INPÂKNA HLABU 107
107
Buoinaa inthawkin Lalpain a sansuok
1 #
1 Chr 16.34; Ezek 3.11 Aw LALPA kuomah lâwmthu hril ro, ama chu a ṭha sih a;
A ngilneina khawm kumkhuoin a um ding a ni sih a,
2LALPA mi intlanhai chun chuong ang chun hril raw se,
Dotu kuta inthawka a întlan,
3Ram tina inthawka a ṭhuoi khâwm,
Sak le thlang, sim le hmâra inthawkhai dâm chun.
4Thlalêra ram ṭâwl lampuia chun an invâk an invâk a,
Mihriem umna khuo hrim hrim an hmu nawh a.
5Phîngṭâm le dangchârin,
An hringna chu an sûngah a chau tah a.
6Chu phingleh an buoinaa chun LALPA chu an ko tah a,
Ama chun an lunginzîngnaa inthawk chun a sanhim a.
7Mihriem umna khuoa an fe theina dingin,
Lampui tlûntakah a ṭhuoi tah a.
8Aw, mihriemhai hin LALPA chu a ngilneina lei le,
Mihriem nauhai chunga a thilmak thawhai lei hin inpâk hai sien aw!
9Ama chun hringna thil châk êm êm chu a sukkhawpin,
Hringna phîngṭâm chu ṭhatnain a sukkhawp sih a.
10Inthim hnuoia le thina hlima ṭhung a,
Rinumna le thîra khuophai chu;
11Pathien thuhai chungah an hel a,
Achunghnungtak remruot chu an ngainêp leiin.
12Ama chun an lungril chu inrimnain a sukhnuoi a,
An tluh a, ṭhangpuitu ding hrim an um si nawh a.
13Chu phingleh an buoinaa chun LALPA chu an ko a,
Ama chun an lungzîngnaa inthawk chun a sandam a.
14Inthim hnuoi le thina hlima inthawk chun a ṭhuoi suok a,
An khuopnahai chu a suktan tah a.
15Aw mihriemhai hin LALPA chu a ngilneina lei le,
Mihriem nauhai chunga a thilmak thawhai lei hin inpâk hai sien aw!
16Ama chun dâr kawtkhârhai chu a suksiet a,
A kalna thîrtluonhai chu a sukbawng ta sih a.
17Mi invêthai chu an bawsietna lei le,
An rîtlonahai leiin an insukrinum hlak a.
18An hringna chun fâk ding tinrêng hi a tirdak hlak a,
Thina kul kawtkhârhai chu an hnai hlak a.
19Chu phingleh an buoinaa chun LALPA chu an ko a,
Ama chun an lungzingnaa inthawk chun a sandam hlak.
20A thu chu a tirsuok a, anni chu a sukdam hlak a,
An bohmangna dinghaia inthawk chun a sanhim hlak.
21Aw mihriemhai hin LALPA chu a ngilneina lei le,
Mihriem nauhai chunga a thilmak thawhai lei hin inpâk hai sien chu aw!
22Anni chun lâwmthu hrilna inthâwinahai chu inhlân hai sienla,
A thilthawhai chu hlaa sakin hril raw hai se.
23Tuisuorieta lawng liena zu feh a,
Tui lientak chunghaia sin thaw hlakhai chun,
24Chuonghai chun LALPA thilthawhai le,
Tui inthûktaka a thilmak thawhai chu an hmu hlak.
25Ama chun thu a pêk a, thlipui ân hrângtir a,
Chu chun a tuifâwnhai chu a suksâng hlak.
26Vân tieng an hung tuol tuol a, inthûktakah an ṭum nâwk tuol tuol hlak,
Lunginzîngna leiin an hringna chu ân tuihmang hlak.
27Zurui angin an thle an thleh a, an pêm nawk nawk hlak a,
Um ngaina hrim hrim an hriet ngai nawh.
28Chu phingleh an buoinaa chun LALPA chu an ko a,
Ama chun an lungzîngnaa inthawk chun a ṭhuoi suok hlak.
29Thlipui chu a sukma ṭhuop a,
Chuongchun, a tuifâwnhai a re ṭhup hlak.
30Chun, a re ta leiin an lâwm hlak a;
Chuongchun, ama chun an ngaitak likilkawia chun a ṭhuoi tlung hlak.
31Aw, mihriemhai hin LALPA chu a zainêmna lei le
Mihriem nauhai chunga a thilmak thawhai lei hin inpâk hai sien chu aw!
32Anni chun mihai inkhâwmnaah ama chu inpâk sienla,
Upahai ṭhungnaa chun inpâk raw se.
33Ama chun vadungpuihai chu thlalêrah ân changtir hlak a,
Tuihnârhai chu hnuoi ṭâwlah ân changtir bawk hlak.
34Ram ṭha chu ram ṭâwl chawkah ân changtir hlak a,
A sûnga umhai rîtlona leiin.
35Thlalêr chu dîlah ân changtir hlak a,
Ram ṭâwl chu tuihnârahai ân changtir bawk hlak.
36Chutaka chun phîngṭâmhai chu ân umtir hlak a,
Umna ding khuo an buotsai a.
37Lohai an nei a, grêp huonhai an siem a,
A ra hung punghai chu an hmu theina dingin.
38Anni chu mal a sâwm hlak a, nasataka sukpungin an um a,
An ranhai chu a kiem a phal ngai nawh a,
39Chun, nêksâwrna dâm, rinum- na dâm, lungngai dâm leiin,
An kiem ta sawt sawt a, an kûn ta thlawk thlawk a.
40Ama chun mi lienhai chungah hmusitna a bunthlâk hlak a,
Thlalêr lampui hrim hrim um nawnaa chun ân vâktir ân vâktir a.
41Nisienlakhawm, rimsihai chu rinumnaa inthawkin hmun insângah a dawm kai hlak a,
Ran ruol angin sûnghai a siempêk hlak.
42Mi indiktakhai chun chu chu hmûng an ta, lâwm an tih,
Rîtlona po po chun a bau hip a tih,
43Tukhawm a var taphawt chun chuong chu vawng ṭhâng an ta,
LALPA ngilneina chu ngaituong an tih.
Currently Selected:
INPÂKNA HLABU 107: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
