawh a,
16Ka riruong la famkim lo chu i mitin a hmuh a,
I lekhabua chun ka pênghai hi ziek vawng a nih:
A ni têla siemin a um pei a,
A pakhat khawm a la um hmain.
17Aw Pathien, i ngaituonahai chu ka ta dingin a va hlu de!
A hung insukkhâwm chu a va nasa âwm de!
18Tiem ding ni lang, a tam tieng chu phaiphin nêkin tam lem a tih:
Ka hang meng chun, i kuomah ka la um ta rawp hlak a nih.
19Aw Pathien, mi rilohai chu that ngei i tih,
Chuongchun, nangni thisen insuo inhâwkhai, mi mâksan ro.
20Anni chun suoltakin an hrilsiet si cheh a,
Nangma dotuhai chun i hming chu an hril nawmna hlak.
21Aw Lalpa, nangma theidatuhai chu ka theida naw am a nih?
Nangma thawtuhai chunga chun ka lungninaw naw am a nih?
22Anni chu theida taktêin ka theidah a,
A mi dotuhaiah ka ruot tâwl a.
23Aw Pathien, nguntakin mi en suok la, ka lungril hi hre rawh,
Mi fie la, ka ngaituonahai hi hre rawh.
24Chun, keimaa hin rîtlona kawng hrim hrim a um le a um naw en la,
Chatuon lampuia#Ka thlatuhai lampuia chun mi ṭhuoi rawh.
Currently Selected:
INPÂKNA HLABU 139: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
