ISAI 23
23
Tura le Sidon chunga rimsikna hung tlung ding
1Tura khaw phurrik chu. Tarsis lawng lienhai, khêk rak rak ro; in hrim hrim um naw khawp le lûtna hrim hrim um naw khawp rauin Tura chu suksietin a um ta hi, chu chu Kupra rama inthawk chun an kuoma suklangin a um a.
2Thlierkâra umhai, to ṭhiep ro, Zidon khaw sumdâwng tuisuorieta fehai isukmuk chu.
3Tuipuia Sihor chi, Nile vadung bu sîk chu, a hlâwkna a ni hlak a, hnam tin sumdâwngna hmun a ni hlak.
4Aw Zidon, inzak rawh: tuisuoriet, tuisuoriet kulpui chun, thu a hril ta sih a, “Nauha se kân vawi ngai nawh a, nau ka nei ngai bawk nawh, tlang- vâl hlak ka châwm ngai bawk nawh a, nunghâk khawm ka vailien ngai nawh,” tiin.
5Thuthang chu Aigupta ram a tlung pha chun Tura thuthang chu nasatakin invawi an tih.
6Tarsisah va kai unla; thlierkâra umhai, khêk rak rak ro.
7Hi hi maw in khaw hlim tak, a hlunzie khawṭoṭima mi tah, a kein hlataka um dinga a iṭhuoi hlak chu?
8Lallukhum inkhumtirtu khuo Tura chunga hin tuin am hi hi tlung dingin a ruot a? Chutaka sumdâwng- tuhai chu mi lienhai an na, chutaka sumdâwngtuhai chu hnuoi mi inzaumhai an ni sih a.
9Sipaihai LALPA chun ropuina po po chapona chu sukmawi lo ding le, hnuoia mi inzaumhai po po hmusit- uma inumtir dingin a ruot a nih.
10Aw Tarsis naunu, Nile vadung angin i rama chun luong liem rawh; i kâwngkhitna hrim hrim a um ta naw hi.
11Tuisuoriet chungah a kut a phar a, ramhai chu a sukhnîng a, LALPA chun Kanaan ram chungchâng thuah thu a pêk a, a kulbînghai sukse ding- in.
12Chun, ama chun, “Aw Zidon nau nunghâk, mi nêksâwr, hlim nâwk ta naw ti nih; tho la, Kittim ramah kai rawh; chutaka khawm chun châwlna hrim hrim hmu chuong naw ti nih,” a ta.
13En ta, Kaldaihai ram hi, hieng mihai hi an um ta nawh; Assuria mi chun thlalêra ramsahai ta dingin a ruot tah a nih; an in insânghai chu a bâwl a, chutaka lal inhai chu an sukbohmang a, in sieah a siem tah a.
14Tarsis lawng lienhai, khêk rak rak ro, in kulbîng chu suksietin a um ta hi.
15Chun, chu nia chun, Tura khuo chu, lal pakhat kum tiem a, kum sâwmsari sûng chu theinghilin um a tih; kum sâwmsari bo hnung chun nawchizawr hlaa an hril angin Tura khaw chunga chun la tlung a tih:
16“Nang nawchizawr mihai theinghil ta hnung! ṭingṭang la la, tuol fang rawh, ṭingṭang kei la, hla tamtak sak rawh, hrieta i um nâwk theina dingin.”
17 #
Tp 17.2; Mal 4.6 Chun, kum sâwmsari bo hnung chun, LALPA chun Tura khuo chu hung sir a ta, chuongchun, ama chu a hlaw hnawtin um nâwk a tih, hnuoi chunga khawvêl ram po poa nawchizawrin um a tih.
18 #
Ezek 26.1-2; 19; Joel 3.4-8; Am 1.9-10; Zek 9.3-4 Chun, a sum themsuok le a hlaw chu LALPA ta dinga thil inthieng nîng a ta, chu chu inkhâwlin amanih, sie khâwlin amanih um naw nih a; a sum themsuok chu LALPA hmaa umhai ta dingin a ni ding a ni sih a; hnienghnâra an fâk ding le, silfên ropuitak an nei theina dingin.
Currently Selected:
ISAI 23: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
