THUVARHAI 8
8
Varna ṭhatna le a kumhlun zie
1Varna chu a khêkin,
Hrietthiemna chun a râwl ân suo a ni naw am a nih?
2Lampui sîra hmun insânghaia chun,
Lampui ṭhuom laihaia chun a ngîr a;
3Khawpui lûtnaa, dâikawtkhâr sîrahai,
Kawtkhâr lûtnaahai chun a khêk rak rak a;
4“In kuomah, aw mihriemhai, ka khêk a,
Ka râwl chu mihriem naupahai kuomah kân suo a nih.
5Aw nang mi mâwl, varna hung hrethiem ta la,
Chun, nangni invêthai, hriet- thiemna lungril hung nei ro.
6Ngai ta u, thil ṭha bîkhai ka hril ding a ni sih a,
Ka hmûrhai kâkna chu thil indik a ni ding a nih.
7Ka bau chun thudik sâksuok a ta,
Khawhlona chu ka hmûrhai ta dingin tirdakum a ni sih a.
8Ka baua thu po pohai chu felna a na,
Annia chun a kâwi amanih, a khêl amani khawm a um nawh.
9A hrethiemtu ta ding chun a fie vawng a,
Hrietna hmu suoktuhai ta ding chun ân dik vawng bawk a nih.
10Tangka ni loin, ka inchûktirna hi lo pawm ro,
Rangkachak ditumtak nêkin hrietna chu lo chang bawk unla.
11Lunghluhai nêkin varna chu a ṭha lem sih a;
Thil po po dit thei taphawthai chu ama le hrilkhi ding a um nawh.
12Kei varna hin varna chu ka chêngnaah ka hmang a,
Hrietna le ngairuotthiemna chu ka hmu suok a.
13LALPA ṭi chu suolna theidana ding a na,
Chapona le, insuklienna le rîtlona kawng leh,
Bau chapo hi ka theida a nih.
14Thurâwnna chu ka ta a na, hrietna hrisêl leh,
Hrethiemin ka um a, thilthawtheina ka nei a nih.
15Lalhaiin keimain ro an rêl a,
Lal nauhai chun keimain rorêl dik chu an sukthlûk bawk a.
16Rorêltuhai chun keimain ro an rêl a,
Mi ṭhahai le, hnuoi chunga rorêltuhai po po chun.
17A mi hmangaituhai chu ka hmangai veh a,
Chun, nguntaka a mi zawngtuhai chun mi hmu suok bawk an tih.
18Hausakna le inzâkaina chu ka kuomah a um a,
Hausaknahai le felna tlotak el chu.
19Ka ra chu rângkachak nêkin, anih, rângkachak inthieng nêkin a ṭha lem a,
Ka pungna khawm chu tangka ditumtak nêkin a ṭha lem.
20Felna lampuia chun ka feh a,
Rorêlna lampuitakhaia chun.
21Kei a mi hmangaituhai chu thil nei dinga ka siem theina ding le,
An sum inhai chu ka suksip theina dingin.
22LALPA chun a lampui inṭanna angin a mi siem a,
Inhmata a sinthawhai hmasatak angin.
23Atîra inthawk, chatuona indinin ka um a,
Hnuoi hrim la um hmain.
24Tuipuihai a um naw laiin lâk suokin ka um a,
Tuikhurhai tuia sipa umhai um naw lai chun.
25Tlânghai siemrêl an ni hmain,
Muolhai hma daiin, lâk suok ka ni tah a;
26Ramhai le hnuoi a la siem naw lai le,
Khawvêl pilvut inṭan hma dai bawk chun.
27Vânhai chu a buotsai lai chun, chutaka chun ka um a,
Tuipui chung inkuol a siem lai chun;
28Vâna sûmhai a siem laiin,
Tuipui tuikhurhai chu a sukdet lai chun.
29Chuong lai chun tuipui ta dingin tiemchin a pêk a,
Tuihai chun a thupêk chu an bawsiet nawna dingin,
Leihnuoi lungphûmhai chu a ruot lai chun:
30Chuong lai chun amaa chun sinthaw hotu#Hebraiah a umzie chieng lo ang ka lo ni tah a;
Chun, ama hmaa chun hlima um rawpin,
Ni tina a lâwmna chu ka lo ni tah a.
31A leihnuoi chêng theinaa chun hlima umin,
Ka lâwmna chu mihriem nau- pahai chungah a ni tah a.
32 #
Lk 11.28 Chuleiin, tuhin, ka naupa- salhai mi lo ngai unla,
Ka lampui hrawtuhai chu mi hamṭha an ni sih a.
33Inchûktirna chu ngai unla, var unla,
Dit naw hrim hrim naw ro.
34Ka thu hretu chu mi hamṭha a nih,
Ka dâikawtkhâra ni tina nghâktu,
Ka kawtkhâr bienga nghâk zingtu chu.
35Tukhawm a mi hmu suoktu chun hringna chu a hmu suok a,
LALPA ditsakna chu chang a tih.
36Amiruokchu, ka chunga suksuol chun ama lungril ngei a sukkhawhlo a,
Kei a mi theidatuhai po po chun thina an hmangai a nih.”
Currently Selected:
THUVARHAI 8: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
