ISAI 33
33
Lalpain sandamna chu hung intlungtir a tih
1Nang rawk tuok ngai si loa, rawktu, vervêktaka thaw tuok ngai si loa, vervêktaka thawtu, i chung a rik ie! Mi rawk i bân phaleh, rawk la tuok vêng i ta; vervêktaka i thaw zo phaleh i chungah vervêk- takin thâwng an tih.
2Aw LALPA, mi lunginsiet la; kan nghâk zing che hi: tûk tin kan bân hung ni la, lunginzîng huna chun a mi sandamtu hung ni bawk rawh.
3Sa mur mur ria chun mi tin chu an tlân hmang tah a; nang i hung tho meu chun hnam tin chu sukdarin an um tah.
4In sum râllâka lâk ding chu thilhringin thil an thak khâwm sup sup ang hin thak khâwmin um a ta; khâuṭhikṭhihai an inchâwm sup sup ang hin annirawi chu sum chunga chun inchâwm sup sup an tih.
5LALPA chu chawisângin a um tah; chungtienga khin a um sih a; ama chun Zion chu rorêl felna le felnain a suksip tah.
6I dam sûng chun um nghetna um a ta, sandamna dâm, varna dâm, hrietna dâm um ṭeu a tih; LALPA ṭîna chu a ro a nih.
7Ngai ta, an pasalṭhahai chu tuol- tieng an khêk a, inremna palaihai chu an ṭap an ṭap a.
8Lamlienhai chu a ṭhing ṭhiep ṭhuop a, mi inzin inlawn chu an um ta nawh a, ama chun thuthlunghai chu a bawsiet a, khuohai chu a hmusit a, mihriem a ngaisak ta nawh.
9Ram chu a ṭapin a châu a; Leba- non chu ân zakin a vuoi a, Saron chu thlalêr ang a ni tah; Basan le Karmel chun an hnahai an thin thlâk a.
10LALPA chun, “Tuhin chu tho ka ta, tuhin chu inthawk ka ta, tuhin chu chawisângin um tâng ka tih.
11Hlo ṭâwl vawn in ta, bupâwl nei in tih; in thuok chu nangni kâng hmang ding mei a nih.
12Mi tinrênghai chu chinai lung raw ang, hlohlingnei vât hnung meia an pei ang chu nîng an tih,” a ta.
13Hlataka umhai, ka thilthaw hi nain lo hre ro; hnaitaka umhai, ka thilthawtheizie hi hre ro.
14Ziona mi suol umhai chun an ṭih a; Pathien inza naw mihai chu inthin- nain a man tah a. Eini lai hin tu am thil kâng hmang mei kuomah um ei ta le? eini lai hin tu am kumkhuoa kâng hlut hlut kuoma dâm chun um ei ta le?
15Feltaka um a, indiktaka hril hlaktu; nêksâwrnahai hlâwkpuina hrim hrim theida a, thamna la nuom loa, kut thin san a, thisen insuo thu ngai nuom loa na hup a, suolna hrim hrim en nuom loa insîm hlaktu chu;
16ama chu chungtieng chun um a ta, a kulbîng insânghai chu lungpui kulbînghai chu nîng a tih: bu chu a kuoma pêk nîng a ta, a tuihai chu um ngei ngei a tih.
17I mithai chun lal chu a mawinaa chun la hmûng a ta, ram par lientak la thlîr a tih.
18“A tiemtu kha khâw lai am a um tah a? siechawi bûktu kha khâw lai am a um ta a? Râl vêng in insânghai tiemtu kha khâw lai am a um tah a?” tiin; i lungrilin thil râpthlâktak kha ngaituong a tih.
19Mi ṭiumtak, ṭawng inriltaka i hriet thei nawa ṭawng mihai, ṭawng danglam i hrietthiem nawa ṭawnghai chu hmu ta naw ti ni.
20Kan ruoiṭhena khawpui Zion khi en ta, i mit chun Jerusalem chu umna muongumtak, puon in iengtik khawma sawn lo ding, a keimarna hem iengtik khawma phawi lo ding, a keina hrui hrim hrim intan lo ding ang chu, hmûng a tih.
21Chutaka chun LALPA, vadung lientak tak le, vadungtêhai um nghên nghuonna hmun chu, ropuitakin ei kuomah um lem a tih; chuong tui chunga chun indona lawng lientak kheraval nei mi hrim hrim fe naw nih a, lawng lien ropuitak khawma fe khêl bawk naw nih.
22LALPA chu ei rorêltu a na, LALPA chu dân mi petu a nih; LALPA chu ei lal a na, ama chun mi sandam a tih.
23I hruihai chu sukfuolin a um a; an puon zâr bul chu an sukdet thei nawh a, puon zâr chu an zâr thei nawh a; chu lai tak chun râllâk sum tamtak chu semin a um a; kebaihai khawmin râllâk sum an lâk tah a.
24Chu khuoa um chun, “Ka damnaw ie,” ti naw nih a, a sûnga mi umhai chu suol ngaidamin um an tih.
Currently Selected:
ISAI 33: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
