INPÂKNA HLABU 106
106
Israel hel hmang a nina
1LALPA chu inpâk ro,
LALPA kuoma chun lâwm- thu hril ro, ama chu a ṭha sih a;
A ngilneina chun kumkhuo a dai sih a.
2Tu am LALPA thilthaw ropuitakhai hril thei a,
Ama inpâkna po po inhriettir vawng thei le?
3Rorêlna vawng ṭhahai chu an hamṭha ie,
Ieng lai khawma feltaka thawtu leh.
4Aw LALPA, i mihai i ditsakna chun mi hre zing la,
Aw i Sandamna leh mi hung kan rawh.
5I mi thlanghai tluongtlungzie ka hmu thei a,
I hnamhai lâwmnaa chun ka hlim thei a,
I rochanhai le ka sawng theina dingin.
6Kan thlatuhai le khan thil kan suksuol a,
Thil suol kan thawh a, suoltakin kan thaw tah a.
7 #
1 Chr 16.34; 2 Chr 5.13; 7.3; Ezr 3.11; Jer 33.11; Ex 14.10-12 Kan thlatuhai khan Aigupta rama khan i thilmak thaw- hai kha an hriet thiem nawh a,
I ngilneina nasatak kha an hriet zing ta nawh a,
Tuisuorietah an hel ta lem a,
Tuisuoriet Sena khan.
8Chuong sa khawm chun ama hming leiin anni chu a sandam tah a,
A thilthawtheina ropuitak chu ân hriettir theina dingin.
9Tuisuoriet Sen chu a hal a; chuongchun, a kang tah a,
Chuongchun, anni chu thlalêra ṭhuoi tlang ang elin tui inthûktakahai chun a ṭhuoi tlang tah a.
10Anni theidatu kuta inthawk chun a sandam a,
Hmêlma kuta inthawk chun ân tlan tah a.
11Tuihai chun anni dotuhai chu ân khum zo a,
Pakhat khawm dama suok an um ta nawh a.
12 #
Ex 14.21-31 Chuong lai chun a thuhai chu an ring a,
Ama inpâkna hla an sak a.
13Nisienlakhawm, a thilthaw- hai chu an theinghil vak tah a,
A remruot chu an nghâk pei nawh a.
14Thlalêra chun thil an châk êm êm a,
Ram ṭâwla chun Pathien an fie ta lem a.
15 #
Nam 11.4-34 An thil hni chu a pêk a,
Nisienlakhawm, an hringnaa chun chêrna ân lûttir a,
16An riebûka chun Mosie chu an îtthîk a,
LALPA mi inthieng, Aron leh.
17Hnuoi chu a kah a, Dathan chu a lem a,
Abiram pâwlhai chu ân khum zo tah a.
18An pâwl lai chun mei sukchawkin a um a,
Meichawk chun mi rilohai chu a kâng hmang tah a.
19Horeb tlânga chun bâwngte lim an siem a,
A lim sung chu an biek tah a.
20Chuong ang chun an ropuina chu,
Bâwngchal hlobet fa mi ang chauah an inchangtir tah a.
21Pathien an sandamtu an theinghil tah a,
Aigupta rama thil ropuitak tak thawtu chu;
22Ham rama thilmaktakhai,
Tuisuoriet Sen panga thil râpthlâktakhai thawtu chu.
23Chuleiin, sukbohmang rawi a tih, tia, a lunginsen sukkîr dingin,
A mi thlang Mosie chu a lûtna dinga chun a hmaah ngîr naw sien lem chu,
Sukbohmang a tih, ti a hril a.
24Anih, ram ditumtak chu an ngainêp a,
A thu chu an ring nuom nawh a.
25An puon inahai chun an chier ta lem a,
LALPA râwl chu an ngai nuom nawh a.
26Chuleiin anni tieng chun a kut a phar a,
Anni chu thlalêra sukthlûkna ding le,
27 #
Lev 26.33 An chi thla dinghai chu hnam tin lai a sukthlûk a,
Ram tina a sukdarna dingin.
28Baal-peor tieng chun an kawp a,
Mithi kuoma thilinhlânhai chu an fâk ve tah a.
29Chuongchun, an thilthawhaiin ama chu an suklungsen a,
Chuongchun, hri chu an chungah a hung inlêng tah a.
30Chuong lai chun Phinehas chu a ngîr a, ro a rêl a;
Chuongchun, hri chu sukboin a um tah a.
31Chu chu a felnaa ruot a nih,
Kumkhuoin suon po po chenin.
32Meriba tuiahai khawm chun ama chu an suklungsen a,
Chuongchun, anni leiin Mosie chungah thil ṭha naw a tlung ta hiel a,
33A thlarau chungah an hel a,
A hmûra ṭha nawtaka a hril leiin.
34LALPAIN an kuoma sukbo- hmangna thu a pêk angin,
Mipuihai chu an sukbohmang nawh a.
35Hnam tin chu an pâwl a,
An thilthawhai chu an inchûk lem a.
36 #
Rt 2.1-3; 3.5-6 A milim rawnghai an bâwl a,
Chuong chu an ta dingin châng a lo ni tah.
37Anih, khawhri kuoma chun an naupasalhai le an naunu- hmeihaiin an inthâwi a;
38Thisen pawitâwklo, an naupasalhai le an naunuhmeihai thisen ngei chu an insuo tah a,
Chuonghai chun Kanaan ram milimhai kuomah an inthâwi a,
Chu ram chu thisenin a lo pawrche tah a.
39Chuongchun, an sinthawhaia sukkhawloin an um tah a,
An thilthawhaia chun an hung uire tah a.
40Chuleiin, LALPA lung chu a mihai chungah ân thawk a,
A rochan chu a tirdak tah a.
41Chuongchun, anni chu hnam tin kutah a pêk a,
Anni theidatuhai chun an chungah ro an rêl tah a.
42Anni dotuhaiin an nêksâwr a,
An kut hnuoia chun suktlâwmin an um tah a.
43Vawi tamtak anni chu a san- dam a,
Nisienlakhawm, an remruotnaa chun an hel hlak a,
An rîtlonaa chun sukhnuoiin an um tah a.
44Chuong sa khawm chun, ama chun an khêkri chu a hriet chun,
An lunginzîng chu a ngaisak a.
45A thuthlung chu anni a hrietpêk zing a,
A ngilneina nasatzie ang peiin a lungril ân lêt tah a.
46Sala ṭhuoituhai po po chu,
Anni a lunginsiettir a.
47Aw LALPA, kan Pathien, mi sandam la,
Hnam tin laia inthawk hi mi ṭhuoi khawm rawh:
I hming inthieng kuoma lâwmthu hril ding le,
Nangma inpâkna chawimawi dingin.
48 #
1 Chr 16.35-36 LALPA Israel Pathien chu inpâkin um raw se.
Chatuona inthawka chatuon chenin.
Mi po po chun, “Amen,” ti raw se;
LALPA chu inpâk ro.
Currently Selected:
INPÂKNA HLABU 106: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
