THUVARHAI 7
7
Nawchizawr zaihlêmnahai
1Ka naupa, ka thu hi kawl la,
Ka thupêkhai hi nangmaa chun siekhâwl rawh.
2Ka thupêkhai hi kawlin khawsa la,
Ka închûktirna chu i mitnautê angin;
3I kutpârhaia chun khuopde la,
I lungril phêk chunga chun ziek rawh.
4Varna kuoma chun, “Nang chu ka farnu i nih,” ti la,
Hrietthiemna chu i laibungah inbûk rawh.
5Hmêlmak nuhmeia inthawka an kawl theina ding chein,
Hmêlmak a thuhaia zaihlêmtu chea inthawk chun.
6Ka in tukverah,
Ka thirlêna chun ka en hlak sih a.
7Chuongchun, mi mâwlhai laia chun ka en a,
Tleirâwlhai laia chun,
Hrietthiemna bo tlangvâl ka hmuh a.
8Ama chun amanu tuol kawtthlêra chun fein,
Amanu in lampui chu a hraw a,
9Chu ni zântiengah, thimtham hnuoiah;
Zân mâwk inthim mup hnuoia chun.
10Chun, ngai ta, chutaka chun nuhmei,
Nawchizawr inthuoma inthuom, lungril inlêktak#Hebraiah a chieng nawh ân tuokpui a.
11Amanu chu mi bautam ngalhrâttak a na,
A ina hrim a ke chu a um hman ngai nawh a.
12Kawtthlêra le khawlai dunghaia umin,
Kil tina inchânin a nghâk zing a.
13Chuongchun, amanu chun ama chu a man a, a fâwp tah a,
Chun, hmêl iniemtakin#Tlângnêltakin, Zakmaw takin a kuomah a hril tah a;
14“Inremna thilinhlânhai inthâwina inhlân ding ka nih a,
Hi ni hin ka thutiemhai chu kân thien tah a.
15Chuleiin, nangma tuok ding chein ka hung suok a nih;
Taimataka i hmêl zawng dingin, chuongchun, ka hmu suok ta che hi.
16Ka khum chu puon cheimawi inkhumin ka chei tah a,
Puon ṭielhai Aiguptaa khâwng chun.
17Ka khum chu riminhnik ka theh a,
Murra le, beraw le, thingzungthakin.
18Hung la, zingkâr chenin ei hmangaina sipzak lâng ei ta,
Hmangainahaiin eini chu inhnêm ei tih,
19Ka pasal chu inah a um nawh a,
Khuol ram hlatakah a fe ta sih a.
20Ama chun tangka fûn a chawi a,
Thla lir pha leh hung tlung a tih,” tiin.
21Amanu thu hril ṭha chun ama chu ân pêktir tah a;
A hmûrhai zaihlêmna chun ama chu a tirlui tah a.
22Ama chun amanu chu a zui nghâl a,
Bâwngchal sathattu kuoma fe ang elin,
Annawleh, invêt sukdikna dinga thîrkawl bun ang elin,#A ni tak âwm chu, “Sakhi chânga âwk thut angin” Hebraiah a chieng nawh
23Thalin a thin chu a sunthleng hmakhata,
Vatein châng a baw ang elin,
A nun thlengna ding a nih ti hre loin.
24Chuleiin, tuhin ka nau- pasalhai, mi lo ngai unla,
Ka baua thuhai hi pawisa ta u.
25A lampuihaia chun in lungril innghat naw sienla,
A lampuihai chu zui bawk naw ro.
26Mi tamtak chu hliemin a peithlûk ta sih a;
Anih, a sukhlumhai po po chu sipai râlhrâthai an nih.
27Amanu in chu Seol fena lampui a na,
Thina pindana lûtthla chu.
Currently Selected:
THUVARHAI 7: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
