INPÂKNA HLABU 105
105
Israel laia Pathien thilmak thawhai
(1 Chr 16.7-22)
1Aw, LALPA kuomah lâwmthu hril unla, a hming lam ro;
Mi tin lai chun a thilthaw chu inhriettir ro.
2Ama chawimawiin hla sak unla, ama inpâkin sak ro;
A thilmak thaw po po thu chu titi ro.
3A hming inthieng chu sawng ro,
LALPA zawngtuhai lungril chu hlim raw se.
4LALPA le a hrâtna chu zawng unla,
A hmêl chu zawng rawp ro.
5A thilmak thawhai chu hre zing ro,
A thilmakhai le a baua a rorêl suokhai chu:
6Aw, a siehlaw Abraham thlahai,
Jakob thla, a ithlanghai.
7Ama chu LALPA ei Pathien chu a nih,
A rorêlhai chu hnuoi chung po poa hin a um.
8A thuthlung chu kumkhuoin a hriet hlak a,
Suon sâng khat chena a thu lo pêk chu;
9 #
Lk 1.72-73 Abraham kuoma a thuthlung le,
Isak kuoma a înkhâmna chu.
10Chu ma chu thuruot ni dingin Jakob kuomah a sukdet a,
Israel kuoma kumkhawtluong thuthlung dingin;
11“Kanaan ram hi i kuomah pêng ka ti che,
I rochan puol ding chu,” tiin;
12Mi tlâwmte chau, an ni lai khan,
Anih, tlâwmte chau chu rama chun mikhuol an ni nâwk nghâl sih a.
13Hnam tum tum kuomah an fe lawn an fe lawn a,
Ram tum tuma inthawkin mi tum tumhai kuomah.
14Tu inêksâwr khawm a phal nawh a,
Anih, anni leiin lalhai khawm a kâwk a,
15 #
1 Chr 16.8-22 “Ka hriek nâlhai chu tâwk naw unla,
Ka zâwlneihai pawi hrim hrim khawm tâwk naw ro,” tiin.
16Chu rama tla dingin ṭâm a ko a,
Fâk ding hrim hrim ân um nawtir tah a.
17An hmaah mi a tir a,
Josef chu siehlaw dinga zawrin a um a,
18A kehai chu kawlin an suk- na a,
Thîr khaidiet bunin a um tah a.
19A thu a tlung hmakhat chun,
LALPA thu chun ama chu a fie hlak a.
20Laltak chun mi a tir a, a sût a,
Ân suo tah a, mi tin rorêltu ngei chun.
21A sûnghai chungah hotua le,
A sum po po chunga rorêltuah a siem a;
22A mi lienhai chu a nuom nuoma a khuop ding le,
A upahai sukvar dingin.
23Israel khawm chu Aigupta ramah a feh a,
Jakob ruok chu Ham rama chun a um ta hrih a.
24A mihai chu nasatakin a sukpung a,
Anni dotuhai nêkin a sukhrât ta lem a.
25A mihai theida dingin an lungril ân lêttir a,
A siehlawhai chunga vervêktaka thaw dingin.
26A siehlaw Mosie chu a tir a,
A mi thlang Aron leh.
27Anni chun ân chiknahai chu anni lai an inentir a,
Ham rama chun thilmakhai an inentir a.
28Ama chun inthim a tir a, a sukthim tah a,
Chuongchun, a thuhai chu an sêl ta nawh a.
29An tuihai chu thisena ân changtir a,
An ngahai chu a sukhlum tah a.
30An ram chu uin a sip tah a,
An lalhai pindana chen khawm.
31Ama chun thu a hril a; chuongchun, tho tamtak an hung a,
Hrik khawm an ram sûng po poah an hung bawk a.
32An kuomah ruo aiah riel a pêk a,
An rama chun mei chawk zawr zawr a pêk ta bawk a.
33An grêp hruihai le an theichang kûnghai a sukhlum a,
An rama thinghai chu a sukthliek ta bawk a.
34Ama chun thu a hril a; chuong- chun, khâuhai an hung a,
Tuktulunghai leh, tiem seng ruollo tawp el hin.
35Chuonghai chun an rama thlai tinrênghai chu an fâk zo a,
An hnuoi rahai khawm an fâk zo ta bawk a.
36An rama nau lutîr um po po a sukhlum a,
An hrâtna po po ra hmasatakhai chu.
37Chuongchun, tangka le râng- kachak leh a ṭhuoi suok a,
Ama hnamhai laia chun mi hrât naw pakhat khawm an um dêr nawh.
38An suok lai chun Aiguptahai chu an lâwm a,
Anni chu an hung ṭî ta leiin.
39Ama chun hlietu dingin sûm ân zâmtir a,
Zâna êntu dingin mei a pêk bawk a.
40An hnih a; chuongchun, vamîm a hung ṭhuoi a,
Vân buin anni chu a sukkhawp tah a.
41Lungpui chu a hawng a; chuongchun, tui a hung suok zur zur a,
Hmun ṭâwlahai chun vadung ang el hin a luong tah a.
42A thu inthieng kha a hriet zing sih a:
A siehlaw Abraham le khan.
43Chuongchun, a mihai chu hlimtakin a ṭhuoi suok tah a,
A mi thlanghai chu hla sak pei pumin.
44Chun,hnam tin ramhai chu an kuomah a pêkpêk a,
Anni chun mi tin thaw suoksa chu an hluo tah a;
45A thuruothai chu an zâwm thei a,
A dânhai chu an vawngṭhat theina dingin.
LALPA chu inpâk ro.
Currently Selected:
INPÂKNA HLABU 105: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
