ISAI 22
22
Inlârna ruoma rimsikna hung tlung ding
1Inlârna ruom phurrik chu. Ieng am in ti a ni leh, in chunga dâm in lâwn vawng leh?
2Aw khêk ria sip, khawpui sa mur mur, khaw hlimtak, i sûnga an that- hai chu kâwlhnâma that an ni nawh a, indonaa thi an ni bawk nawh.
3I rorêltuhai po po chu an tlân hmang tâwl a, thal kâp mihai khuop- in an um a; i ta an hmu po po chu khuop hlawmin an um a, hlataka inthawka hung tlân hmanghai chu.
4Chuleiin, kei chun, “Mi en loin, khingtieng en ro, ka ṭap rak rak ding a nih; ka mihai naunuhai râllâka an lâk thua chun mi thlêm inkhaw nuom naw ro,” ka tih a.
5LALPA, sipaihai LALPAA in- thawk chun, inlârna ruoma hin buoina le sirdena le lunginzîngna ni a ni sih a; kulpui bang suksietna le tlânghai kona chu.
6Chuongchun, Elam mihai chun thal bâwm an chawi a, mihriem chuongna tawlailîrhai le sakawr chung chuong mihai leh; Kir mihai chun phaw tuomna chu an sût a.
7Chun, i ruom ṭhatakhai chu taw- lailîrhaiin a sip tah a, sakawr chung chuong mihai chu kul kawtkhâr bula chun an intlim hmur a.
8Chun, Judahai inkhumna chu a lâk hmang a; chu nia chun rampui hmuna râl inthuomna chu in en tah a.
9David khaw kul a se laihai chu in en bawk a; a tam ti in hriet a, chun, dîl thlanghnung lem tuihai chu in inluong khâwmtir tah a.
10Chun, Jerusalem inhai in tiem a, kulpui bang siem ṭhatna dingin inhai chu in ṭhiek a.
11Dîl hlui tui umna dingin kulpui pahni inkâra chun tui intling khâwm- na in siem a; nisienlakhawm, chuong thawtu tieng chu in en si nawh a, inhmaa lo siemtu chu in ngaisak bawk nawh.
12Chu nia chun LALPA, sipaihai LALPA chun, ṭap ding le, âwm inchum ding le, lu sukkawl ding le, saiip puon dierkei dingin a ko a;
13nisienlakhawm, ngai ta, hlimna le lâwmna dâm, bâwng thatna le berâm thatna dâm, sa fâkna le uoin dâwnna dâm a um ta lem a. “Fain dâwn ei tiu khai, zinga chun ei thi el ding a ni sih a,” an tih a.
14Chuongchun, sipaihai LALPA chun ka naah ân hriettir a, “Mathei- loin hi suolna hi in thi hmakhat chun nangni laia hi sukfai ni ta naw nih, LALPA, sipaihai LALPA chun a tih,” tiin.
Sebna hmun Eliakimin hung hluong a tih
15LALPA, sipaihai LALPA chun, hieng ang hin a tih, “Fe la, hi sum enkawltu hrep kuoma hin, Sebnaa, lal in chunga hotua um ngei kuoma chun fe rawh.
16Chun, a kuomah hieng ang hin hril rawh: Hitaka hin ieng am i thawh a? Hitaka hin tuhai am i nei a, thlân hi i kerkuok kher a ni leh? Nangma ta dingin insângtakah thlân i kerkuoh a, i ta dinga lungpuia umna i siem hrim hi!
17Ngai ta, LALPA chun mi hrâtna a pei angin pei rak a ti che; anih, a fûnin fûn tlat a ti che.
18Ama chun matheiloin thil hlûm angin sukvir a ti cheh a, ram lientak- ah vawr lût a ti che; chutaka chun thîng i ta, chutaka bawk chun, nang mâni lal insûng sukmuolphotupa, i ropuina tawlailîrhai chu um a tih.
19I sinthawnaa inthawk chun hnawt suok ka ti cheh a, ama chun i hotu ninaa inthawk chu hnûk thlâng a ti che.
20“Chun, chu nia chun ka siehlaw Eliakim, Hilkia naupa chu, ko ka ta;
21ama chu i zakawfuol hi inhâktir ka tih, i kâwngkhi hin sukhrât ka ta, i rorêlna hi a kutah inkawltir ka tih; chuongchun, ama chu Jerusalema umhai ta dingin le Juda sûnghai ta dingin pa nîng a tih.
22 #
Tp 3.7 David sûnghai châbi chu a lieng- koah sieng ka ta, ama chun hawng a ta, tukhawma khâr naw ni hai; khâr a ta tukhawma hawng naw ni hai.
23Ama chu kilna hi hmun dettaka an kil tlat angin, sukdet tlat ka ta, chuongchun, ama chu a pa sûnghai ta dingin lalṭhungpha ropuitak ding nîng a tih.
24Amaa chun a pa sûnghai ro- puina po po chu la khai vawng an ta, a nauhai le a thlahai, bûr le bêl chîn tinrêng, berbu bûr le bêla inthawka tui siena bûr le bêl po po chenin.
25Chu nia chun, kilna, hmun nghettaka kil tlata um chun la dâwl naw nih; sât thlâka umin, tla tâng a ta, a chunga thil rik um chu sukbo- hmangin um tâng a tih, LALPAIN chu chu a hril ta si, sipaihai LALPA chun a tih,” tiin.
Currently Selected:
ISAI 22: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
